唔好意思 故事有啲長
年紀都唔係細 想35歲之前可以生到
所以結婚1年搬左新屋上年就開始試
見住身邊個個話生就生 唔知原來係咁難
上年2月試左2個cycle 中左 點知宮外孕 搞左幾個星期 不幸中嘅大幸係唔使手術唔使食藥 自己無左
之後花左啲時間再試 今次1個cycle就中左 同自己講唔係宮外孕已經係成功嘅一半
可惜都係只係成功左一半 6月嘅時候只係8個星期就無左 睇住由有心跳到無心跳 到今日再講起都係好痛
之後因為自己有啲懷疑同醫生嘅建議下，最後發現原來係有抗磷脂抗體，之後就開始食藥
同自己講，知道咩事可以做多啲野，黎緊再有就可以大啲機會順利
但就係由開始食藥到依家，試左就快半年了，都仲係無，開始懷疑自己，到底係咪真係會得…
自小產之後開始唔係好夠膽睇FB IG ,
因為一開只會見到個個影住自己個B或者post自己嘅大肚相
我亦唔想同覺得佢可能會有左或啫岩岩生左嘅人gathering
岩岩小產完返工好驚同事放產假返黎…
好多好多無諗過會出現係自己身上
雖然依家大部分時間我都好正常
好似平常咁生活
但我都知道有部分嘅我 都係未曾復原
希望有一日我可以係到同大家分享成功嘅故事
但之先好想有人明白個種強烈失落、無助、氣餒、無辦法控制嘅感覺….我自問已經係一個好樂觀積極正面嘅人，但係真係好難受….
10個讚
你會唔會比太大壓力自己？
好簡單，半柸水理論。
由開始試至今先半年就已經中過幾次(雖然唔成功keep住）唔係已經好正面嗎？
要諗下「才半年，有好多時間」還是「成半年啦！冇時間啦！」
要中獎要放鬆架，只要自己已經問心無愧，其他野交比個天啦。
比個例子你，我之前38歲就快39，自己冇戎口冇食中藥，老公又懶行房，每個cycle只肯同我做3次⋯我都同自己講可以做的我已經盡做，唔戒口因為我覺得開心更重要，情緒好身體先好，老公懶我都迫唔到，不如欣然接受，結果「才半年」已經有左，之後一直順利。
試下改變一下心態吧
6個讚
係因為試過好快中
連醫生都同我講咁你應該好快得
然後都唔得呀 先會有失望
其實個個都知要輕鬆
但問心當你想有但每個月發現都係唔得
失望唔係好正常？
當得左你睇返轉頭 當然可以好輕鬆講
每個人都有唔同經歷 我都知都有好多人試好耐都唔得 係睇你點睇
但係喺想生但生唔出嘅路上
有時有情緒亦好正常
我亦只不過想取下暖
不過我都明白唔係人人會有一樣情緒 亦唔係人人會理解
其實2樓都係想你轉換下心態令到自己唔好咁著眼於試咗成年都仲係0
或者你想圍嘅大家都仲仍然一直努力嘗試嘅爐
試下由今日開始忘記果啲乜乜cycle,乜乜排卵期，去個小旅行，又或者staycation一下，有feel 咪做，冇feel 咪當大家relax 放個break
1個讚
我去左旅行啦
玩得好開心添呀
不過最後現實係都係唔得
唔係我日日係到度 而係M黎都會知道
除此之外
其實唔計呢件事我生活都好開心
老公好好 工作又開心
不過可能因為我出post講 咁我主要都係講呢件事都所以你會覺得我好緊張
小產完頭2個cycle 我都認我係好緊張
但之後個啲cycle 已經放輕鬆左好多
覆診個醫生都有同我研究之前咁易得點解食左藥反而好似唔得咁
我都同佢講可能自己緊張呢
所以先會去下旅行 做下其他野分下心
已經無特別計住要交幾多功課 只不過係每次又黎m咪又失望下咁
不過緊唔緊張呢啲好難量度 我話我唔緊張你都可以話我都係好緊張
其實我諗中間嘅情緒主要係因為曾經失去而好想再有 ，然而事情唔係預期中嘅失望、懷疑同擔心
都係要講我唔係日日都係咁嘅情緒，好多時都係一黎M就又有情緒幾日，而我其實好接受有呢啲情緒，因為有情緒係好正常
我出post只係當下又見到舊同事又生啦，希望有差唔多經歷嘅人可以互相加油
因為我身邊嘅人，要生嘅都好順利生咗1,2,3個 ，都無乜人明白點解我仲未生
同埋其實我都無計乜
我都係出post個下先發現一年
如果唔係都唔會寫”原來”已經一年
2個讚
我唔算係同路人，不過當時都係試咗一年有多嘅人，好明白每次見到m come 嗰種失望… 見到人哋share 家庭生活，影大肚相，宣布喜訊時，自己會諗埋一邊，覺得啲人好討厭做咩曬命 
當時先知道原來生小朋友真係唔係必然。如果有expectations的話，無論係人哋嘅或者自己嘅，又會個失望再大啲…
呢樣野最惡搞係好難控制，努力同結果係完全冇咩關係… 同埋好諷刺地見好多人話試咗好耐一放棄就即刻bingo，估你唔到過蠱惑的槍
