又講下仔嘅進展，睇下呢個經驗幫唔幫到其他人。
因為仔嘅SEN經治療後大幅改善，一開始老公唔肯將SEN情況告知學校，不過阿仔在英國安全渡過year 5。佢只係識唔到朋友，我都有向學校SEN部門求助，但因為班主任唔覺得有問題，所以學校SEN方面嘅協助。於是我自救，報咗Council嘅parenting course，又借書睇，都有好效果。但踏入year 6，情況惡化。
首先大個仔，仔開始發現自己原來無朋友係好奇怪。二來成績壓力大咗（year 6會緊一啲 但同香港比仲係好輕鬆）。三來嚟咗個新香港同學，仔見佢迅速識朋友，連自己最自豪嘅數學都俾佢爬頭（佢95分，人哋100分），就出現妒忌、怨天尤人、覺得自己係垃圾等反社會人格。
仔好鍾意我，成日向我講心事，就成日同埋我講呢啲黑暗思想。但無論我點勸佢安慰佢，叫佢唔需要比較，唔好放棄，唔需要滿分，佢都係唔聽。呢種黑暗思想令朋友更疏離佢，令佢學業壓力更大，落入惡性循環。
我向老公講，老公開頭就只係冷嘲熱諷，覺得問題不嚴重，係我唔識教。學校家人都唔支持，我又係咁俾仔黑暗思想轟炸，我自己頂唔順，成日同仔嘈交，我就想搵SEN支援機構幫忙。
但老公阻止我，覺得我小題大做。我同佢大吵一場，叫佢講咁叻，不如你試下。佢就話好呀，我實搞得掂，你睇著嚟，我大不了辭職去搞。
我將串字溫習俾咗老公負責。老公比我情緒穩定，無同仔大吵，所以效果真係俾我好。我對少咗仔，情緒都穩定返。
然後我將講黑暗心事環節俾埋老公負責。老公一聽，就好緊張咁同我講，仔咁樣咁樣講，好嚴重，點算呀。我話，我咪一早同你講過囉，你親耳聽感覺唔同呢。
同時間，仔嘅黑暗思想轉化為行動，開始在學校動粗，引起學校注意，安排了情緒輔導。仔向輔導員講曬啲黑暗思想，嚇到輔導立即轉介SEN小組，並和父母約談。
此時老公覺得問題嚴重，告知學校仔細個已有SEN。老師即刻明曬，整咗個SEN study plan俾阿仔，定期和父母約談。
第二次約談，老師講咗啲政府規定嘅嘢，包括訂下明確改善目標，和香港所見差不多，所以我本來就收貨。但老公覺得老師做得不夠，追問老師要做更具體行動，包括
- 仔對聲音敏感，一有聲就暴燥，要求老師安排佢坐角落。
- 之前默書範圍唔清楚，仔成日溫錯書。所以老公要求老師講清楚默書範圍，等我哋可以同仔集中溫習，等呢個小成功可以俾返佢自信。
老師都答應了。經過呢件事，我覺得事情終於有希望。最重要是老公終於同我同一陣線，而且佢比我更擅於談判和爭取，和學校溝通就暢通咗。
38個讚
阿仔有你地呢對父母好幸福呀！
初頭唔明白你老公點解樣樣都唔知唔理，老婆情緒有問題都唔理…
不過，有時get唔到就係get唔到，最後終於理解到你，一齊努力幫阿仔
6個讚
雖然你先生後知後覺，但佢一知就開行油幫個仔，實在好難得。
加油！仔仔有你哋好幸福
1個讚
恭喜你哋，其實响英國，好重視Sen 小朋友，朋友响小學教書，佢話學校1個SEN 小朋友，就會安排1-2助教跟個小朋友上堂，當小朋友有問題出現，佢哋會即刻處理
3個讚
恭喜你呀
好彩爸爸肯落手落腳陪你同仔仔一齊面對
繼續加油
1個讚
恭喜樓主，人生有考驗，家人一齊過之後嘅幸福特別珍貴
1個讚
你係好媽媽，老公終於都幫埋手，very good。
我大果個阿氏+溝通障礙，記得剛上中學時都突然充滿黑暗負面思想，見社工或精神課都無咩幫助。
太太好煩惱，我最後教佢躺平人生，無再黑暗但學業也躺平了。
而家係哩邊返學，可能佢唔係嚴重，學校無特別協助。
讀左兩年幾，交到一個同樣有溝通障礙既朋友，學業則繼續躺平，除左畫畫咩都無興趣。
慶幸佢畫既畫，得藝術課程既老師欣賞，學業零分都收左佢，否則下年隨時無書讀。
至於細果個，過度活躍+讀寫障礙。
讀寫問題愈大愈明顯，幾乎肯定大個左會係文盲。
可能情況嚴重，即使我無向學校申請過任何野，竟然安排左助教+言語治療師+教育學家去跟，專業程度係香港要每月比八千幾先有既服務，有些意外。
至於過度活躍，來到哩邊變成剛剛好，可能係活動教學的關係。
經過兩年幾，佢係學校仍然受歡迎。
不過由當初受所有人歡迎，變到只受女同學歡迎。
因為英文好左好多，會和同學鬧交了。
沒辦法，sen常見的偏執個性。
11個讚
mgugu
11
對聲音敏感可考慮戴ear defenders，唔少有需要學生都會戴
恭喜樓主守得雲開見月明！！大爆咗一次之後老公而家終於明白問題所在加入同你同一陣線，呢啲係咪叫置諸死地而後生
我同佢係咁相處，有咩唔妥會嘈，嘈多幾次都解決唔到，最後就會大爆，爆完大家就會調整。
我哋始終係對方最可靠嘅隊友，坐同一條船，所以大家最後都會妥協。
有一日我撞到街坊，佢都有SEN小朋友，好關心我， 俾好多建議我。但屋企有好多內情佢唔知，亦唔知點解釋，我用唔到佢嘅方法。
我深思一輪，發現世上真正明白呢啲內情嘅，只有我同老公。我同老公講，佢話啱呀，叫我無謂搵鄰居，佢哋唔會明。然後我哋就一齊拆掂佢。
7個讚
我女有社交障礙，性格偏執，佢係學校一個朋友都冇，成日自己一個。因為佢係學校係好靜，老師都唔覺得佢有問題，所以都冇任何支援。我地都係躺平，預佢讀唔成書，大d讀college, 第日求其搵到份工就算。
2個讚
好勵志！你好積極揾方法解決，先 motivate 到身邊 其他人一齊 take action 改善。替你哋一家高興！
1個讚
有時真係唔知嚴重啲等老師察覺好，定係收埋等所有人都察覺唔到就算
梗係唔想嚴重喇, 我細果個真係完全認唔到字, 所有文字係佢腦中都係圖畫, 沒辦法閱讀或寫整個詞語.
個教育學家好認真同我講, 以佢既經驗. 希望能培養到佢長大後可以睇得明提款機及銀行帳戶, 過到基本既正常生活.
可以想像到, 佢既人生會幾難行.
就算哩邊藍領係個好出路, 但完全唔使識字又唔使考牌既手藝工作都好少.
暫時想到既係廚師, 泥水工人, 送貨司機?
第時如果佢無個賢內助, 真係等住被人呃.
4個讚
我個囡都係，响香港時冇朋友，有時比同學bully, 我哋都知係啊囡性格問題，諗住來到呢度從新來過，點知都係比班男同學蝦，好彩佢同級有香港女仔同學，大家互相照應，總算有個朋友
2個讚