上年九月搬入新居第一次請菲傭姐姐，我哋兩公婆返工四大長老走既走死既死，冇人幫拖湊住三歲仔。本住我對人好對我好嘅概念請姐姐，當初同佢講咗屋企好多時得佢一個，叫佢自動自覺做嘢，就算佢做得唔好都唔會鬧佢，最多WhatsApp話俾佢聽應該點做。唔知係咪因為係咁縱壞咗個工人，明明成日有時間玩電話，好耐都唔應WhatsApp，或者會喺WhatsApp反駁我哋。叫佢得閒影下小朋友俾我睇，做到今時今日30張相都冇，朝早湊完小朋友返學就好快手做晒家務，小朋友放學返嚟瞓晏覺佢就休息，瞓醒就帶小朋友落公園玩，六點幾先返嚟求其煮兩個餸，完全唔啱食。
其實我已經唔想再用佢，但老公就話，至少呢個姐姐唔偷嘢唔借錢個仔又冇穿冇爛，請過一個新唔知點，我哋又冇時間train，冇屋企人睇住，做生不如做熟。
想大家俾啲意見，好驚再轉一個都係咁，搞到而家有陰影，睇極agent d cv都好似唔啱咁 
其實你工人算係咁，無咩大錯。
你唔要大把人要架。
你一開始就錯喇，無先小人後君子。人人都懶底，你又比咁大自由度佢。我以前工人好好，我做左詳細工作表比佢剔（好少抽查）絕對歡迎佢快手做完就瞓下休息下，佢開心自然對小朋友都會有耐性啲。
我亦歡迎工人玩下電話，同家人朋友視像。條件係，唔可以喺街外，湊小朋友要安全第一，同埋我小朋友唔可以上鏡比人睇到。要樣樣講到勁detail, 因為佢真係安全、私隱意識都好低，好鬼chill。
你地應該好好傾下，有咩想佢改善，有咩欣賞佢做得好。
傾之前你好好諗下，作為僱主，有小人質喺佢手嘅僱主，有咩底線係一定唔比佢踩得？
咁耐我淨係鬧過佢一次，就係佢竟然放左陌生人入屋，我嬲到死，但又可以點丫，佢又唔係立壞心腸。
6個讚
建議你去工人姐姐關注組睇吓其他工人啲惡行，咁你就唔會想炒自己個工人架啦
1個讚
轉咗可能仲衰,唔好轉
其實唔太差，只不過太自由，懶左！
應該比返時間表佢！
幾點帶小朋友去玩、玩幾耐、幾點前要返黎準備晚飯！而唔係由佢「隨心、鍾意幾時返就幾時返」
小朋友都要有定律架嘛，幾點食野、幾點沖涼！
玩完返黎出汗又要沖涼先煮到飯/食飯
比返個time table佢！一開始要先小人後君子
嚴格地跟返time table做野！
可以休息，但有時都要安排啲野比佢做
例如「一星期要抺玩具一次」之類
總唔可能日日坐足2小時？！
晚飯 - 可以寫定啲簡單餸菜食譜比佢
叫佢跟個到揀黎煮
whatsapp 唔應就唯有打電話
如果你地識煮野食，咪試下星期六一齊煮教下佢
印埋食譜比佢睇
佢有心既，學下學下就識
始終本來文化就唔同，唔教既好難煮到啱你口味既餸菜