因為我做嘢同讀書都要睇關於教育嘅文，有時有啲好有用嘅research paper 想分享俾大家睇，今日分享關於讚小朋友 :
諗一諗，如果小朋友中文默書一百分，你平時會點讚？
A. 你中文默書滿分，你真係好叻仔
B. 你中文默書滿分，你一定好努力
B係一個比較好嘅稱讚方法
好多時候，我地會不自覺地用佢好醒目，好聰明，好叻仔。一直以嚟，我地都被教導要提高小朋友自信心，所以我地不停稱讚佢地既個人能力，但原來我地錯誤嘅稱讚方法係會對小朋友造成長期負面影響。
過去十年，研究學者Carol Dweck同佢團隊研究praise對小朋友既影響，研究對象有成幾百個小五學生，研究人員將對象分成兩組，佢地都做一個相同既測試，測試容易，完成後，研究員對各組分別只講左一句說話
A組: 你一定係好醒目 (you must be smart at this)，著重於佢地嘅能力 (intelligence)
B組: 你一定係付出左好多努力 (you must have worked really hard)，著重於佢地嘅努力 (effort)
之後，研究人員同各組小朋友講會有第二個測試，可以選擇同第一個一樣容易嘅測試，或者另一個測試，特別強調雖然會俾第一個測驗難，但會學到好多野
發現左啲咩？大部分A組既小朋友選擇做容易既卷，放棄可以學習嘅機會。而B組嘅小朋友接近9成揀難啲但可以學到野嘅卷。
點解會咁？
研究人員指，我地選擇A嘅稱讚方法，其實係話緊俾佢地知，我地個遊戲重點係要look smart。被著重稱讚能力(intelligence)嘅學生會選擇避免犯錯，以免自己睇落唔叻仔，所以唔想揀難嘅卷，佢地想做容易嘅卷，繼續俾人讚叻同減少因為失敗而尷尬既機會。
家長們，有時候小朋友嘅學習動機點解咁低？有冇諗過係同自己做嘅事有關呢，試下多啲欣賞佢地嘅effort而唔係intelligence
我開始無耐，其他文可以去我ig/fb睇下，打iamnotanSENexpert應該搵到，可以俾下comments等我睇下可以點寫好啲，之後都會寫下SEN嘅嘢 (本身原意係想講多啲特殊兒童，等大家認識了解佢哋多啲) thanks 
、我細個就係有小聰明果啲、上到高小已經死得好慘