近日，梁思浩於社交平台上自揭遭身邊一名女性不停講是非，因而詛咒對方，惹來唔少迴響，網民紛紛覺得梁思浩講得太過火。
梁思浩日前PO出與好友向展鵬聚會合照，並大爆發現身邊一名女性不停於背後講自己壞話：「認識咗30年，很久沒有談談往事 才發現我們身邊有一位女性不停講我是非！ 最恐怖嘅就係佢見我面嘅時候，扮到若無其事！」雖然梁思浩指自己無嬲，但就詛咒對方女兒衰一世：「Jeffrey問我嬲唔嬲？我只係答佢呢啲人喺娛樂圈大有人在。！我從不介意，也不生氣！ 你看看呢個女人個女兒，你就知道佢已經有報應！我又何須嬲呢？佢個女會衰一世！ 人在做天在看 若然未報………只係時辰未到！ 報應一定落喺自己嘅兒女或自己嘅父母身上 所以凡事行正路！心正必有運。」
梁思浩此番說話惹來極大迴響，網民留言指責佢心地差和毒舌：「講是非啫…唔洗咁呀…雙面人啫…又唔洗報應報係仔女身上呀？」、「禍不及妻兒呢，而且人地衰人地既事，但你而家咁講人地個女，就好似唔係幾好囉」、「你心地都好差」、「你咁樣講返人哋啲仔女，同講你嗰個有咩分別？」、「本來有睇你新節目，但聽完你呢段說話，應該以後唔會再睇，完」、「只有導人向善，不要話報應在人，父母仔女身上，聽到吾舒服，想吾到出自你口」、「你把口都好毒」等等。有網民留言指覺得對方女兒係無辜，唔明點解梁思浩要詛咒報應落喺佢女身上，梁思浩回應反擊：「我冇嬲佢！ 我只係講因果，多數報應都會去咗自己嘅下一代或者上一代 請你細心睇清楚」；有網民亦指應該一人做事一人當，梁思浩則回應指喺度講緊因果報應：「所以我哋要多行善，這便是因果！多數報應都會去咗自己嘅下一代又或者上一代，所以想自己嘅下一代好自己要多做功德多做善事」。
(source: 梁思浩自揭遭女藝人講是非 激動詛咒對方女兒衰一世 網民直斥把口好毒)
雖然唔知佢口中既女藝人係邊位, 但係講還講, 唔使燒到去人地仔女度呀?
