本人30出頭，同老公結婚6年左右，暫未有小朋友。我哋都係大家嘅初戀，由學生時期拍拖到結婚，都一齊咗十幾年。
佢所有嘢對我幾好，專一、唔會搞三搞四，放工即回家、上進、有事業心，可能性格有啲孤僻內向關係，一向冇乜朋友，除咗同事之外都冇乜frd。不過，唯一最大缺點就係脾氣好臭……
佢一直都唔係話脾氣好好嗰啲人，開頭拍拖熱戀期未表露出嚟，去到讀大學時開始出現強大嘅控制慾，唔俾我做呢樣唔準我做嗰樣，當中大家都成日嘈，嗌交當飯食！好嘞，到後嚟結咗婚就冇咁強控制慾，因覺得私有化咗，但係脾氣依舊，五十年不變！
婚後成日因為芝麻綠豆嘅事嘈，同佢‘理論’多幾句佢幾句會忟憎、跟住發好大脾氣，最激烈係會亂掉嘢，成個人失哂控！咁多年都係咁，一成不變！
試過多次喺街上，甚至旅行時嘈交會掉低我，自己走咗去，不斷call佢搵佢嘅都係我，認低威嘅都係我，氹番佢嘅都係我（當然佢都有氹過我，但冷暴力嚟講佢敢認第二冇人敢認第一!)
其實仲有好多好多事都可挑起佢情緒，唔啱聽駁多幾句就嚟料反檯咁制，成個人都係炸彈火藥，一唔小心就會踩地雷，講多幾句又錯，日日都要小心翼翼好辛苦…
….而家真係好困擾，有無sis 都有類似經驗，究竟要點樣先可以同呢啲人相處落去….?我真係好攰…
1個讚
我老豆係呢類人，成日都唔明點解我阿媽要忍佢。
我都唔識同佢相處，但你千祈唔好有仔女，小朋友要承受父親嘅脾氣會好驚
6個讚
同我老公好似
連我d朋友都覺得佢成日歪理當道理
同埋成日將自己應付嘅責任推咗俾其他人
我大住個肚，佢都可以鬧到我喊，而佢唔知點解我喊
不過我哋有見輔導，大家都有慢慢改變
但到而家由拍拖到結婚就快十年
我都仲未知佢幾時會跳掣，亦唔知自己幾時會踩咗落個氹度激嬲佢
我都覺得好辛苦，唯有同自己講今世嚟還債，或者鬼遮眼先嫁俾佢，雖然咁好呀Q，但咁樣自己會好過d
1個讚
以前細個原生家庭都係咁，當阿爸情緒唔好嗰陣又會因為好小事就發脾氣，嚇到我哋好驚。
嗰陣已經諗，希望大個唔好嫁著呢啲老公，可惜估唔到最後都係遇到呢類人，整定！
1個讚
身同感受…歪理當道理，仲覺得自己一定啱哂，一定係對方錯先！
有時覺得佢幾冷血，不單唔明白我感受，仲可以變本加厲，脾氣愈發愈大！究竟自己同咗個咩人一齊，仲要咁耐….跳掣係隨時隨地會發生，每日都同個計時炸彈一齊，唉…唔知輔導幫唔幫到我哋，只怕再咁落去好快分開…我真係再忍受唔到…
我老公有時脾氣都臭，但無你講既咁誇張。係有時小小事就會搞到佢心情唔好。一開始拍拖個陣我都會氹佢，但後尾發現唔想就佢。佢發脾氣個陣我就發返更大既脾氣，咁我老公就會收聲。然後大家都冷靜返個陣就無事。
我老豆都係控制狂
一唔岩佢心水就發脾氣 鬧人搵發泄
語氣好重 好難聽
日日家嘈屋閉
所以我大學畢業冇耐就搬左出去
傾係冇用
佢唔會聽
全世界得佢岩晒
但撇除性格問題 佢係好照顧屋企
得我媽先可以咁多年唔走
但就當我係情緒垃圾桶
聽佢呻左幾十年
見到咁樣
細個就同自己講搵老公一定唔可以好似佢咁樣
8個讚
同佢喺屋企開枝酒，傾吓童年嘅成長
當時佢係咪有d創傷係來自佢父母嘅管教方式
幫佢認識自己情緒，重新學點接納自己可以嬲，嬲可以點，然後放低
例如教佢嬲嘅時候，點停一停冷靜，或者揸實拳頭而唔係掉嘢。
我發現好多人嬲嘅時候失控，係同童年有關，例如細個喊就比人叫收聲
3個讚
氹咗十幾年，好攰了，我都有同你一樣發更大脾氣，以前就壓制到佢，識收聲，但而家唔得了，佢只會同我‘玩’落去
”沒有最癲，只有更癲”
