視乎佢咩事而喊，佢做錯、俾人鬧、扭計，我唔會抱。我有睇過育兒書點教，但我唔信嗰一套，世界上唔係得一套教仔方法，亦唔係個個細路都因為家長溫柔、堅定而不失威嚴嘅語氣就聽。
Ps 我經常抱我小朋友
2個讚
要行正向嘅，一套方法搞唔掂，冇打鬧咁方便係要鬥智鬥力，不過過程好有愛，好快樂。
攬完要記得問返究竟發生咩事要咁做。
正向唔係學一啲小技巧或訣竅嚟馴養或操縱孩子，係希望佢多思考懂得溝通，同埋點好好同孩子相處
我最大嘅得著係喺親子過程中療癒左自己嘅童年，令我成為更好的自己，唔再自卑，唔再討好別人而委屈自己，學會自愛，冇以前咁火爆。
無論係夫婦或是親子，一段健康嘅關係，係彼此都要有成長，先比較容易一齊行落去。
4個讚
同感、我都覺得結婚生子治療咗自己童年某啲缺失
同感 x 3
因為我想保護佢，想比一個不一樣嘅童年佢，
所以我成個人改變咗，我發現原來好溫柔好有愛，係可以解決好多行為上嘅問題。
先處理心情，後處理事情。
有次我趕時間返屋企佢唔合作，我嚴肅咗講嘢好命令式冇尾音，佢就擰轉頭望住我扁嘴攬住我對腳好委屈，佢想提醒我咁樣講嘢唔好。
原來呢個小朋友小小嘅內心都可以咁敏感，我唔捨得再 hurt 佢。
佢嘅出現改變咗我好多，令到我可以更加成熟咁處理自己嘅情緒
我都學習緊，我都好坦白同我老公講我怕自己做唔到，我亦都同佢講原來我童年嘅傷害係會影響到我同自己伴侶嘅相處，所以好多謝佢嘅包容。
我覺得我哋兩夫妻之間嘅感情都成長好多。
6個讚
呢樣我都有諗過，佢做錯嘢發脾氣想抱，應唔應該抱好。我一開始係唔會抱，但後尾諗落唔對路，所以上網睇吓其他人又會點。
睇過咁多篇，其中一篇比喻簡而精，就係如果你揸住老公買俾你架新車，因為自己一時大意炒咗車，你好驚你覺得自己爭啲死，你打俾你老公想佢安慰想佢抱嘅時候，
佢拒絕並且不停叫你先道歉同認錯，然後解釋點解自己做錯，要確定以後自己都唔會錯，之後佢先肯抱你。你都會感受唔到愛，你會懷疑到底佢愛唔愛你。
當然呢啲只係比喻，每個人嘅感受唔同，我都認同每個人有自己嘅育兒方式知道邊樣啱自己小朋友。
4個讚
唔小心、佢哋唔知道情況下，我唔當佢哋做錯。
但如果佢明知錯嘅情況下照做、唔合作，我一定鬧。
我奉行獎罰分別，鬧都唔得，第時出嚟社會外面唔係個個好似父母咁錫住佢哋嚟呵。
我係咁同小朋友解釋，佢哋錯，我鬧係想佢記住，唔好再犯錯、下次做好d。
而唔係到佢闖禍時由外面嘅人去「教」。
我小朋友曾經俾另一個小朋友推撞，佢返嚟我身邊時我當然攬實安慰佢。
但另一個小朋友嘅家長就係好「溫柔」同佢細路解釋咁樣唔啱，要同人道歉。當時呢位小朋友係知，但唔做亦因為俾佢媽咪「訓話」而不停扭計、哭鬧。
我小朋友就過去同佢媽咪講發生咩事，個媽咪就同我小朋友講「我知，我處理緊佢情緒，你俾d 時間我」
呢d 情況，又點可以因為要先處理小朋友心情，而由另一個「受害人」等？
唔關係我小朋友俾人推事，倒轉嚟做，我一定要佢道歉先再解釋。好彩就認識慢慢等，唔識人哋走咗就欠人一句「對唔住」。
可能有人眼中係好小事，但如果將佢套用返喺大人身上，我接受唔到做錯事，不停哭鬧，仲要其他人安慰先去反省。
你自己之前都識話”世界上唔係得一套教仔方法”，而我亦都好認同，我覺得大家都係女人都係媽媽要互相尊重。
但而家睇落點解你好似一路覺得淨係你嗰套先係啱，其他媽媽教仔嘅方式就係錯？
“倒轉嚟做我一定點點點”，你點解覺得自己嗰套一定係最好？
你逼你小朋友講對唔住，你以為自己教得好好。
