大家同老公/老婆鬧交嗰陣會點樣？我老公一鬧交就會大叫到鄰居都聽到，失控咁，佢d情緒好易受觸動，有時真係想分開。。
2個讚
佢失控唔好對抗，由得佢，等佢冷靜下先再傾
2個讚
正解
最好即時行開停止對話，由佢冷靜吓。我同老公有時鬧幾句，講到大家火火地，佢會話 ‘係啦，我錯晒’ 或者我會話 ‘得啦，唔再傾啦’，直接中斷對話，大家冷靜一陣就無事
1個讚
我都係燥嗰個多，我老公高招，冷處理，我冷靜後再傾，漸漸我脾氣都冇咁臭
你嗰句OK,你老公嗰句聽到更火,除非個tone係軟皮蛇嗰隻
1個讚
我老公嗰句真係令人更火，我會即時唔出聲唔睬佢，跟住大家一齊收口，過一陣佢冷靜完會主動氹返我
2個讚
我果個一樣係咁
最憎我一句老公一句就愈講愈嬲
係佢正常嘅時候同佢講。
因為我慣咗想即時解決問題，有時佢錯我會話佢，想佢知道咁做唔啱，佢好多時完全唔回應我就更加忟會繼續講，佢忍唔到就會咆哮大叫到全部鄰居聽到，好樣衰
其實佢做錯咗啲乜，有冇例子？如果係雞毛蒜皮冇手尾嘅嘢，可以婉轉啲提吓佢。講一次佢唔回應咪算，佢 EQ 唔好，你繼續咄咄逼人，會搞到佢情緒失控
通常都係因為小朋友少少事佢就鬧個小朋友，有時係小朋友無心之失，我覺得唔使鬧到咁，就會話番佢，佢會駁番我，咁我都會反擊番佢，講多幾講佢就大叫有時會激動到喊，我好似湊多一個仔咁
我屋企都有差唔多情況,
我小朋友唔聽指令,
有人同我老公講,
小朋友唔聽就大聲d同佢講,
結果佢有時候鬧小朋友,
小朋友又驚係咁喊.
又打小朋友。
鄰居都聽到,
又唔敢多出聲。
我見到了我又會出聲.
我一出聲老公又鬧番我。
頭都痛. 
係喇就係咁樣，我話番我老公多幾次佢就會大叫，但轉頭冷靜左又會道歉，但我真係好憎佢咁大個人仲大叫，佢就話就算佢錯我都唔好即刻話佢，咁會刺激佢，但我有時太嬲會忍唔住話佢
1個讚
我老公有時都係咁，會突然大聲鬧小朋友，我會選擇唔出聲。如果我出聲就一定會鬧交，最多事後同佢講咁小事唔駛咁大聲鬧。而家小朋友大個咗，老公大聲鬧時佢哋會話 ‘唔好再鬧啦’，我就更加唔會出聲
我哋本身脾氣都好火爆嘅人，自從小朋友出世之後，我哋有共識唔好喺小朋友面前嗌交，我又有睇親子書，基本好神奇地一年都唔會嗌交多過五次，就算鬧細路仔一個禮拜最盡都有只係有一次半次，只要理解對方背後嘅動機，脾氣可以慢慢控制返嚟，最緊要有覺察
唔怪得啲人講生小朋友可以訓練eq
同埋了解吓自己會為咩原因跳製
譬如小朋友打爛野整污糟屋企，我又覺得可以接受，因為都係唔小心，叫佢清理返就得
但我唔舒服，兩父女冇關心和問候我最易跳制
我丈夫急性子，我慢條斯理，佢成日小小事就鬧我，我理解呢個係我哋原生家庭嘅分別，我當佢有缺陷，我唔同佢計較，佢漸漸發現我冇反應，佢都冇癮，所以佢都好少發作
2個讚
好好呀，成熟嘅父母
我同你相反，我本身脾氣算好，好多事都忍咗去，間中搵人呻下就冇事嘅人
但生完小朋友變得好易嬲，唔係對小朋友嬲，係對另一半嬲
都唔知算唔算喺小朋友面前鬧交，但d語氣會差啲同黑面，其實我都知俾小朋友睇到唔好，但自己就好似控制唔住咁
我同我老公比，我算係急，佢係慢嘅人….好多時佢應咗我話會做，但等好耐都唔見人，例如：叫佢幫手拎包紙巾同呀女換片，佢答嚟緊，等咗成分鐘都未有，原來佢仲坐喺度睇緊電視，佢主動話洗呀女d奶樽，但佢浸足一晚掛住打機都唔洗，仲要提完都經常係咁……我經常忍唔住黑住面咁話佢，幫佢執手尾，我老公好似你咁冇反應，但我會仲嬲，因為覺得佢冇聽
行街同佢講嘢，佢眼中只有個女，叫親佢都冇反應，有時行街見到d背景靚，想影張全家福，佢就只係同個女自拍，我張張都好似攝鏡咁，會好灰好冇癮，然後我又忍唔到嬲咗
真係生完自己變咗另一個人咁，以前對住我老公嘅溫柔、耐性同包容，好似隨住個女出世冇晒