‘精英’ 消防工程公司 打工奇遇記
呢份文員工, 係2023年年底於勞工處招聘網搵到的, 大概內容係: 番星期一至六, 朝九晚六點半, 長短周. 無需加班, 有雙糧, 有醫療, 交通及電話津貼, 負責公司文書, 排程等普通文職工作. 月薪15-17K, 官塘區. 咁我又住係官塘區, 都係想搵番附近地方, 唔想哂D時間搭車, 所以都同意去見下呢份工, 咁對方admin即三當家打俾我時, 約我見工時間係晚上7點, 咁無所謂啦, 你見工, 工見你, 都係講雙方感覺而已.
after all係請左我, 我亦有幸得到呢個機會見識了原來一間公司係可以咁樣的.
公司人事: 老細(男, 曾經的’大人物’) + 二當家(男, 地盤人) + 三當家(女, 喇叭嘴) + 3位男科文 + MK女採購
首先, 我係文員, 見工時講我負責文書上工作, 例如打下單, 跟下貨幾時到港, 安排運輸.
各位, 文員仔黎講, 再點 都唔需要我呢位文員去考平安卡吧? 係呀, 俾300蚊上一日堂考一張平安卡呀, 點解文員要拎平安卡? 係呀, 我都呆一呆, 番左工第二日已經由三當家(女)直接打去約時間上堂, 咁果位老細的說法係咁: 我覺得你係一個可造之材! 絕對不止只限做文員仔, 你個空間好大, 你個將來更大, 文員只會令你局限左自己, 你要跳出自己的 ‘con fon 鬆’ (好心你講番中文啦), 我想你做更多, 你亦都可以做更多! 你不止只係搵得16K, 你可以搵到20K! 好啦, 你演講到馬丁路得西咁款, 我都硬著頭皮去上堂啦, 當時, 我無理佢同我9 up呢段野, 我只係咁諗: 可能佢地呢行, 萬一急起上來要我出入site拎取文件, 方便之用而已吧. 打份工, 你好我好,又唔係趕我去做犯法野, 讀多一日書學多一樣野者. 好啦, 到拎左平安卡後, 二當家三當家再上果位科文, 每日梅花間竹地問我幾時拎工人卡, …拎工人卡的意思係去地盤了, 對嗎? OK, 咁我都照用電郵問番建造業會啦…根住, 安全鞋及安全帽, 加多件反光衣. 各位, 到呢一刻, 你地個第一反應係咩? 番左一個月都無, 根本一開始就布局搵我到時頂替科文而已, 即係用文員的月薪再落去site幫手, 無講錯嗎? 咁, 我都無話即走, 都係打算睇定D先, 若到最後真係叫我落地盤幫手, 緊係遞信走人啦, 根本我都無呢種體力做. 如果我做到, 咁唔洗搵文員工啦.
當我拎齊左平安卡+工人卡後, 再加上安全鞋所有費用, 我問三當家:
a, 呢D費用可以何時claim俾我? 喇叭嘴: 1個月(我必須要強調, 她當時個嘴臉係好難睇!).
b, 請問公司福利其中的交通津貼+電話津貼+醫療係點樣的? 喇叭嘴: 公司需要你出去搭車時可以claim, 不過一定要限由公司出發, 再回公司先計. 由家中出發直接去不計. 電話津貼係指, 試用期後3個月, 每月有50蚊電話費津貼. 醫療係指, 你拎張單同公司claim, 每年限2000蚊, 每張單張不超過250蚊.
講到呢度, 基本上黎講, 係時候搵下一家了…但我都未作哂決定. 最尾令我決定走是: 公司環境真係好唔友善+搬第二區.
人事, 我本來貪佢地人小, 以為易相處, 加上男多女小應該無咩事非, 事實相反. 成個環境都唔係太友善, 喇叭嘴聯同其他人去杯葛其中一位男科文(話人地係基佬), 後尾加上我呢位新人, 自問中年師奶一名, 係唔得人中意架啦, 都無咩所謂, 做人最基本禮貌我會有, 即使呢一個月, 我每次見到同事都會講句早晨, bye bye, 也即使佢地都唔應, 我都會照講, 禮貌身為一個人黎講, 真係好基本架.
點解我叫三當家為喇叭嘴呢? 呢位老細得力助手係二當家+呢位喇叭嘴的三當家, 老細不在時, 三當家係負責哂所有大小事務, 本應老細同佢2位講的野都係軍事機密啦, 但就係呢頭老細係房講乜/電話交代佢乜, 喇叭嘴就即時跟採購妹妹爆哂, 但她忘了一樣野, 就係大家坐係一間房, 好應聲. 即係你講咩, 大家都聽到. 係呢一個多月中, 由番工第一日到最尾辭職走人, 都聽住佢帶頭數呢樣數果樣. (若真係咁憎個老細, 又不滿間公司, 辭職嘛.)
再講番我呢個文員位啦, 自我拎左平安卡+工人卡後, 就唔俾我再掂電腦啦, 只係叫我將一堆舊採購單拆釘, 再執清楚, 再釘, 再歸類, 好明顯係等多幾日後就派我去地盤幫手架啦. 我都照忍, 反正每日你俾錢我坐係度整文件, 準時番工準時收工. 但係! 也多謝喇叭嘴, 原來佢地要搬! 搬去第二個區, 由官塘坐巴士(不塞車情況下)去要9個字, 而且三當家講, 再三講: 搬硬! 好吧, 緣盡!
