*長文，不喜勿看，望理解及正面意見，感激不盡
-
老父年事已高，近期身體差咗好多，但佢除咗定期會返政府診所覆診外，唔會肯睇其他醫生，就算半夜心口痛呼吸困難，都只會死頂唔肯call白車，阿媽就陪佢全晚唔瞓幫佢按穴道舒緩(但阿媽日頭仲要返工)，然後第二日就會同我哋幾姊弟講老竇唔舒服，向我哋求助…
-
但我哋真係做唔到d咩，明白佢好怕入院留院，但我哋唔係醫生，佢唔肯求醫嘅話，我哋幫到嘅真係有限… 每次呢d情況都辛苦咗阿媽，亦令我哋幾姊弟好擔心同苦惱，因為我哋真係愛莫能助，然後我就會覺得自己好不孝。
-
有時診所安排佢去做檢查，但下下都排期排起碼兩年，我哋話同佢去睇私家，佢又死都唔肯話嘥錢。我家姐試過想陪佢去睇私家，預約好晒但佢當日粒聲唔出甩底。
-
我後來試過用咗幾個星期時間成功勸到佢，陪佢去睇私家，但我係要講到睇幾多錢我問我老公攞返，講到我老公大把錢咁(當然係老吹)，佢先肯去睇。但嗰次個醫生始終唔係睇開佢，而且醫生都話佢唔舒服時唔即刻去睇急症，到d症狀都舒緩晒先嚟睇醫生，其實好難check到係咩問題… 然後就安排佢做咗個好貴嘅檢查，計埋診金埋單近8千… 好彩嘅係嗰次個報告話佢心臟冇事，但就搵唔到係咩原因令佢心口痛同呼吸困難。
-
最近佢都仲keep住唔舒服，返政府診所覆診個醫生都話唔知係咩原因，建議佢照超聲波，但政府排期要排3年，醫生話可以寫轉介信畀佢出去私家度照，佢又話唔使。我哋勸佢去睇私家，但佢死都唔肯。
-
我每日都會因為呢件事而煩惱，又費煞思量去諗點樣氹佢去睇醫生，夾硬諗計仲整埋封假嘅保險公司信，呃佢話保險公司答謝我呢d長期顧客，畀個特別優惠我，親屬去做身體檢查都可以claim返8成，因為我覺得作到免費就太假，但總之就係講到幾百蚊可以做body check+心臟超聲波(當然事實係我要畀幾千蚊)。但佢諗都唔諗就一句撻埋嚟話：唔會考慮。
-
然後keep住呢個幾月，佢都係經常唔舒服，冇精神，然後繼續唔睇醫生，我哋就繼續擔心、苦惱，唔知可以點…
-
其實有時我真係覺得好痛苦，我知佢成日覺得我哋唔關心佢，但我哋屋企個文化同每個人嘅性格本身就唔係會虛寒問暖，我都唔係喺呢種環境下長大，你都唔係咁對我，你而家要我每日對你虛寒問暖係好難… 而且有時關心佢，都係熱臉貼冷屁股…
-
好似之前疫情有得打針時，佢係我哋家中最早去打針嘅，因為我哋冇人有經驗，又聽到好多打完針會暈或其他不良反應嘅case，加上佢年紀大，我係擔心嘅，所以幫佢預約時特登夾咗我自己得閒嘅時間，想陪佢去打，但佢就係咁話唔使，我繼續堅持，佢就發脾氣，仲話我｢多x餘｣，然後仲自己上網改咗個預約時間… 老實講，關心你，想陪你，但畀你用粗口鬧，邊個會開心？邊個會仲想對你虛寒問暖？但人哋唔做呢d嘢，你又覺得人哋唔理你…
-
其實我上個月經歷咗流產… 因為未陀夠3個月，家人唔知我流產亦唔知我曾經有咗，除咗老公外，我冇其他人嘅支援同關心，呢段時間都係自己一個人去面對… 只係覺得，其實自己都有好多困難、傷痛、情緒、壓力要處理，有時真係carry唔到咁多其他人嘅問題同情緒…
既然有孫就應該唔係呢樣嘢。