同埋啲reply 都留意到樓主壓力比較大，老實講啲回應係有少少起gong。我知咁講可能你會唔開心，但無論係為自己自身或者為bingo 都好，都要多多留意自己壓力嘅反應，尤其呢個定時定候嘅循環唔覺唔覺已經大約半年，有時身處壓力之中自己係真係會唔覺，其實心入面係一直好在乎，當時我嘅壓力都有少少拖垮自己同身邊嘅人，m come 見到紅之後同先生講嘢都粗聲粗氣，問多兩句會話佢。我當時冇留意，都係事後諗起先知。唔係話樓主都有類似行為，當然開唔開心，大唔大壓力得自己先知，我地見到嘅都只係你喺forum 嘅回覆。只係過來人諗法提醒你搵個方法面對同排解壓力係好重要。加油，吸氣，呼氣。
6個讚
加油
有冇信仰？
有冇聽過金花娘娘？
求姻緣求子女
上網睇下有幾間廟
我個人比較迷信，亦覺得一試無妨
祝福你
1個讚
係啦
去下無妨
感覺樓主生理上係可以自然懷孕
只係未遇到適當時機
利申: 我本人就係自然懷孕超過一年都唔成功去左睇生育科
只可以講有時唔係自己想諗住幾時有
但係一見到人地貼d 相出黎曬孕照曬BB之類就好唔開心
呢個係好正常
我支持繼續遠離IG 同FB
娛樂新聞都可以盡量睇少d
雖然我唔係你同路人
但都抱一下先
明白你面對呢一切都唔容易
祝兔年好孕
4個讚
樓主加油，其實好多人同你情況差不多，抱抱 
我已經有check排卵勤做功課，但偏偏就係無，做左好多檢查醫生都話無問題，醫生半講笑咁話有時人生就係咁 
當時每次黎m都偷偷地喊，因為唔想老公擔心同唔想佢有壓力，打算放棄果時突然就有了，等左七年 
結果40歲先做新手媽媽，但諗番轉頭我哋多左七年時間好好準備心態同埋經濟，上天已有安排
加油，希望在明天
7個讚
我本身無信仰的同埋本身唔係迷信嘅
但我估去到有啲位應該咩都會試下
多謝你分享
2個讚
我三十頭
一直有同老公計安全期咁避孕 4年幾一直都冇bb 到到依加覺得財力應付到 可以計劃啦
但過咗3個月都係冇聲氣
有照過子宮係一切正常（但冇做amh果啲）
可能你話我後生啲啦
但我都一樣係見到人哋有bb都會心生羨慕
最攞命嘅係 生bb唔係努力就得
考試考牌我都仲可以努力完有成果
做嘢努力都會有recognition/progression
唯獨係生b 真係好無力呀大佬
都多謝你呢個po令我可以呻一下
平時喺人哋面前都係講大話 話「未係時候 」
「順期自然」又或者「過二人世界」
但真係啞巴吃黃蓮呀
我個人又真係少運動 又揀飲擇食
或者我係時候be healthy 一下
另外我都會做下期望管理 如果一直都冇嘅話 我人生應該揾咩做focus/寄托 (sosad) 本身都唔係事業型 都諗住嚟緊十幾年先focus喺細路仔度 依加空白咗
（唔打算做人工/領養
）
2個讚
跳下繩，我之前試咗半年先知自己多囊，同埋自己經期不嬲又唔準，一時多一時少，一時幾個月都唔黎，跟住有試下跑步，後期又試下跳繩，冇耐就有咗
我都係一開始好快就中左… 宮外孕… 要打針, 有半年唔可以懷孕
之後一直都唔得
而家已高齡了
我開始時好想生, 老公未急
到而家我想放棄 (冇想CHECK紅D), 我老公有表示想要B
我同你一樣都係好怕見到人地一個二個有左又生左, 一個生完又一個
有時都會喊~
我曾經日日做運動
又戒晒我自己覺得唔健康的野, 如雞, 凍野, 牛, 肥野, 茶… 總之我咩都戒一餐
貴一貴中醫都睇, 又量TEMP, 又浸腳…
點知都係唔得
一完M會CHECK紅D, 日日CHECK, 一CHECK到粗當晚叫老公DO, 第2日再CHECK到粗, 第三日又CHECK到粗, 我老公覺得太緊張有時唔想, 我就會喊
成個人好DESPRESSED
試左好耐啦, 總之都冇聲氣
我又唔想人工, 又唔想領養
或者要學識接受
1個讚
我都試左一排，但心態上好fluctuate, 最近想積極少少做IVF
1個讚
真係唔好上D FB IG, 我明你心情
唔關生B事, 我以前都會越睇越唔開心, 慢慢就唔想再同O個D人聯絡…
老實講, 其實我覺得D人POST野上去就係想晒命, D POST越黎越誇張, 所以我E+直頭唔用
另外, 唔好成日諗住"今次會唔會中"
俾太大壓力自己, 會有反效果
好好enjoy, 心情輕鬆, 效果會好D
1個讚
支持
有無排政府?
定想直接搵私家?
我早幾年已脫離fb 
真係唔明人地去旅行、食好西、同個仔去玩關我咩事?
日日身邊既人都幾百個呢d update 唔明點解要浪費時間追呢d post
宜家fb 只會睇下黃店專頁
我都經歷過呢個過程
果陣中醫都睇左大半年
明白做左咁多野最後都唔中係幾灰心
抱抱
1個讚
諗住去台灣做, covid前就有計劃, covid停曬所有野
1個讚
加油啊! 雖然我都仲努力緊，一齊拼搏!
我覺得心態都好緊要!