佢老豆都係咁，咪照板煮碗囉，加上佢細個嘅管教好嚴，唔俾呢樣唔俾嗰樣，我已經同佢講話係童年嘅成長令到佢而家咁，可惜我講係冇用，開心見誠傾過N次都係咁！之後隔無耐唔知邊日我多口講多幾句駁佢，又會火山爆發
！
我之後會尋求協助，真係搞唔掂投降喇！
我性格就係直腸直肚、有咩都講出嚟嘅人，唔想之後成世人都要每日小心講嘢、避免踩中佢底線！
佢叫我改咗直腸直肚嘅性格，有咩當下想講都收埋喺心度，咁大家就唔會嘈交，而佢就唔會發脾氣。
佢都CLS！咩歪理嚟？重點係佢講到唔覺得自己嘅臭脾氣有問題
話所有嘢都係我挑釁佢在先，bull shit！
其實呢句佢自己都好啱用
的確有時過左道氣先拎返出嚟講會少啲拗撬，
但如果乜都收埋係心度，我唸個啲叫做朋友，唔係情人。
3個讚
如果樓主有經濟能力，唔係靠老公開飯嗰隻，真係無必要忍佢。男人提供唔到經濟價值，又提供唔到情緒價值，要嚟做乜？
1個讚
我以前有個ex又係咁，行咗年幾兩年，都係要分開
果陣仲係熱戀，佢啲臭皮氣一嚟就放低姿態去氹佢（兩個人喺屋企果陣會氹講話佢你唔好嬲啦，我錫返你啦，錫到你開心返為止啦），佢順返就會揾機會同佢講其實你咁樣發脾氣我真係會唔開心，通常佢會好兩三星期、之後又變返原本咁
好彩分咗手
其實我老公都唔係好讀到人嘅情緒
佢明知我陀b陀得唔穩，都可以因為佢返工有壓力而向我發脾氣，搞到我情緒波動到肚痛流血，但佢事後又會知自己做錯咗
印象中佢自己跳掣發我脾氣，我冇點氹佢
因為我自己都硬頸，唔明點解要氹一個滿口歪理嘅人
見輔導都要睇下你另一半係唔係真心想去
如果佢去到但唔願講嘢分享，同左耳入右耳出，我就覺得冇乜用
不過我覺得可以見下先，我經產科轉介喺家庭綜合服務中心見，所以免費
不過我諗你有需要，可以去家庭綜合服務中心查詢下
1個讚
我完全明白樓主，因為我老公都係呢種人。
我哋結咗婚10 年，有2 個小朋友，我既經驗話你知，如果你想以後有返正常既人生，就離婚吧，畢竟你冇小朋友，離婚真係唔大影響。但如果你想繼續同佢一齊，你最好唔好有小朋友。
我老公專一、有上進心，但性格好有缺陷，好自我中心，佢唔識愛人同體諒人，好容易就燥底，夏天出街會燥底，背囊重d 會燥底，環境迫坐得唔舒服會燥底，教2 個小朋友教左幾次都唔識會隨手飛哂d 書落地，會扔張小童櫈落地，會開口話「又錯la 仆街」「CLS 又錯」「你係咪弱智！」「垃圾！」呢d 好傷害性既說話，我會忍唔住同佢係小朋友面前開火，小朋友由驚到喊到而家好似對爸爸發脾氣已經麻木左，佢永遠覺得自己岩哂，我永遠唔夠佢講，我覺得佢係有燥狂症，個人亦好負面，永遠睇自己冇既野日日唔開心。
我知道原生家庭影響對佢好大，佢小時候都係咁樣成長，我同佢傾左好多好多次，佢唔承認自己有問題，所以有句說話真係好岩，「江山易改，本性難移」，唔好以為用愛可以改變到佢，最後改變唔到老公之餘仲會比佢既負能量影響埋，我已經當佢係一個有情緒病既人咁看待，唔會再同佢講任何道理，因為唔會work, 佢一發癲我就ignore 佢， 再同自己講佢有病，我個心就會舒服d.
3個讚
嘩， 我睇你打既野， 完全同我情況一樣， 我以前唔覺得佢係咁， 可能呢兩年相處耐左/疫情,大家見既時間多左/ 佢覺得我老左 ， 走唔甩 (結婚14年), 佢唔再隱藏， 原形畢露， 我而家都諗緊點算， 我老公仲要加埋唔識照顧家庭， 即係煲水都唔識個D, 我諗緊我日後點算, 以前我唔覺得有問題，因為 我覺得我自己照顧到自己咪得囉， 但而家呢， 我會諗老左佢有事我識照顧佢， 但到我如果有事, 佢唔識照顧我， 咁我老左咪好慘？ 呢個問題呢排成日係我個腦度出現，我都唔知點算