咁如果有一日佢自己落街發生呢啲情況，你點樣保證你唔喺佢隔離嘅時候佢都會同人哋講對唔住。冇你喺度逼唔到佢。
加上你小朋友唔係受害人，兩個小朋友衝突，其實兩個小朋友有佢自己嘅方式去解決。
唔係人哋阿媽定要迫個小朋友道歉先叫做啱。
而人哋個阿媽都處理緊個問題，唔係走咗去，只係唔係用你心水嘅方法去處理，我唔明咩叫等唔切。
2個讚
我從來唔覺得自己教得好，亦從來唔覺得自己係好媽媽。
所以，唔再分享喇
你咁樣好容易比小朋友情緒勒索，佢下下發脾氣你就唔駛教…
但係有啲小朋友自省能力較高，整親人自己驚定先，嗰啲可以抱抱
看個人
上一代嘅教法都係咁，發脾氣就係做錯就應該懲罰。擁抱同埋錫錫係獎勵，比得太多或者係小朋友行為唔啱嘅時候去做係會縱壞小朋友。
對我嚟講，我會接納佢嘅情緒，我只係唔會接納佢嘅不當行為。
例如佢可以傷心，佢可以憤怒，每個人都可以有自己感受，佢傷心佢憤怒需要擁抱我好樂意。但擁抱唔代表我認同佢嘅行為，而小朋友亦都唔會透過擁抱去覺得媽媽認同佢嘅行為，佢只需要透過擁抱去冷靜，冷靜落嚟先可以反省同大家好好溝通。
我要去處理嘅係佢嘅不當行為，例如 (只係例如) 佢大叫影響其他人，或者打人呢啲係不當行為，呢啲先係需要處理嘅。但我唔會用唔擁抱佢或者同佢講我唔愛佢，去達到呢件事嘅目的，因為咁樣佢一啲都唔明白究竟自己做錯咗啲乜嘢。我要做嘅係就算我唔喺佢身邊，佢都會識得自己做啱嘅行為，所以令佢明白件事點解係錯，點為之啱係好重要。
所以我唔同意咁樣叫情緒勒索，或者抱抱要分佢識唔識得自己反省。
都係嗰句，每個小朋友都唔同，自己個阿媽最清楚自己小朋友需要點樣。
6個讚
乜你覺得小朋友真係識得分咩？
Anyway ， 你唔需要回應我，我只係覺得你個reply 好好笑
睇佢下次面對同樣嘅事情點樣處理，見到佢進步，就知道佢識。
每個教法都唔係絕對，我都相信冇人覺得自己嗰套一定係啱晒所有小朋友，有權講咩？叫啱咩叫錯，所以其實我都唔知你笑點喺邊，不過睇你嗰句你唔需要回應我覺得比較好笑，所以都忍唔住答你
2個讚
我同意呀，我都係咁樣教仔仔
唔好低估小朋友嘅理解能力，唔好當佢哋喺狗仔咁train
我相信正向教育係好重要的。從觀察仔仔嘅狀況，我都知佢理解到。
我都唔覺得好笑，係好認真同好好嘅分享嚟。以前傳統嘅育兒方法唔識理解同尊重小朋友嘅情緒，家長其實都唔識處理自己嘅情緒。而家多好多網上資訊可以學習，其實不妨睇多啲。
5個讚
咁如果你小朋友係惡意做錯事呢？你會唔會抱？我無意話邊套啱邊套唔啱，每個父母都係抱著石頭過河，從跌跌撞撞中學習。不過我感覺你小朋友應該仲係好細
會抱，就好似做錯事想飲啖水，都唔會no。
上一代覺得抱同愛係 reward ，所以大多數人包括我自己一開始都覺得做錯事抱佢等如寵壞佢。
後來自己做人阿媽，行另一條路，發現原來好唔一樣，關鍵係點管教，唔係抱唔抱。抱只係令件事更輕鬆，因為大家都冷靜去處理件事。
好欣賞你強調無話邊套啱，同意你講每個父母都係抱住石頭過河慢慢學，三歲又好十八歲又好都會有唔同問題。
每個父母用啱自己小朋友方式管教就好。
講得好好🫶🏻
初小的小朋友學習動機低，會因唔願意做事情而發脾氣同態度差，我唔想每次都要出動咆哮功佢去先有反應
請問媽媽們，會怎樣處理同教？
有情緒俾佢冷靜係啱，抱抱同帶離現場可以係其中一個方法，有啲人用naughty corner，道理都係一樣。
冷靜咗先傾，對大家都好。
但係如果佢想逃避責任（例如喊得大聲過對方，乘機冤枉人哋），咁就要小心啦。
我都係從經驗中學習，亦無話自己一定啱，可能我都做錯～