先簡介下我嘅餵人奶歷程
本人好幸運，bb出生堅持到而家三歲，每晚臨訓仲有一餐埋身奶，亦打算餵到佢自然戒～
因為深知母乳餵哺好處（營養+身心發展上），產前已經睇大量相關知識，又好認真聽醫院啲talk
可能因為咁，呢三年餵哺歷程尚算順利。塞奶、乳腺炎呢啲，touchwood未遇過。
可能最大困難係，就算餵得幾好，都要抵受身邊啲言語攻擊同誤會
加上呢三年聽太多關於餵人奶嘅謬誤。
舊年把心一橫，報讀埋母乳顧問專業課程
希望可以學以致用，幫到有疑惑、同埋想堅持落去嘅媽媽
工餘時間，盡量解答～
6個讚
母乳係好，不過餵完冇哂身型，如果當初有人提醒我的話，我唔會餵咁耐
生仔已經夠偉大了，皮鬆橙皮紋肥肚腩，點知餵埋人奶連個胸都冇埋。
其實餵初乳（黃色嗰啲）係咪已經夠？
1個讚
點會餵完冇哂身型
我反而因為曾經餵母乳（當時餵左2年），冇餵之後，大左1個cup。keep到而家都係喎（冇餵5年架喇）。所以我好慶幸堅持餵母乳，可以豐埋胸
我同朋友都係餵完縮哂水
我冇
仲淋哂，一pat豆腐咁，個型都冇埋。
後尾我好努力搽嘢做機，先回復返7成左右
收奶時有冇慢慢收？我keep住慢慢減泵。
有人話餵唔餵到人奶係根據體質，有啲人天生無乜奶，係咪架？
好多時係因為斷奶斷得太急，個胸由好漲突然縮咗水，皮膚唔可以慢慢適應而鬆弛咗
一般慢慢減少產奶+做一做肌肉訓練，就可以避免到呢個問題
2個讚
意外收穫
所以我終於明點解古代啲有錢太太會請奶媽
關於初乳:
母乳成分會因bb唔同階段需要自動調節
例如，初生bb腸胃非常脆弱，消化力好弱，呢個時期嘅母乳含有SIga、乳鐵蛋白、抗體等等保護作用多、分子較細嘅成分就多d；
到bb大啲，要長肉，母乳裏面熱量、蛋白質、乳糖、脂肪成分比例就相對多啲。
所以唔同時期嘅人奶切合唔同需求，冇話只有初乳先最好～（其實好奇妙 
）
2個讚
母乳分泌原理有三大因素，其中只有呢兩個同媽媽「先天體質」有關：
- 內分泌：如果媽媽有內分泌疾病（例如甲減），會影響產奶荷爾蒙分泌，從而有機會「冇咩奶」
- 乳腺組織：例如媽媽胸部做過手術、受過創傷，傷及乳腺組織以及神經，會影響產奶。
除咗以上情況，絕大部分媽媽都有足夠條件產奶，無論高矮肥瘦、A - F cup
第三個因素，要有頻密、有效嘅母乳移出，簡而言之，即係bb越食越多、越泵越多。
好多人以為自己冇奶 → 唔餵bb，但背後嘅真相，好多時係: 唔餵bb → 冇奶。
2個讚
開刀係咪要幾日後先會有奶
成日都話bb出世要食初乳，咁咪會錯過咗個機會？
就黎生，胸未有奶，但腋下摸到一粒粒結，禁落有啲痛，我需唔需要理會啲粒粒？ 謝謝解答
我兩胎都開刀，兩胎全人奶
初生bb其實食好少奶，唔會錯過機會
我第一胎時唔識，好彩有母乳姑娘日夜指導同幫我按鬆乳腺
我就死攬住個b狂埋身
不過要視乎bb識唔識啜，同埋bb心急程度
2個讚
係，好多人以為頭幾日無奶驚餓親阿B就補奶粉
其實初生個胃好細，黃金初乳卡路里好高，好少少已經足夠
只要唔補粉，頭三日阿B會狂埋身，大概預一個鐘至兩個鐘一次。佢會幫手刺激造奶，第三四日就有奶。
3年全親餵，宜家半夜醒左會啜兩啖，同放假訓晏覺會扭飲奶奶，同有時安撫想飲奶奶。其實媽媽我想幫佢戒，但又唔想搽d乜乜上去令佢唔肯飲，但又唔想自然離乳。請問有無咩方法戒奶？謝謝
開刀有機會遲上奶的，因為產程中使用嘅藥物、媽媽產後傷口痛楚造成嘅心理壓力、同埋好多時出世後冇機會同bb肌膚接觸，呢d機會都會影響到。
如果醫院容許、媽媽身體狀況OK的話，盡量多d同bb skin to skin、過程試下餵bb，會有幫助的。
如果情況唔容許，我哋盡力就可以。媽媽已經好唔容易
1個讚
媽媽有冇覺得胸脹、或者個胸明顯大咗？（類似黎m前咁，但可能再明顯d）。如果有的話，多數係腺已經ready緊產奶～
至於個胸有摸落痛嘅粒粒，建議去睇醫生檢查下比較穩陣
可以考慮折衷嘅方法——引導離乳
夜晚嗰餐比較難一下戒到，建議由戒晏教嗰餐開始，安排多啲放電活動，分散佢注意力，等佢唔好咁易記起要食奶，同埋會易啲氹佢訓
另外配合返足夠飽而營養均衡嘅食物。
都可以同小朋友「講數」，亦可以配合繪本故事，約定好某段時間唔食，之後慢慢都可以話佢知小朋友大個啦，媽媽奶完成任務，要同佢講byebye。
幼兒階段埋身，絕大部分係滿足心理需求，佢哋怕戒奶等同於同媽媽分離；所以過程中要畀佢清晰知道：有冇奶食，媽媽都依然喺身邊，依然愛佢
2個讚