本身婚姻已經唔開心，仲要出軌，無謂屈就自己，支持你離婚。唔好諗住為個仔而唔離婚，父母關係差對小朋友嚟講更痛苦。
慢慢嚟，部署下點做，搵社工/社福機構傾下？單親排公屋好似會快啲？請唔到工人可以試搵社區保姆。佢出軌離婚要比贍養費你，盡量爭取。可能唔係一時三刻可以解決晒所有事情，有心理準備要逐步逐步處理，但我唔會想喺一段假嘅婚姻入面一直傷害自己。況且，點知之後唔會遇到更好的人呢？
過程唔容易，身邊有冇信得過嘅朋友可以幫到你？屋企人有冇人幫到你？
小朋友應該返緊幼稚園？而家嗰間有冇延展服務？我仔嗰間可以幫你湊到食埋晚飯、星期六都可以用延展服務，咁你就可以返工。
我初中父母離婚，
離異後阿媽打兩份工，
生活由偽中產，變成cut淨一種課外活動同補習。
初時唔識面對生活改變，
因為佢哋分開個時太多drama，
番學校唔識面對同學，放學要照顧阿媽嘅情緒，親戚嘅「關心」，成績由中間變包尾。
宜家出嚟做嘢，有自己事業同家庭，
回望番父母離異係一件好事，俾我翻轉頭我只會叫阿媽早啲離婚。
初初個幾年係難捱，阿媽亦犧牲咗好多，
由家庭主婦變到打兩份工，仲要照顧我嘅起居飲食。
但離婚令我成熟左，知道畢業要養家，亦會唸多左自己嘅婚姻係點，做人踏實而慳家，
呢種性格，係事業上都有幫助。
家庭生活開心過有爸爸個陣。
宜家阿媽都算苦盡甘來，基本嘅衣食住行都齊，一年都可以去幾次旅行。
早幾年和爸爸聯絡翻，
言談間都知佢後悔當年拋妻棄子，羨慕我同阿媽嘅關係。
只是時間過左，呢廿年佢冇參與過我哋嘅生活，變咗做拜年啲親戚咁嘅關係，禮貌而疏離。
同樓上唸法一樣，
Plan清楚離婚後嘅生活，到經濟獨立就走人。
只要你生活得好，子女心態都會健康，冇話對唔住邊個。
處理得好，子女成長可能因禍得福。
如果我父母當年唔離婚，
我好有可能為咗離開家嘈屋閉嘅屋企而好早就結婚，分分鐘跟住發現嫁錯人而離婚，同時，因為冇乜經濟壓力，搞得掂自己就得，事業上都唔會咁積極。
一個多經歷多歷練嘅人生，你以為佢唔好，但帶比你堅韌嘅性格先可以扺抗到呢啲艱難時代。人生睇長遠，唔好只focus喺負面呀逆境咁
樓主，你仲愛唔愛你老公？如果無小朋友，你估你會唔會繼續呢段關係？