打工仔不滿同事無派散水餅 網民唔撐反而咁講

自由講場
1

有網民日前以「同事last day竟然唔派散水餅」為題發牢騷，回應的網民卻普遍反對派散水餅，反而有不少人的想法是「散水餅真係無謂，熟的食餐飯就算」；另有向前看的網民認為「辭職大多是因為對公司待遇或同事不滿才離開，與其派散水餅，不如返新工派餅好過」。

樓主指「公司有位同事last day，係公司都做咗差唔多一年啦，唔知係唔係因為佢00後，唔識啲人情世故，佢竟然last day都唔派散水餅畀其他同事，雖然同佢都唔係好熟，平時講嘢都有啲代溝咁，但平時工作上都照顧佢唔少啦。之後上司問佢點解唔派散水餅，佢話因為佢唔記得咗買，真係last day都一啲都唔上心，雖然以後都唔會再見到，但呢啲點都要做足先得㗎！」。

回應的網民口徑普遍統一，大多持反對派散水餅態度：

  • 老馮要派水餅㗎咩？唔派犯法㗎？
  • 我從來都唔派，覺得很無謂。公司裏一定有令人討厭的同事（一定唔派），既然係咁便直頭唔派算了。
  • 離職一定要派散水餅的嗎！當年我裸辭都冇派，因為極度唔開心走，亦都冇心情派！
  • 檢討下點解唔派畀你哋啦，而且合約寫要做㗎咩？
  • 做到唔開心就唔會派。
  • 唔派散水餅就有問題？
  • 咁人哋辭職走，咁有無人請佢食farewell飯？
  • 人哋都唔想買呢，亦無義務買。
  • 我又唔覺得散水餅有幾重要。
  • 要轉工通常都係做得唔開心，仲邊會派散水餅呀 !

另有人分析利害指，「人哋唔做唔係應該你哋請佢食飯送行先啱咩？散水餅？睇下做邊行囉，需要人際關係嘅工咪買囉，唔需要嘅買嚟做乜？唔使錢呀？」

另有打工仔引述自我經驗稱，「我今日last day都沒派。同樣地，他們也沒有farewell lunch。我一早已經同佢地講唔要大搞。大家都係打份工。打工係為錢。何必為了形式而大費金錢？」

網民撐與相熟同事食飯歡送

說著，不少網民反而支持相熟同事食飯歡送的做法。有人指，「老老實實，雖然我做的都係細公司，同所有同事關係都算唔錯，但都唔係個個同事走都會派散水餅，可能佢會叫幾個比較相熟的同事一齊出去食午飯就算，然後最後一天，同大家講bye bye」；「散水餅真係無謂，熟的食餐飯就算」、「last day就一定要派散水餅嘅咩，我公司有同事在last day 都唔會派散水餅，只是會私底下同最熟的同事食飯farewell」。

另有網民指，「睇公司文化同做咗幾耐，如果同事有同你食餐飯都會派嘅」、「辭職大多是因為對公司待遇或同事不滿才離開，與其派散水餅，不如返新工派餅好過」。更有人講威水史，稱「我係上兩次last day無派餅，反而老闆請我食飯」。

2

唔需要派散水餅，但都唔好無情啦。感受到人情世故啦。

3

想當年廿歲頭就係以為派散水餅係叫做識人情世故, 所以做咗幾個月都走去嘥成千蚊買餅派, 而我當時走係因為同班死八婆同事唔夾… 而家諗返都覺得自己 on9. 嗰時仲要搵得雞碎咁多.
而家我轉工都只係同啲熟嘅同事食餐飯, 唔熟嘅真係睬佢都有味. 當做咗咁多年嘢, 有得咁上吓年資, 每次轉工都會升一至半級, 話唔定轉多兩轉返番去舊公司, 做呢班 old seafood 上司添, 仲使乜俾面你

6個讚
4

我只會派比熟嘅同對我好嘅同事，其餘嘅一律不派

1個讚
5

以前人工低，last day仲要去買d貴價西餅返去請成team人食，肉都赤埋，買得cheap既又驚比人厭棄。最嬲係最唔鐘意既8婆都有份食我d餅，個上司過左放工時間先開完會出黎，見冇咩西餅剩就比說話我聽，大佬，我last day仲要等你ot咩…

3個讚
6

是真

7

我都覺得派散水餅真係唔係老馮
睇下關係點樣

我都係咁話
上份工我已經選擇性派餅
我最憎果兩條友(同我一樣職級但老seafood)我專登唔派
覺得好爽 :face_with_hand_over_mouth:

5個讚
8

又係呢啲老屎忽
佢真係厚面皮個喎，唔熟憑乜嘢要人哋請佢食餅

都唔明啲老屎忽做乜成日都睇唔起啲後生:roll_eyes:

我自己都好唔鍾意散水餅呢個文化，真係熟嘅一齊食餐飯就算

9

其實我都唔知幾時開始要派散水餅…
我唔認同呢種文化.

以前一直都係FRIEND 既同事食餐飯就算, 可以夾錢請RESIGN既同事, 可以AA, 都只係為左最後的聚一次.

唔明點解要派散水餅

如果係我, 我係唔會派.

10

有時都唔明, 點解有D 嘢要搞到係"一定要" 例如: 讓座(只要有人嫩過你, 老過你, 你就必然要讓), 散水餅(無論你係管理層定基層都要派), 仲要唔好派黑心嗰D, 會俾人嫌cheap…大佬呀, 每個人都有自己唔同嘅處境, 唔做可能有當中原因… 又咁講, 做埋last day, 聽日都見唔到呢班同事, 我為咩仲要討你歡心呢…

11

呢個散水餅文化同派利是一樣咁on9
仲有幾年前開始如果派美心聖安娜會俾人話係cheap 野

3個讚
12

啲錢係自己，唔派就唔派

1個讚
13

可能人哋好L憎佢佢唔知姐！
派咪派，唔派咪唔派，乞兒等開飯咩！

同埋依家少少要求高
一係唔買，一買可能要買唔少錢
人哋可能有經濟負擔呢！
乜都多口！

1個讚
14

我唔會覺得cheap 只係唔鍾意食呢兩間藍店

1個讚
15

話時話, 我都覺得farewell 飯係「非誠勿擾」。無心farewell 不如唔好搞。

有份工我resign, 個老細好要面既, 成日都想曬自己有生活品味, 就約我地去食一間好貴既日本野, 聲稱係幫我同另一位同team 同事farewell。其實我不嬲同呢team 人都唔熟, 覺得班友成班八婆八公咁, 都唔埋堆。但如果老細話請食飯, 都俾面去下應酬下啦。去到又係佢地一班自己吹水, 無咩人理過我同另一個被farewell 既同事。點知事後老細問番晒我地逐個人收錢, d 野又貴又唔係特別好食, 早知係咁就唔去啦。

我覺得我都唔做啦, 仲要應酬d 我唔鍾意既人真係好無意義。

16

friend 嘅又出面轉到好工，仲食咩西餅，收工 請 happy hour 好過。
連 happy hour 都唔想到又唔想見嘅人，無謂做咁多門面野，行出門口以後就係陌路人。

被人迫走又未搵到工，就算吧！咁樣走呢間公司嘅人脈網絡要唔要都罷。

17

該主題在最後一個回覆創建後180天后自動關閉。不再允許新的回覆。