1：近期Threads好興討論，「月入8萬生活慘淡」，「家庭月入17萬，供小朋友入國際學校掹掹緊」，然後今日「滙豐卓越理財新中產報告2024」出爐，到底中產家庭要有幾多身家先覺得夠退休，答案係2,090萬，另加每月2.7萬被動收入。
2：咁呢條數點計呢？拎滙豐公佈其中兩個case做例子，一個就750萬做積蓄、一層價值850萬嘅供滿物業、另外要150萬，達至醫療財務自由，total 1,750萬。
另一個例子，就1,300萬做積蓄、有一層已供完嘅物業作為租金收入，呢度900萬；另外要多230萬，為家人額外儲起作經濟支援，呢度夾埋2,430萬。呢兩個case只係例子，總之所有受訪者平均數就係2,090萬。
3：調查指受訪者理想退休年齡為60歲，咁香港人就好長命嘅，女性平均壽命88歲，全球第一；男性平均壽命則為82歲，全球第二高。
如果我計退休使費，我假設係60歲到85歲，呢度25年，拎上面case 1講嘅750萬積蓄，每個月係2.5萬架咋，其實唔算好離地；至於case 2就鬆動嘅，每個月4.3萬，佢仲有多層樓收租做被動收入。假如你長命120歲呢，咁就要再攤薄啲了……
4：調查入面，仲有個好有趣嘅point，喺一班已退休嘅中產入面，有仔女嘅受訪者，比無仔女嘅受訪者，實際退休年齡係平均遲7年，前者係62歲退休，後者係55歲就已經印印腳退休。
5：當有富豪80幾歲都仲要為仔女奔波，中產當然都走唔甩，調查指，20%中產父母，平均64歲都仲要support子女財政，仲要喺退休計劃入面預留約140萬元，係用於仔女生活所需。所以上面case 2 咪講到，退休會考慮到「為家人額外儲蓄作經濟支援」嘅，其實好現實嘅，仔女生性都會想幫輕下，咪盡做囉。
6：寫到呢度，已經覺得自己離退休好遠好遠，再望一望個仔，嗯……咁快想退休？有耐都唔使旨意。
7：BTW，今日個記者會我有去，有兩個好重要嘅takeaway，其中一句係養和副院長陳煥堂醫生講嘅，大約係話：「你都想90歲都仲去旅行架？但肌肉量係要儲，所以為退休做準備，就要每日做運動。」對於我呢啲運動廢柴來講，真係有如當頭棒喝。
另一個takeaway，當提到有咩退休貼士俾大家時，滙豐香港高層許長虹（Brian）就話，「Happy wife, happy life!」呢句真係講得啱！好啱！
