我小朋友同你小朋友好似
我可以好肯定咁講、一定唔會有咁嘅效果
佢只會更加唔開心
尤其小朋友鍾意呢間學校、更加唔應該轉
1個讚
請問可唔可以分享你會點幫小朋友建立好點自律性同信心？
其實我覺得學校佔既份數唔會多，最尾小朋友都係靠自己教。我成日提自己要多鼓勵，但每次我俾哂時間機會佢，佢都係得過且過，我就會火起，亦會衝口而出唔好聽既說話
我小朋友表現都唔係好好
我自己做嘅嘢係、每日有時間表、盡量引導佢發展興趣、每日會做夠運動同早睡早起、控制佢玩電子產品時間
坊間有啲「執行功能」課程、有平有貴、你可以去聽下，睇下書、或者會有少少啟發
因為佢最大問題係做乜都冇動力，所有野都得過且過
但我小朋友呢間高小，我覺得佢個人有少少開竅、起碼放學做完功課、會叫我幫佢溫書，食完晚會問可唔可以一齊睇書
音樂我比佢學過琴同打鼓、不過去到三年級都放棄咗、因為佢真係冇天份同冇興趣
運動就遊水同打波、原本上團體班、但佢太懶散、又唔專心 、最後我揾教練一對一教、起碼返學同同學玩、猜到幾下波
我覺得每個小朋友開竅時間有先後，或者呢刻佢同同年甚至細一兩年比係有落後、但比啲時間、或者大到某一個位、就會突然間爆發追得好快
2個讚
建立自信心，係先要幫助佢達到自己目標同要求，而唔係家長/學校嘅要求，如果係女仔3年級唔細應該可以傾下，男仔可能有啲困難但都不妨一試。
例如：幾多點要做乜，係咪佢自己想？如果係佢想，但又做唔到，原來時間要用多啲先得，咁可能要改下個時間表，而唔好第日又繼續做唔到，媽咪失望嘅表情原來對小朋友打擊都唔細架，呢樣係我喺我3歲嘅小朋友身上學返黎嘅。
得幾歲人仔，日日都係達標達標，就算係大人都慘架。
我明白，身處香港好多野無得咁自由控制，但係你都諗住移民，按道理你哋會比其他家庭更有空間去調節時間表。
如果小朋友完成唔到目標，即使原因只係懶，但感受到媽咪係會幫助佢，而唔係話佢，成件事都會唔同架。
加油！
1個讚
坦白講呢d都係小朋友通病，自己唔上心，等人餵。
1+2. 我既方法係同佢一齊列晒一日時間表，按鐘操課。如果做唔到，skip jor, 無印仔。如果一日佢訂立既tasks全做到，有個大印，可以結算換野。
到大小小，我只list out一日要完成既task, 佢自己看著辦，自己安排時間，再每日結算。你唔駛勞氣，每日day end review 點解做到／做唔到, 你可以有d hints.
咁做到就有印，反之則無。佢無印都唔care的話，應該因為獎品唔吸引，或中間有野kick住，例如放唔夠電，或太多tasks, 要幫下佢sort out。
- 罰則執行得唔夠徹底。佢第一次求情成功，你應該要講清楚繼續學落去要點付出，去到邊個位唔努力就收，然後就真係收，唔好比佢拖。
有時餓下佢，可能效果更好。
overall, 小朋友講一套做一套可能呀媽太心軟，軟硬兼施係set up 左既rules 要跟，呢個係硬，軟個part係幫佢sort out 佢有困難既部份，例如佢今日想先畫畫後做功課，flexible d 比佢滿足一下畫畫慾望，再要求返佢快趣做好功課，佢做到就有下次，做唔到就無下次lor, 人講承信ga ma, 做唔到就信唔過lor. 但絕對唔係放任佢，佢交唔到貨就算。
2個讚
如果小朋友自己講得出好鐘意現校，你夾硬「為佢好」幫佢轉，喺心理上真係好大影響。小朋友成長學習/成績係只係其中一個面向，佢情緒、心理、社交能力都好重要，講真，如果你嚟緊去外國，我覺得後者可能更重要，因為冇香港咁純粹睇重公開試成績。
同埋夾硬轉好可能會破壞親子關係。
又，暫時似乎只係知道佢學習動機弱，但未搵到背後嘅原因，我覺得呢個先係重點。佢係未搵到學習嘅興趣？啲嘢太難/太淺？定因為乜嘢？
如果冇搵到背後原因，淨係諗住用轉校嚟靠學校「谷」，其實都未必幫到佢。
2個讚
其實呢，學習動機有分內在同外在，大部分家長只係集中用外在力量逼佢地去學習，例如賞同罰，好少有針對內在學習動機，但內在學習動機先係長遠，尤其上到中學。建議你可以去參考下專家點講。一味死逼爛逼，小心小朋友同你既情緒最終出事。
4個讚
明白，我仔仔應該大你小朋友一年，我一家2022年6月到，仔插班year 3，因為英國學校，小朋友計年齡係由9月1至第二年嘅8月31，所以數字上我仔喺跳咗一級（如果香港計佢而家4年級，而家英國就year 5）。
其實我提出呢個問題，係因為驚小朋友過到嚟英國一年year 6，然後year 7又要再適應，對小朋友可能會有壓力，因為好快又要再轉中學。
我仔仔當初返學（普通公立學校）都好唔慣，佢話全部人講嘢都好快佢聽唔明，佢唔開心，仲喊，有時老師會話佢慢半拍，去到year 4中段已經追到聽同講，學校無乜功課，但會要求學生不斷reading，我仔由最初攞啲超簡單嘅書，到而家可以攞小說返嚟睇，同埋佢哋啲數都唔算太難，仔話夠用。
樓主仔仔嘅情況，我會覺得唔好轉校，同埋其實三年級仲好細，要佢有自律性真係有難度，解難反而可以從日常生活著手，assign啲簡單家務比佢，一齊做，當有難處時引導佢思考。
加油媽媽
2個讚
我睇哂各位媽媽留言同意見，大家都指出左我既盲點。我唔應該硬逼小朋友，亦唔應該用轉校逃避，要解決小朋友內在問題，改善自己既心軟同方式。
多謝各位媽媽!
2個讚
該主題在最後一個回覆創建後180天后自動關閉。不再允許新的回覆。