家有高敏兒（之前已經出過post講佢）
情緒比以前進步左，學識自己發完脾氣後say sorry
不過讀書仍然係死穴
已經人在外地，學校只要求每日睇一次書，一星期寫10個生字，每個3次，加2分鐘乘數表練習
喺我眼中學校的要求已經低無再低
但每日叫親佢做功課都係拖字訣，再叫就喊，喺度扭，依依嗯嗯發出各種扭計+不滿的聲音
（每日放學返嚟都有固定時間表，仲要俾佢睇完電視先開始做，但佢總有一百萬個原因拖）
到星期六日情況就更壞（因為無固定時間表）
到底有咩可以提升佢學習動機呢？
佢完全無興趣讀書（而我亦唔期望佢出人頭地，但至少唔好不學無術）
加多句，其實佢唔係唔識做，份功課認真做的話佢可以10分鐘完成，但佢寧願先用20分鐘發左脾氣先
會唔會改做晒先可以睇電視會好啲？
試過，唔得
佢會嘈得仲勁
我同爸爸商量過，佢喺學校做的野都唔少
所以同意佢放學返嚟可以稍作休息，睇陣電視再做
休息可以做其他野，唔洗睇電視
認真同佢傾計，俾佢知道點解要讀書，唔係為咗返學交功課，唔係為咗父母，係為佢自己未來而努力學習。設定短期目標知道學習知識可以幫自己，例如識字先可以打機，或者俾佢有動力學習目標，完成功課讀書先可以帶佢出去遠啲嘅地方玩之類。
Um…有同佢傾過
但佢仍然唔係好理解點解要讀書
佢頭腦一片空白咁（最激氣係佢覺得自己識好多野，到我問到佢口啞啞，就發脾氣喊）
而家啲細路睇死你一定養佢，有食有著有玩有自己房，唔使努力
係咪佢性格專注力時間比較短？一次過要佢坐低一個鐘做好份功課，佢覺得好吃力，做唔到又要俾人鬧，所以搞到每日拉鋸咁？
試吓將做功課/睇電視玩嘅時間斬開8節，增加佢成功感？即係本來時間表一個鐘頭睇電視，一個鐘頭做功課，
變成第一節係5分鐘功課5分鐘電視，第二節係8分鐘功課8分鐘電視，第三節係10分鐘功課10分鐘電視，如此類推。
然後叫佢自訂返第一節5分鐘會完成到邊一部份 (例如寫到一個生字)，第二節係可以寫到兩個字，第三節係檢查第一同第二節嘅嘢有冇錯。每日做完功課之後檢討吓佢呢個plan實行成點，聽日又可以點樣plan法。
等佢享受到做功課同讀書嘅樂趣，先至慢慢增加每一節嘅時間。
加油，對付唔同嘅小朋友用唔同方法
(PS: 我細個好憎做功課，都係因為專注力問題，又係做做吓會走咗去俾人鬧嗰啲，不過我大個成績好好，畢業嘅大學都好好)
唔好咁講
我相信呢度好多人細個讀書都唔係勁，
每個年代都有唔同讀書能力或者性格嘅細路。
就係因為佢哋係細路，先要大人教導。
唔係個個天生都識自己自動自覺讀書。
我當年都係遇到啱嘅大人先搵到學習嘅意義。
希望個個細路都咁好彩啦。
佢份生字功課一星期交一次，總共要寫30個生字，係30個咋，我俾佢分開幾日寫，每次10個都係拖
我已經唔敢叫佢一口氣做曬
佢唔係做唔到，而係唔想做，無動力做
試過佢心情好，係可以一口氣寫曬30個
做練習時間同睇電視時間掛鈎可能係一個方法，我又試試，多謝你
其實佢係咪覺得d功課好無聊好悶
你有冇留意佢係咪算聰明學嘢好快嗰隻，如果你同佢講一次佢會好快識嗰啲？
絕對唔係，用「拉牛上樹」嚟形容就差不多
如果佢有少少小聰明我都無咁勞氣
就係又無小聰明，但又唔付出努力
我可以繼續拉佢，但要拉到幾時呢？
Year 5? Year 7?定再大啲？
有時真係想把心一橫咩都唔理，等佢受下教訓
不過呢度的老師應該唔會理佢有無交
其實咁樣做先最好，自己承擔後果，唔好每次都提或幫佢做，冇意思，讀書係為佢自己，唔係為其他人。我小朋友由K2開始我已經一直咁同佢講，到而家小一，佢知道自己要做功課，做錯唔緊要，知道自己有責任完成先係最重要。
