兩胎都係私家開刀，第一胎唔能夠埋身餵係我一直嘅遺憾，好多人都話係因為開刀冇即時嘅肌膚接觸同埋私家醫院唔係母嬰同室，所以第二胎我做多咗功課，有d 心得想同大家分享下
-
提早按摩催乳
可能大家都聽過話大肚唔好刺激個胸，會引致早產。但我中西醫都問過，其實單純因為按胸而早產嘅機率真係微乎其微。所以，我覺得早d 俾訊號個胸要準備奶係更加重要，但穩陣起見我都建議大家足月37週之後先至開始按胸，避開乳頭，勤力每日按，一個星期內應該可以feel 到漲奶，我喺生之前幾日已經有谷奶感。 -
食卵鱗脂
都係大家應該已經聽過，不過我最初就以為喺塞奶嘅時候先食，後尾先知其實未上奶都可以食，懷孕嘅媽媽食卵磷脂可以促進胎兒神經發育，同時令母乳冇咁傑，初乳就容易啲擠出。所以我30wk 就開始食卵鱗脂啦！ -
狂飲水
開完刀我明白真係好似冇咗半條人命，第一胎我都因為落唔到床，又冇乜力而冇點飲水，諗住拆咗尿喉先飲都未遲。但為咗上奶，今次我一過麻醉就狂飲水，飲到尿袋都full 晒要姑娘同我密密換！身體有充足嘅水先會做到奶！ -
揀間鼓勵埋身親餵嘅醫院
我兩胎都喺st paul 生，好感謝佢地嘅母乳姑娘用心教我，就算第一胎bb 啜唔到，佢地都不厭其煩教咗好多次又不斷幫我執姿勢。佢地最好嘅地方係就算住大房都可以將BB床推去你床邊，就好似母嬰同室咁，咁開完刀未落床未拆尿喉，都已經可以埋身，呢樣嘢好緊要，我前一晚八點開刀，第二朝一早七點就成功餵到初乳，都係靠佢地主動推bb 俾我，抱埋我身教我。
我知道有啲私家醫院係唔會推BB上房，最多都係比部輪椅推媽媽落去睇BB，咁樣冇咗skin to skin 真係會錯過黃金時間。但bb 推上房就完全唔同，媽媽直接衫都唔洗著，直接抱到bb!
希望以上小小分享幫到想喺私家生但又驚影響餵母乳嘅媽媽
祝大家餵奶嘅路暢通無阻
