75歲秦煌 自爆有細30年「情人知己」
幫女方家鄉湖南置業
視繼女如己出
“我欣賞佢忠實可靠
會照顧我起居飲食
佢個女8歲
我希望長命 可以供到佢讀大學”
75歲 #秦煌，移居深圳21年，四年前因為返TVB拍劇遇上疫情及封關，加上肥胖致腰骨出現問題影響行動，故留港至今。
晚年的秦煌獨居香港，生活十分寂寞。亡妻是前商台DJ莫佩雯，二人育有四名子女，但因婚姻生活不如意，妻子曾六度提出離婚，秦煌卻因子女緣故，拒絕離婚要求，只於廿一年前開始定居深圳，過著分居生活，他坦言與子女關係疏離。
日前他接受傳媒訪問，自爆在內地定居後，認識一位細他30年的湖南女子，發展至知己關係。今日《娛壹》亦向秦煌叔了解，他說知己Mary今年40多歲，是他搬到深圳後認識，當時對方20歲，幫他打理家頭細務，讓獨居的他有「住家飯」食。有碗話碗的秦煌，還說當年住深圳，與李龍基為鄰居，對方跟一位叫「霞女」的女孩同居。
秦煌謂，起初對內地女人有防範，但相處近廿年，發現Mary很忠誠，「以前我返港拍劇，放低啲錢俾佢買餸煮飯，佢唔會大使，我觀察咗好耐，我好欣賞佢呢份誠實可靠。」
知己Mary的父母，早年更從湖南到深圳，入住秦煌家兩星期，問他是否見「家長」，秦煌說亡妻離世後，他不打算再婚，「我有同佢講，我唔會再結婚。佢父母都有叫佢相睇，但佢都一一拒絕。」
知己曾向他提出想生育，秦煌續道︰「佢35歲嗰年，同我坐低好認真咁傾一次，佢話年紀大，想喺36歲之前生小朋友，否則變高齡產婦。我話唔想生，但佢可以用佢方法生小朋友。」有共識後，他讓Mary回家鄉湖南生活。
之後Mary懷孕，產後帶著11個月大的女兒回到深圳與秦煌一起生活。問他知不知女孩的生父是誰，秦煌說︰「我冇過問，佢亦無講。個女亦唔知生父係邊個。我當呢個女如己出，好錫佢，佢好聰明，好叻女。」他說「女兒」今年8歲，在內地就讀小三。
至於「小兒」如何稱呼她，是否叫秦煌做「爸爸」，他謂︰「唔係，佢叫我花名。(記︰係咩名？) 我一時間唔記得，但唔係叫爸爸。」75歲秦煌不諱言，離巢TVB後收入減少，現靠著當年出售深圳物業，套現得來的積蓄生活，這些年亦偶爾接拍外埠電影，生活總算僅僅應付過來。但一把年紀的他，仍想為這位「繼女」供書教學，「我希望長命啲，可以供到佢讀大學。」或許，他想從這「繼女」身上，彌補與親生子女的疏離缺口。
雖然沒給知己名份，但生活上秦煌仍一盡伴侶責任，數年前他為Mary於家鄉湖南置業，「佢話想買樓，我俾咗幾十萬佢買間屋。兩母女無住深圳，隨著我留港幾年返唔到上去，我唔想白交租，所以深圳間屋退咗租，佢同個女就返湖南住。之後我都想喺湖南買多層樓，留畀佢個『女』。」
與四子女親情淡薄，以致年老無依，他怪的只是自己，「當年我覺得供給晒佢哋物質上嘅嘢，就叫做一個好爸爸，我無放太多時間喺家庭，一係拍戲，一係工餘時候見朋友、潛水、踢波，所以唔係佢哋嘅錯。」至於子女知否他有知己，及一個視如己出的「女兒」，秦煌說︰「我冇同佢哋講。」
#娛壹
