拍拖3年，結婚10年，同先生一直好恩愛，是模範夫妻，佢好錫我就我，係所有人眼中好有責任感的好好先生。去年高齡懷孕好開心，諗住1家3口生活好美滿，點知生仔半年，發覺先生開始冷淡，仲以為係我太投入照顧個仔冷落佢，佢唔開心，佢突然話唔愛我啦，話我唔尊重和關心佢，又話已經係生仔前發生，一直忍耐著，現在唔想再忍。口吻充滿投訴厭惡和不滿，但我從來都感受唔到，所以我真係聽到一頭問號。
知道後我情緒超差超傷心，但繼續扮演好角色，每日好好生活照顧家庭，反省自己的相處問題，向他道歉，答應給他時間和空間好好想清楚，之後佢開始多左放工出去約人食飯&做運動，我一個人放工返屋企湊仔，讓他有me time和空間。在家的時候，佢都有主動講上班的事，有俾機會我關心佢，當然我知道他很多時走到房間玩手提，我也留他這空間不打擾他。
我更為了修補關係，想與他更好溝通相處，更了解佢內心諗法，去左報讀愛情心理課程，又貴又要用好多時間，但我仍然一心想令自己進步，才有更多力量去修補和愛他。點知，突然被我發現佢原來最近已經有第三者，是公司同事，他多次欺騙我去上班，其實是同女仔去街，更應該有肉體關係。
但當我間中問起他上班的事，間中提及這個女同事，他都可以若無其事咁講上班的事。同埋我真心唔明，明知人地有家庭有個剛出世的仔，點解D女人都可以明目張膽做人第三者？咩心態呢？真係覺得會有好結果嗎？
成件事只係發生1個月，眼前的好好先生，突然間變成咁，我覺得好陌生好遠，男人是否俾自由和空間，就只會搞3搞4，仲要講到對我好多不滿，好似係我令到佢勁失望先會無感覺，我覺得根本就係佢移情別戀後先對我所有野睇唔順眼。我好似從來無認識過他。我一心用盡努力去修補關係，但現在發現充滿謊言和欺騙，就算俾我拉返佢埋身邊，我又有幾大信心可以同佢行一世呢？
但係，我人生最保貴的十幾年俾晒佢，阿仔先得6個月，我又應該點準備做單親家庭？
對未來好多擔心，有無人可以分享下？
yes, u r right
又未必，你下個十年一定要比呢家精彩，呢個係你既新目標
唔會ga la, 你對佢心入面永遠有條刺，你好難原諒到佢，更加不能當無事發生。所以只有一條路，就係move on.
見你無提離婚，可能仲未傾到呢步？理性d, 就係盡量收集證據，令善養費可以多d, 個仔跟你，最好可以爭取比到同呢家無分別既物質生活比你同個仔，呢個係目前目標。
如果唔想要個仔，就攤牌睇下邊個養。
之後，就要換個角度去睇呢件事。令自己好過d.
7個讚
啲男人，唔係有第二個，
點會突然「醒覺」唔愛你吖，
出軌嗰啲人最叻搵藉口，你幾好都可以講到你衰，去掩蓋同合理化自己嘅不忠，所以你唔需要自責。
18個讚
未諗到離婚架。。
我仲好努力上堂學緊溝通技巧，想修補同佢關係。
但自己都覺得 究竟係咪真係可以再信任佢
我諗真係要試過先知
我一定會要個仔 我好愛個仔 亦覺得有個仔我先不至於咩都無 我仲有家庭 有目標
所謂證據 其實都係D相呀 一D前言不對後語的大話
我點收集證據呢？
原本我真係好自責 覺得我冷落佢
又或者相處時無諗佢感受
我都好好反思 同佢道歉
點知當我發現有第三者
我就知道 一切根本係佢合理化自己做錯事的藉口
或者 我哋相處係有矛盾
但我唔覺等會係出軌的原因
有D底線 大家都好清楚 踩到就返唔到轉頭
見你寫出黎仲好理性有條有理，好堅強！
老公係咪未知道你已發現？
1個讚
你一邊繼續上堂扮無野，一邊盡力影低d相，對話，電話log, fb, ig pm 個d做證據，更甚者，請偵探跟佢影佢相，到時如果要打官司，你會好感謝當初有做野保護自己，到時會覺得枕邊人都唔夠呢d證據同你咁親。
亦知道有d人肯定係公司同事，對個男人好憎恨，就send email 比公司/上司們/mass email 去攪大件事，令對狗男女無面失業抬唔起頭，要攪到幾大就睇你幾心狠手辣，同埋要有晒相同證據先可以株死佢地。
2個讚
坦白講，問題唔係發生係你度。佢變心，自然會pua你，話你百般差去合理化自己行為，你要清醒，唔好信一個陌生人。
睇你上面講既野，一位媽媽岩岩生完一定會情緒波動，以仔為先，佢咁都有位入去投訴，有幾愛呢個家，幾重視產後媽媽都心裡有數啦，個仔仲要係佢既tim！
第2，你都需要清楚呢家個局勢，自己既位置，從新評估自己既優勢（有個仔，有證據）同劣勢（分到幾多身家，將來會點），基本上有錢有可能，無錢就萬萬不能。趁未撕破臉時要好好幫自己計劃，做定exit plan.
