多謝你哋嘅回覆，我全部睇晒
你哋提既語文同本地經驗問題，自問英文真係麻麻，自己識既野都表達唔到，聽又唔係100% 明。 希望返返工，慢慢會有進步。自己香港工作20年本以為對方計返少少年資， 最終都要被當fresh grad ，呢樣有啲shock.
人工低vs 樓價/生活費方面,你哋都好有道理。就算我將來升返grade, 人工一定也差過以前。 我其實介意title唔好聽，而人工係反映地位/成功與否既指標。自己講出嚟都知咁諗唔啱，工作無分高低級。 但身邊唔係真係close 既朋友，舊同事，我知如果比佢哋知道人工低title 跌，衰既就食花生，幸災樂禍心態，好既父母家人就會可憐我覺得我慘 。解釋唔到咁多俾佢哋聽，尤其老人家，唔會明 （但偏偏老人家最喜歡俾無謂嘅建議 ）。之前我用湊仔做藉口，唔搵工返工。 而家終於要接受現實…另外我亦都會擔心本地人會點諗，因為自己係移民，我期望自己表現到自己好好，貢獻社會。如果個工作Title差，怕會俾人睇唔起。加加埋埋一諗起就有壓力。
我有同老公傾，佢覺得我諗多咗，或者可以用技巧應對。慶幸佢欣賞我付出，一路佢都鼓勵我試吓，踏出第一步，冇俾我壓力。
你哋建議我諗吓自己擁有嘅，唔好聚焦喺失去嘅嘢。非常認同，多啲咁諗個人會舒服啲，多謝你哋
5個讚
我覺得你咁諗其實係人之常情
既然之前香港事業上有付出，都希望黎到英國受到一定嘅認同
既然你都accept左offer, 即係肯面對現實
證明你心態好正面
我有朋友黎到第一份工都係比人壓價一大截
佢而家黎到差唔多三年轉過工，人工同個title都未去返之前香港既水平
但係比第一份已加左好多同個title 靚仔啲
肯做落去始會有回報
香港長輩嗰啲唔洗講得咁仔細嘅啦
求其話做返本行夠生活咪算
4個讚
所以講出嚟聽下人哋意見同分享好有用，共勉之，大把人陪你呀樓主
A_lcy
66
唔會啦，我識兩個外國人，一個專業人士、一個都senior management grade，我做pt cleaner 時傾計，佢哋話曾經都因為失業做過清潔，佢哋好欣賞我唔計較工種肯做住先，比起d 人寧願唔做嘢喺屋企等運到嘅人好。做乜都好，cv 有經驗好過吉咗，我聽大公司HR talk 都係咁講，你做過就算唔關你Apply 職位都好，點都好過無嘢寫。
3個讚
呢邊吹水都好少講返工、問title，
多講去邊度玩種左乜，
有聽過身份地位係睇揸咩車同住邊區，又或者花園有幾靚。
同埋，title同袋口有幾多錢係冇關係，我遇過：
以為係普通園丁阿叔，竟係我任職機構嘅高層；
文員姐姐仔女全部專業人士、架車貴我三倍；
校工姨姨有十間八間屋，得閒就放無薪假去旅行。。。
或者因為咁，所以呢邊表面工作階級觀念冇咁重。
俾fresh grad價個種滋味我都明，
個陣嬲到想轉份近屋企嘅普通文職算，日日倒數完約日子。
雖說第一份工俾人恰，有左呢個本地經驗，之後轉工易左同搵到份好做啲。
係外地二次人生從來都唔容易，
有時都真係唔知點同親友講，得閒開po 圍下爐～～
香港啲校工都係，我以前識個auntie 做校工，有車有樓，供三個仔女喺澳洲讀書然後佢哋喺嗰邊做嘢結婚，嚇到其他冇做嘢aunties死，佢哋未知個校工咁勁前成日笑佢
True
我地幾個街坊仔女都係讀私校，其實大家都心照點解有其他offer大家都會揀呢間，因為呢間成績幾好之餘，學費係最平嗰間
其中一家嘅女人好鍾意炫耀，每次都全身名牌，成日曬命喺度依然keep住過緊香港嘅優質生活，做facial spa 行outlet shopping買名牌 多朋友交遊廣闊
其實聽佢講嘢就知佢唔係真有錢，只係老公仲搵緊香港錢，供得起呢個消費啫，我識得真有錢嗰啲都著得好樸素低調
1個讚
的確，很多時那些表示不能適應外國生活的人主要都是自己價值好高
2個讚
A_lcy
77
你都知自己英文唔好，就當由頭學過，好多人移民都係咁
2個讚
香港：學校入面一人以下個位
英國：TA
呢邊TA同事有：前大學lecturer，退休教師，物理治療師，家庭主婦，啱啱畢業後生仔等，簡稱乜人都有
所以完全唔會覺得自己有乜咁「巴閉」，要「紓尊降貴」去做份title咁低嘅工
驚舊同事點睇自己？
要睇你唔起嘅，由你辭職第一日已經當你係傻仔啦
真係friend嘅自然一切在心中
9個讚
真人真事，已經做到私人公司某個grade, 四十幾歲時辭職做地鐵司機，當然一定從頭來過，因為係公會工，人工高唔怕炒。
Newcomer/香港人唔知頭唔知路一定以為佢傻左，local/老華僑就個個恭喜佢
唔理有冇移民，呢啲圈子嘅親戚朋友都要斷捨離
3個讚
佢有次唔小心爆響口話唔想老公飛來英國咁密，怕少咗浦頭keep唔到啲客
1個讚
