佢唔中意睇書 / 學習, 咁平時最中意咩呢? 可以借呢啲興趣注入學習元素? 其實玩都可以學好多野架喎
獎勵計劃有用? 例如睇完同講得返10頁書內容就獎下xxx?
有無同學校老師傾過可以點樣激勵下?
1個讚
我仔中文真心好差，但呢二年睇多左中文書，係不自覺情況下進步左好多，佢自己字庫量大左，變左今年考試做閱讀，寫作都明顯高分左好多，唔知算唔算爆發，但我派卷嗰下真係驚訝
移咗民幾耐？當佢適應咗就會讀得好快，佢生活喺外國英語會變為母語，唔洗擔心
佢係根本唔想拎起本書睇
上次去書店，佢拎起本書自己讀左幾頁，我見佢願意讀即刻買，結果返到屋企又pat埋一邊
次次買書都應承我會睇，結果我次次失望，但次次都上當
（Sorry太耐無入嚟，轉左第二個名）
近呀
每次去話借呢本借嗰本
借完當睇左，繼續去玩
Exactly
佢係真心只係鍾意玩
其實佢學校表現唔錯嘅，老師都讚佢追得好快
不過，比同齡進度遲一年囉
同埋我最介意嘅，係佢的學習態度
我自己係好鍾意睇書嘅人，其實都唔係幾明唔睇書嘅人諗咩….
都唔敢講我啲小朋友鍾意睇書係俾我感染定係自己本身鍾意。
你自己本身鍾唔鍾意睇書？
玩，無間斷的玩，因為唔使用腦
老師話唔好迫，等佢好開心咁去讀
但問題係，佢連本書都唔想拎起嚟睇
就算唔講睇書，例如佢鍾意跳舞，我唔見得佢有日日拉筋練姿勢
簡單嚟講，就係又想有成就但又唔願意付出
呢樣真係令我好頭痛
鍾意呀，我係書蟲，細個蒲圖書館大
所以好希望小朋友鍾意睇書，可惜
我有時拎起本書話一齊各自睇書，佢每兩分鐘問我一次夠鐘未
其實都聽過啲方法，例如屋企周圍都擺多幾本圖書，愈方便攞到，佢睇書嘅動力就越大。
反而玩具同埋其他電子產品，就收埋啲，等佢無咁易攞到。
惰性同想不勞而獲，人人都有。
唔好話叫佢自己睇
就算我讀書俾佢聽，佢都係望東望西，我未讀完一版佢已經想掀去第二版
務求我快啲完成，咁佢可以甩身
然後，所有要用腦的活動/遊戲佢都唔鍾意玩，例如puzzle/ rummikub/ switch…
介唔介意講下你讀緊咩類型嘅書比小朋友？我仔9歲，嚟咗英國一年，喺香港時都好鐘意我伴讀，我會揀啲字少同搞笑嘅比佢睇，主要我讀，我會用比較誇張嘅聲線演繹，佢都好受落，你可以試下
細個有冇伴讀習慣？宜家我小朋友大啲，我會掉轉好想佢哋將睇到嘅書好似人肉audio 咁講俾我聽。我又聽得津津有味。因為我好鍾意聽故仔。和佢哋討論下過故事。例如，如果係你，你又會點做咁。
Year 2 仲細應該鍾意聽故事，揀一啲好笑既書，我仔細時鍾意睇Robert Munsch, 通常我自己睇完感得本書啱佢我先同佢睇。
Robert Munsch 書可以上website download audiobook, 佢讀得勁好笑。之後可以一人一個page 讀。
我仔（8歲幾）都係唔種意睇書，但最近有少少改變，歸納原因如下，希望幫到你：
1.轉咗校，新學校老師會讀BB繪本比佢哋聽，我仔覺得有信心讀到，老師又講得有趣，佢就主動拎起讀；
2.新學校有閱讀時間，20分鐘老師督住唔准做其他嘢，課室有梳化同大量不同類型書籍（包括漫畫），老師不會限制唔俾睇漫畫，總之睇書就ok；
3.爸爸規定每晚睡前15分鐘只准讀書，連玩具都唔俾玩，阿仔好respect爸爸所以照做。雖然好多時佢睇唔夠5分鐘就瞓著，但睇嘅時候係專心的。
4.爸爸開始講故事比阿仔聽，阿仔聽到唔肯瞓～
5.我無再理會阿仔睇嘅書夠唔夠深，亦無再執書櫃（以前我會定期清出唔啱程度嘅書，阿仔基本上無得翻睇），結果一屋都係書，但我個人輕鬆咗～
6.我同爸爸減咗佢好多手機時間，晚飯後基本上無得用（我哋雙職父母，晚飯前理唔到）
最近我仔去到書店係會打下書釘，睇完半本或一本書先會走…
可能佢真係大個咗啩，不過我覺得有啲嘢似乎急唔嚟，放鬆啲對大家都好！加油呀！
1個讚
我都會同小朋友去圖書館
但有另一個煩惱
因為好多小朋友喺啲電腦睇片
我仔引咗過去
仲問點解人哋小朋友可以喺度睇咁耐片
結果冇興趣揾書
甚至呢傢去任何一個圖書館
一入去都會要揾邊度有電腦