7個讚
我記得聽人講過，如果你原諒一個人，就「完全」咁原諒，唔好講咩「唔知仲信唔信佢好」。
不過而家個男人比隻狐狸精迷到一陣陣，你都應該唔會有機會原諒。
男人要出軌有好多藉口，我老豆當年出軌都對我媽講咗好多傷害佢嘅說話，連當婚時我媽並非處子之身都可以拎嚟講。
你呢個時候應該以靜制動，有錢請個私家偵探收集證據，有晒料先好攤牌。
7個讚
有料，可以選擇攤同唔攤牌，點攤牌，主動權係你手上，突然自己變左上家，佢仲蒙在鼓裡，睇你點玩。
但如果要撕破臉，就無得回頭，唔好抱住「晒冷後佢就識返屋企」既期望，一去到呢個位就代表你都心死，將感情折現，然後move on ga la。
總之收晒料先，用唔用係一回事，睇你心情啦。
7個讚
Tkl24
14
我仲有一刻期望佢只係貪新鮮
加上我努力改變同佢相處溝通方式
令佢覺得其實自己都受重視 受尊重 被愛
佢會覺得始終都係頭家最重要。
但係今日朋友話 你所謂的受重視的自尊心
而家出面果個日日都無限供應 仲溫柔體貼
暫時無誘因佢會回頭
叫我諗清楚自己條底線是咩 要學識止蝕
建議你真係搵出佢幾時變心，幾時同人開始，幾時越軌，有機會比你想像中耐。
即使只有1個月，咁條友心已變，就算回頭，你真係原諒到？你攪清楚所有來龍去脈再講啦。
同意。如果剛剛開始，佢仲有顧忌，未咁快投入，而家講得出唔愛你，就算只係剛開始，都醞釀咗唔短時間，個心已經唔係你度好耐。
唔知佢會唔會同你攤牌，但你真係要有心理準備同埋諗定後路。
知唔知對手係點樣？
如果青春少艾，咁佢就算唔再同呢個，都有可能有下個
睇咗第一段見到個男人突然話唔愛，已經估到一定係有咗第二個。所以唔係你有咩唔好，而係佢變咗心了。
如果暫時佢未知你知，就唔好攤牌住，自己好好諗下之後條路會點。
唔係好識教樓主啲咩，不過你小朋友仲細，返開健康院可以搵姑娘搵人傾下計，佢地可以轉介你去其他專業人士傾傾，例如精神科姑娘、社工嗰啲。
同埋我都諗佢喺你大肚／剛生仔時出軌，會唔會依段時間性方面唔滿足呢？
4個讚
好想攬下你，因為我同你一樣，我同老公由拍拖到結婚已經20+年，有一個7歲嘅小朋友。佢最初失業，我以為佢心情唔好，成日早出晚歸話有part time做，之後過咗半年，佢開始唔返屋企瞓，有一個朝早我係街撞到佢返緊屋企，佢手指上有一隻陌生嘅戒指，我知道佢變心了，嗰晚我問佢，佢話唔愛我，寧願自己一個人，佢唔認自己有女人，之後我好似你咁嘗試相信佢俾空間佢，好好照顧小朋友同屋企。再過咗半年左右，有一晚我搵到一張口供紙，原來佢同人租屋有小小意外所以報警落口供，上面有佢名有電話，我終於搵到證據…個晚同佢傾完，其實我知道我哋冇可能再一齊落去，我唔知點原諒佢，而佢亦都冇挽留我，但因為有小朋友，佢當時5歲左右，我冇即時離婚，勉強一齊住，但同佢零交流，經常都係透過小朋友講嘢，我用咗一段長時間控制同重組自己嘅情緒，已經過咗2年，仲未正式離婚，下個月終於開始分居，順利的話等多年應該可以正式離婚。
我明白你而家一定好亂，想相信佢或者挽留另一半，但其實你一定要諗清楚你自己究竟係唔係可以委屈自己，而家小朋友仲細未有爸爸嘅概念，越早離開唔識珍惜你嘅人可能更好，好多單親家庭都可以好快樂。你自己有冇工作？有冇娘家支持？盡快搵人幫手或者傾下。
有問題可以pm我。共勉之
10個讚