做父母唔係幫佢做功課就算，係要教佢明白某啲道理，呢樣唔係一朝一夕嘅事，係要有耐性持續咁去教導，講一次唔明就不停重重複複咁，總有一天佢明白，辛苦啲都值得。加油！
我小朋友都同你情況差不多，但細一年功課量都近似，我地10個生字每個5次, 加每天reading, 和另外一份可能math
我都認為放學返黎relax一陣先做功課，我地通常就食下野或玩玩具，然後做功課，咁佢唔肯做我由佢但個日就冇電視睇，佢會扭成個鐘，我由佢扭亦堅持冇電視，咁呢段時間係難頂但要忍，咁第二日佢肯做功課(其實已經冇限loop過好多次，唔係真係扭一日就成功，好似放完term break第一日放學返黎又會唔肯做，但慢慢會愈來愈好)
然後最初每次做的量我會俾好少，做完我會講d好positive 的說話, 例如幾快做完，d功課好容易等等令佢唔討厭功課，咁慢慢先加做多d 又氹下早d做哂之後咪唔洗做
我仲會做一次功課有一個stickers，咁夠某個數的stickers 就有其他rewards
我由九月開學到宜家都係用呢個方法，係比較漫長和開頭大人都辛苦，但堅持功課一定要做左先有佢想要的野，過程大人都要冷靜唔好太硬，軟硬態度都要有，要令小朋友覺得做功課唔係一件討厭的事，亦可換取佢想要的東西，呢個係第一步
我都會好似樓上d comments 同小朋友講點解要讀書，雖然講完唔會增加做功課動力，佢亦唔明，但都keep住講
每個小朋友都唔同，我的方法希望俾你參考下
好明顯係食住你哋上，因為佢知發脾氣就可以ko你哋 有冇試過由得佢發脾氣唔理佢，直至佢發完脾氣先同佢傾返？因為一發脾氣，個人已經block哂所有嘢，除非解決到脾氣觸發點，否則係溝通唔到。仲有對付哩種一玩就收唔到掣嘅小朋友，絕對唔可以響佢玩緊時stop佢，或別係打緊機嗰吓，會癲得好犀利！
我唔知我建議對你哋行咪行得通，因為父母及其他同住家人都要配合，爸爸未必肯，同埋執行過程會好困難，但你可以參考吓！
你試吓早一日通知佢，最好係星期日朝早，揀一個佢可以好集中同到你溝通、而且情緒平靜嘅時段先好開始同佢講，講嘅過程中你都要保持平心靜氣！你必須先表達出好明白佢感受，同埋當中會有D指令俾佢，記住要用positive指令，而唔好negative ，例如可以講「你可以睇電視」，避免「我唔准你睇電視、冇得睇」之類。過程中唔好提及佢曾做過嘅負面行為，例如喊、掟嘢之類。（題外話，唔好提發脾氣三個字，因為發脾氣唔係一個實在行為，細路其實唔知發脾氣即係乜嘢）
大概咁講…爸媽知道你每日要返學、放學之後又要做功課，都係好攰嘅事，爸媽見到你好辛苦，所以我哋准你放學返到屋企睇XX分鐘電視（因為set咗時間表，所以最好表明佢原本可以睇幾耐電視），然後先開始做功課，爸媽一直以為咁樣會令你快D完成功課。不過爸媽觀察咗你好耐，發現目前准你睇完電視先做功課哩個方案，睇嚟唔行得通，因為而家你D功課好晏都未做完，仲有爸媽要成晚係咁催你，仲要好大鬧你，你又唔開心，我哋又辛苦。所以爸媽決定由聽日開始，你放學返屋企之後，個電視機將會一直保持關閉狀態！你可以自己稍為唞吓，或者食個茶點就開始做功課。如果你可以響5:00pm（set個合理時間）前做好晒功課（要強調係做好哂），咁我哋就會開返電視。但如果你嗰日5:00都仲未做好哂功課？Sorry，就算5:01做完都好，嗰一晚我哋都唔會再開著個電視嘅，而爸媽都會成晚陪你一齊唔睇！爸媽嘅決定係希望你快D培養到一份責任感，因為你係學生，做功課係你責任！好似爸媽要對你負責任一樣，返工幾辛苦都好，我哋都願意每日返工賺錢養你，因為我哋有責任養大你，令你將來有能力自己養自己！