其實我都唔係咁好意思
事緣有朋友同我呻老公衰野，我聽到佢老公成日嘈交又唔尊重佢又唔返屋企又𥄫女仲要賺唔到錢返屋企，當堂打左個突。個朋友連續呻左幾日，我聽左幾日，突然覺得自己老公都幾好
當我繼續沉澱落去，反思到自己都有好多問題，自己都好剋人憎
2個讚
係呀…我都覺得自己好乞人憎…憎埋自己，所以我想改變
我老公有同我講過一樣嘅嘢，本身我係細心嘅人而佢係大意嘅人，所以好多時佢未做我已經提醒佢要點做因為想避免佢又出錯，但佢話我咁樣好似軍訓，佢好大壓力，會令佢每一步都怕做錯嘢，佢話佢都未做我就預計佢做錯，好似佢老闆督佢做嘢咁，所以我就無再出聲，忍住把口，到佢真係出錯先善意提醒，唔好講話咗㗎啦之類嘅說話。
3個讚
我毛病
呢句係男人死穴，咁講真如果佢咁同我講我都唔會鍾意，男人受軟唔受硬
1個讚
首先以下係大部分男女分析，實有例外：
你一定要明白一個道理：男人同女人唔同，男人得過且過、鍾意拖、唔會講對錯，佢會但只係喺工作上面，感情呀私生活呀湊仔佢會追求唔好被煩，追求快樂，而唔係件事啱唔啱，或者做嘅過程有冇效率
女人呢？家庭上面要求高，要每方面做到足做到完美
所以女人一定怪個男人，又多磨擦
其實男人根本唔會講對錯，返到屋企對咩錯？女人就鍾意話佢不負責任blah blah blah
我講明我老公做某啲家務，佢做唔係因為佢知道自己責任，係因為佢吹我唔漲，我瀨死唔做，佢焗住嚟。佢當然心態錯啦，但你仲同佢計咩
而只要我一學洗衫，吸塵拖地我一定奶嘢，佢一定掉返比我。男人就係咁
你唔使同佢講咁多啱唔啱呀正唔正確呀負唔負責任，佢只會逃避同嫌煩
所以解釋到咁多男人拖住個女友要個女迫婚先結，因為呢種男人（我眼見係佔起碼80%）唔會諗對錯或諗係咪應該比個名份個女人，只係被迫到要負責任
另一個極端（我估10%)係個女人好似公主咁，或者豬到一個點連自己搭車都唔識，個男人就孭晒上身好似湊女咁，呢啲女人冇腦嘅，但會好幸福，亦唔會有咩成就，我估好多女人唔鍾意，因為香港女人由讀書開始已經叻開
好多女人就係做嘢能幹，工作及家庭都兼顧得好好，但嫌個老公廢。你想要幸福，就要喺being a superwoman or being a princess中間攞個平衡，要睇開啲，唔好講對錯，佢肯做就算，求其收貨，好似上面話男人返屋企最大志願係打機睇波玩玩具，我嗰個咪一樣，我由得佢，但你做返家務就算，佢唔係想娶個老母或管家返嚟，佢只係唔想煩，而女人一嘈就煩
仲有一種我miss咗，就係男嘅娶個有錢女，佢就會千依百順，因為大家都冇乜磨擦，但個男就要被人笑，好似袁偉豪咁
記住記住：唔好了你老公啲錯，佢係錯呀，係乜都扺賴呀，咁又點？只會影響關係
我老公咪又係乜都唔記得乜都問我，我得閒就答唔鍾意就唔答，佢根本都唔上心，又冇記性，但睇波時去玩時就好精靈，咁可以點？下下開佢波咩？
5個讚
多謝你分享你睇法，我又有啟發
1個讚
婚姻係講溝通，包容，照顧，體諒，欣賞
婚姻唔係做練習講對錯
而且某程度上點做一件家事，做得快做得慢，亦冇理由係老婆嗰套先叫做啱，亦冇話老婆決定邊個啱邊個錯
香港女人真心叻，一直有平等機會向上，讀書叻，工作獨當一面，結婚家務生仔教育一腳踢，女人會不停向上，由十幾歲嘅少女到廿幾歲嘅後生女到三十幾嘅少婦都會進步會自強，男人？得罪講句，最多事業有向上，我覺得好多男人十幾歲後都唔會向上唔會成熟，乜都交比個老母同老婆照顧，玩車玩模型就叻，或者係佢哋個成長唔係女人嗰種啦，總之你廿幾歲愛上個男人到結婚後一直令你失望，好似湊多個仔咁，呢啲例子香港一地都係，好老實好似香港先係咁嘅imbalance
我都係無限氣，但而家已經唔呻，覺得冇乜嘢了，得閒先分享，洗碗先
7個讚
你最後果段講得好好
1個讚
好同意冇對與錯之分，所以我好唔認同樓上係咁講對錯
對與錯／正唔正常，其實只係自己主觀去睇野既角度。
你認為既對唔等於係別人既對，你認為既錯唔等於係別人既對錯，你既normal你既standard 唔等於別人都有一樣標準。
世界好大，人都有好多種，性格測試都講明世界有咁多種人，難道就會話某種性格既人係錯係廢嗎？
冇人有權去judge別人既對與錯，even 係伴侶，
健康既關係係需要雙方尊重大家既不同，不停地磨合＋達成共識。
可能講得有ｄ哲學，但如果諗得通就會更加識得尊重、包容別人同唔會再咁執著。
如果而家先發現自己同老公個差異係太大，完全磨合唔到，其實自己都要負責任。老公自己揀，仆街唔好喊，怪就怪當年既自己唔識諗得透D。但長大左先看透都唔遲，因為如果識自己調整心態其實都有出路，所有野都係心態決定境界。
4個讚
大部分男人係好冇志氣嘅動物，講玩講hea就叻，女人乜嘢都上心好多，做嘢就有條有理
但呢啲唔係對錯，係分別
當然如果有小朋友，個衝突會加劇，因為香港重功名，會係個媽咪發揮多啲嘅
我對文字好敏感，又好記性，又上進，自我要求又高。老公佛系人生，豬油膏，冇心裝載，金魚記憶，返工等放工，做嘢堅垃圾
但唔應將佢嘅缺點等如錯，我吵鬧完會諗下當初點解鍾意佢：有耐性，好脾氣，心地好，簡單冇機心，對人真誠。我自己又臭脾氣又覇道又高傲，死港女一條，你估有寶咩？當年兩公婆二話不說一齊發夢，行七八個鐘佢都照顧我，捐窿捐la食黃，又一齊救動物，貼晒錢咁，仲會照顧我屋企人，我話移民佢即刻話：台灣？英國？義無反顧咁，仲想點？
兩個上進，叻嘅人一齊多數更大磨擦
9個讚
你同我屋企簡直一模一樣，不過我太太冇你咁理性，覺得我做得唔好會直程“啊！！！”咁樣尖叫，我懷疑佢有情緒病。
點解你覺得辛苦？因爲老公唔幫你。點解老公唔想幫？因爲佢做得多錯得多，錯就會比你閙，不如你話事，只有你自己先做到100%令到自己滿意。
點解老公唔比驚喜你？因爲對住個成日黑面的女人，會好心寒。