2022年如果套戲有姜濤、Anson Lo又或者Edan任何一個，票房過千萬係必然嘅事，而如果呢個趨勢可以持續，咁《盜月者》票房應該可以輕易咁突破5000萬，不過由於一連串事件，令MIRROR成員嘅作品，往往會產生兩極化嘅反應：一、要睇幾次先夠；二、唔理套戲好唔好睇都一定要抵制。
咁有冇中立嘅觀眾，又或者因為張繼聰、白只而入場睇《盜月者》？應該會有，但相信唔多，可是如果將所有焦點都全部放喺姜濤、Anson Lo同Edan，咁對佢哋嘅成長係唔係一件好事？又或者會唔會對張繼聰同白只唔公平？
事實上，MIRROR嘅經理人公司有時真係用得12子太盡，所以就算一啲唔合格嘅作品都俾佢哋接，最後好容易被冠上「濫拍」嘅惡名，同時會令好似《命案》、《七月返歸》呢啲好嘅作品被觀眾所忽略。
同樣，如果觀眾有MIRROR就抵制，咁唔單止係對人唔對事，而且會失去咗欣賞白只同張繼聰精彩演出嘅機會，亦白廢咗佢哋一番嘅心血，咁對香港電影業嚟講，絕對唔健康。
更重要嘅係，香港電影業真係經歷咗一段幾長時間嘅青黃不接嘅時間，睇吓聖誕檔期又係要靠梁朝偉同劉德華撐住，問題係佢哋兩個回歸前已經撐住香港電影市場，仲要佢哋撐幾耐？
因此MIRROR嘅出現，至少可以為香港嘅電影市場，帶嚟一啲新血，如果唔係可能十年後大家都仲係睇緊「梁劉配」，到時香港電影業就真係沒落！
而且平心而論，姜濤、Anson Lo同Edan喺《盜月者》嘅演出，絕對比2022年上映嘅作品成熟好多，同時佢哋都係《盜月者》有一啲突破，例如姜濤唔介意做反派、Anson Lo唔介意個樣殘，至於Edan嘅戲路一向廣泛，呢套戲雖然唔算有大突破，但演出真係越嚟越穩打穩扎。
當然，對比張繼聰同白只，MIRROR三子仍然有好大嘅進步空間，但人哋畢竟係演藝畢業生，演戲經驗多咁多，演出層次一定高啲，不過唔合作多啲又點會進步？正如Edan同鄭中基演父子演過兩次，《死屍死時四十四》嘅默契一定比《闔家辣》好，Edan嘅演出亦都更立體！
不過《盜月者》絕對有值得批評嘅地方，就係故仔明明開得好，但尾段出現失控同草草了事嘅情況，同時亦係呢位導演最常犯嘅錯誤，最終係浪費咗一眾演員嘅努力，因為就算佢哋點努力都好，但套戲埋尾埋得唔好，最終難免會令觀眾有啲失落。
因此，無論姜濤、Anson Lo、Edan，又或者Lokman、AK同阿Jer，甚至乎「大表波」未來嘅演出，其實都值得期待，但問題係如果經理人繼續唔睇清楚啲劇本，繼續當佢哋係搖錢樹，咩戲都幫佢哋接，咁只會令佢哋過度透支而吃力不討好！
當然，《盜月者》唔係爛片，甚至乎頭60分鐘其實有好高嘅欣賞價值，只係如果可以尾嘅40分鐘交代得好啲，咁《盜月者》就可以變成姜濤、Anson Lo同Edan嘅代表作，但依家⋯⋯只好期待下一套作品可以好頭好尾！
#盜月者有啲頭重尾輕
我反而覺得港產片無賣點一定要入戲院睇，唔同荷里活大製作，係戲院睇先有feel。港產片要用偶像谷票房先有票房保證。公司marketing都會咁sell。咁偶像呢啲一定有人好鍾意，有人唔鍾意。
正常人俾錢去睇戲係想睇好戲，唔會理你今次係咪有進步，有努力。
你寫既角度係從fans觀點出發唔係由消費者角度出發。
不過我覺得最大問題都係跟本港產片啲題材唔吸引，對我黎講，我只會係賀歲片先有機會睇港產片，其他時間我唔會有興趣睇。我覺得反而唔係好關邊個演員做。當然普通消費者見到樣樣都係mirror，一定會審美疲勞。等於個個人做開某個角色，觀眾已經有既定印象。
我覺得係fans先會覺得成功唔成功都係因為個偶像。我覺得問題係個題材根本就唔吸引。不喜勿插。
6個讚
其實港產片呢十年嘅質素同題材好過以前全盛時期，可能我鍾意導演有心咁探討社會議題，演員都不錯，仲有soundtrack都好有水準，你會feel到係用心拍，唔係八十年代九十年代粗製濫造嘅商業片
fandom呢我都會睇，只要唔好太爛
有港產片我不論喺邊都會入戲院睇，只要佢上，如果好睇會睇多次
呢篇文章好fans 向，其實睇落有啲尷尬
只能講mirror 能唔能夠走下來，第一係睇公司安排、第二係睇fans 。公司係22 年既失敗PR ，嚴重影響鏡仔名聲，而fans 不斷咁hardsell 同內鬥，都令人好煩厭。呢兩個因素，都令人唔想睇佢哋
6個讚
睇港產片係想支持香港電影，完全唔係純為偶像而睇
雖然我係糖，姜之前兩套我都冇入場睇＇第一套太fans向，上一套係台灣片
今次呢套我會去睇，因為口碑幾好，即使唔係鏡粉都話好睇
3個讚
近年啲非大制作港產片都拍得幾有水準，新演員亦做得好好
上面篇文我最認同係呢段：
以前我比較少睇港產片，反而係呢幾年有真實好評都會去睇，盡一分力去支持港產片
新生代演員呢幾個我幾鍾意
劉俊謙
楊偲泳
談善言
柯煒林
近年不少港產非合拍片都拍得好用心
1個讚
題材係多左，但劇本同拍攝仲係好多沙石，
如果題材劇本演員整體去計的話，我會揀逆流大叔 一秒拳王 紅van
1個讚
我個人絕對係想撐香港電影, 我鐘意鏡, 但絕對未到"粉"嘅level…
其實係呢幾年既怪現象, 我都鍾意鏡和姜濤, 但未至於好似其他人
粉絲, 不停入場睇刷 3.4.5.6 次咁睇或者好似啲人咁包場請人睇.
我都有去睇盜月者套戲係好睇無冷場, 老公陪我睇佢都知姜濤和
燈神係邊個佢都話套戲好睇.
Me too
從不幾刷咁睇，亦冇參與過包場
靠fans 3 4 5…刷同不停謝票刷票房，呢個現象好唔健康
1個讚
我最討厭這種電影，簡直浪費資源，
這類問題睇新聞都可以，又或者 時事節目已經可以，仲真實啲。
1個讚
係，同埋我覺得香港觀眾都係難please既。同做咩都鐘意一窩蜂。
包場都算正常
但N刷又或者齋買飛唔入場我都覺得唔係咁好
都係嘅，有啲包場為慈善幾有意思，好似包場俾視障人士睇有口述嘅電影