不過俾你睇電視絕對唔係我哋責任，准你睇電視嘅前提係令你培養到責任感，令你有進步，變得更聰明！但如果睇咗電視反而令你變得蠢咗，搞唔清楚邊D事情先至係重要，例如唔知到學生應該要做功課，咁個電視就應該一直保持關閉，因為一開著咗佢就會害你，必要時我哋甚至會掉咗佢！爸媽雖然都好鍾意睇電視，但我哋唔睇都得嘅，因為我哋識分邊D事情係重要，一定要做先，我哋都鍾意玩同睇電視，但我哋明白哩D唔係必須，當有更重要嘅事一定要做咗先，我哋係可以唔玩嘅，當然係有小小唔開心，但我哋知道可以遲D都可以玩。例如我唔會因為掛要睇電視而唔去煮飯，因為我知道咁就會全部都冇飯食，同埋我煮完都可以睇㗎嘛。爸爸亦唔會因為掛住睇電視而唔返工，因為佢知道唔返工就冇錢交電費，咁就會冇電開電視睇！只有蠢豬先為咗貪睇多一陣間電視，搞到已後都冇電視睇。聰明嘅學生先知道快快做好哂功課嘅好處，咁先會有更多時間做自己想做嘅嘢…
後面訓話唔好拖咁耐，佢冇乜耐性！你最後簡單重申返每日5點前做完功課就開電視，過咗5點都未做完就全晚都唔開，聽日開始執行！佢可能追問你點解咁，亦可能會猛咁問你如果點點點，甚至可能會提出反建議，全部唔洗正面回應佢，只需要好官腔咁講…爸媽觀察咗你好耐，經過長時間討論先作出哩個決定，我哋覺得咁樣會培養到你責任感，令你快D做哂功課，等你有更多時都玩，唔通你唔鍾意多D時間玩咩？不過我哋係會定期做檢討嘅，如果見到你識自動自覺，好快做哂功課，又識得自己溫書，咁我哋就知道你識分輕重，個人又有責任感，即係叻仔有進步，到時我哋會有驚喜送俾你，咩驚喜？你到時咪知…記住你只係要將個計劃通知佢，而唔係問准佢，所以唔好同佢磨咁耐，響佢跳制之前好講完，同佢confirm一次就好放佢去玩！
由第二日開始，你哋真係要狠心執行，set個鬧鐘，鬧鐘響之前做哂就開電視，否則全晚都唔開，而你哋都要一齊唔睇，想辦法令到個電視開唔到！佢好肯定先同你講數，後俾喊俾你睇，但記住你哋一定要管好自己情緒先，唔好同佢開拖！佢會有負面說話及行為，但除非佢自殘，否則唔好回應佢，不過唔係完全漠視佢，亦唔好講「仲唔去做功課、仲喊」之類說話鬧佢，應該清楚指示「做功課啦，做完就可以xxx」。如果佢有好行為，你要表明因為佢哩個好行為而稱讃佢，但就唔好因為咁而俾佢打機睇電視。萬一佢鬧足一晚，結果都冇做完功課就上床瞓，咁就由得佢，等第二日返學再同老師講，睇吓點樣迫佢做完份功課。
將來你哋決定放寬俾返多D自由佢，前提係因為佢有改善到，但都唔好俾佢睇完電視先做功課，因為佢自制能力唔好！其實佢係醒目仔，所以先識用扭計控制你哋，你哋要俾佢知道扭計冇用，同埋知道扭計只係搵自己笨，會少咗時間玩。但你哋要堅持住囉，因為佢會好頑強吓，唔係短期搞得佢掂，同埋會有一段時間反反覆覆，但之後佢會培養到一個好習慣。如果你哋冇信心keep住執行到，咁就唔好開始，因為俾佢贏咗，之後會更難控制佢。
至於你話要佢明白自己有責任讀書做功課，冇用㗎，就算正常小朋友，咁細個根本未完全被社會化，只可以追求比較短視回報，例如做乖仔或者勤力，讓自己受大人稱讚，一係就好似你小朋友咁扭完即刻有收穫。起碼到高小之後，到時會更大程度受同儕及老師影響，醒覺自己要面對社會，到時先開始意識咩係責任，更何況你小朋友可能係SEN！
唔好意思，我唔係話你
我只係慨嘆，以前屋企窮，邊有得閒去諗學習意義樂趣？見到阿爸阿媽捱，唯一可以做係生性讀書，我讀書叻每年考第一，阿爸阿媽個種會心微笑係最好禮物。我陰功而家啲父母咁好，又多物質，反而仔女唔珍惜
我都讚下自己好生性，阿爸問我要乜禮物我都只係話要買本書/暑期作業，痴嘅
你小朋友應該和我小朋友一樣year 3