留港要跟返香港個套，而家好似除咗返學，少不免要有興趣班
我自己覺得興趣班玩一兩個已經好多，因為平日要返學都已經好忙，不過興趣班如果發展得好可以變技能，即使佢將來升學唔ok都可以有一技防身，所以一樣都要有
對我黎講興趣班好似係個安全網咁，咁講唔知會唔會好狹窄
我小朋友仲好細，幼稚園咋，返學真係忙左好多，對幼稚園小朋友黎講，佢返學之後少左時間玩就會有掙扎係咪參加興趣班
去興趣班玩又係咪佢內在需要嘅個一種玩
我問佢佢好多時都一時話留係屋企，一時話想返去暑假俾佢去過玩嘅興趣班，除咗掙扎仲驚佢一時一樣
唔知大家點去判斷，通常係家長自己要求佢去學定小朋友自己提出再去？前者嘅，咁小朋友唔鍾意又點，或者點樣培養佢鍾意？定係乜都試吓？
如果等小朋友叮一聲會唔會太佛系呢
？
當佢哋想放棄個時又點開導好？
大家交流一下
幼稚園至初小，咩嘢都可以俾小朋友見識下，但係唔係 join 哂，唔得唔喜歡就算，始終財力和體力有限。
去到高小，佢應該知道自己嘅興趣，選一兩樣野玩落去。
上到中學，well… 等佢要求，父母也無得強求。
我仔而家小一，喺幼稚園時期，我有比佢上過好多唔同興趣班，例如籃球，足球，劍擊，游水，溜冰，rollers，鋼琴，畫畫。全部都係佢曾經話想學嘅。
籃球同足球玩左幾堂佢話唔鍾意就停。
劍擊玩左幾個月，疫情停左之後佢話唔再玩，咁我就停左。
鋼琴學左1年，佢冇呢方面天分，有d吃力，叫佢練琴佢會唔開心，所以都係停。我覺得興趣班要真心鍾意先可以事半功倍，唔鍾意，死迫佢練，可以嘅，但大家都唔開心，好無謂。
游水佢鍾意，但之前針卡問題冇得繼續學，嚟近夏天會再繼續學返，佢話想學。
畫畫佢又係好鍾意，所以會繼續。
嚟近會學花式跳繩，新學，睇下佢學完1期有咩回應。
溜冰同roller佢都鍾意嘅，不過我之前比佢學左基本功，前後停呢d，諗住比佢自己玩下再睇下係咪仲想玩先。
你小朋友升小有冇分？自行入唔入？定大抽獎？如果要大抽獎最好就學2-3樣興趣班，最好係有cert可以拎，同最少學半年以上，為咗portfolio有嘢寫，如果唔係叩門時就輸蝕左啲。而家好多小學都培養一體一藝（運動+音樂/藝術），可以係呢方面諗一諗。
如果唔需要為portfolio煩，其實就真係可以樣樣都試吓，睇吓佢有冇興趣，報之前可以俾D片佢睇下個樣活動係做乜，等佢心中有數先決定報唔報。
如果小朋友想放棄就了解下原因，睇吓有冇方法幫佢解決，或者set個目標俾小朋友，會有獎勵之類，等佢冇咁容易放棄。我小朋友上咗跆拳道一段時間都話攰，唔想學，我就同佢傾好，最少要升到黃帶，如果升咗黃帶之後真係唔想再學落去，我就同意停咗呢個興趣班。最近佢終於考完黃帶，幸運地佢仲好鍾意跆拳道，仲話想繼續考上去，希望可以keep住學。
我就係覺得咁，淨係日日都接送都攰到傻，唔鍾意我又唔想迫，學樓下嘅sis講盞大家都唔開心
你講得簡而精，啟發到我，感謝你分享
多謝你咁詳細，好有用
同埋你提出有好幾樣興趣我本身都冇諗到
差啲唔記得疫情同針卡都係一大阻力
雖然而家冇左，遲啲唔知點
我其實都好想俾佢試多啲
但返學嘅日子有限，體力同精神都有限
你係咪最初試嘅階段通常都集中係長假期，好似聖誕，新年同暑假
試過佢揀到就再長期咁參加
你小朋友好幸福
我都好同意如果揀到佢鍾意嘅去學就好，唔希望為興趣班要勞氣傷神傷感情
多謝你提我
我就係唔識呢啲，新手媽媽，又唔太識計分，驚太佛系太遲開始諗呢方面？！你都提議如果揀到學最少半年比較好，咁由開始試，揀到興趣，然後真正去學都會用左唔少時間，真係要的起心肝搵下學咩好
成功令佢堅持真係好鼓舞，我小朋友算比較容易放棄嘅人黎，可能細個啦我好擔心要成日同佢拉鋸，好希望慢慢教識佢咩係堅持
漏左，仲有跆拳道，考到綠帶，入唔到體育館就停左。
唔係長假期先學，係平時嘅日子學，pn同k1上學期時返全日，就只會喺星期五學1個興趣班，星期六上午1個興趣班（k1下學期開始停課）。k2同k3轉左校返上午班，咁下午都有3日會學野，再加星期六學1個興趣班。
你觀察下小朋友平時喜歡啲乜，女仔學跳舞、畫畫、樂器，男仔學踢波、跆拳道、劍擊等，而家其實真係有好多唔同嘅興趣班，又可以試堂玩下，K1-K2可以試多啲先，K2下學期要揀定一樣學，升K3已經要開始準備升小直資面試。希望幫到你有個概念啦。
主要透過引導同觀察去幫佢留意有無興趣班岩佢。例如佢成日唱歌，或者好朋友去學游水，問佢想唔想試，比佢有得揀。
學左之後想放棄就要睇情況，咁細個唔想比佢一種想唔學就唔學/難就可以唔學既錯覺。但太push的確會影響親子關係，所以家長要拿捏得好。
For 我自己，比佢報班我會先問自己跟到幾多先，唔想浪費錢，我連興趣班都跟得好貼，親自接送而且會問老師拎feedback, 咁樣同老師傾下，自己又留意下，其實慢慢就睇到個班係玩玩下水平，定係小朋友有talent 可認真繼續，定係個center 都麻麻地可換走。
小朋友咁細，好多野都唔識講，講放棄就最易，但個班適唔適合小朋友其實仲要睇好多因素，例如老師夾唔夾，同學係點，上堂時間遠近，唔止課程內容咁簡單。家長最好係觀察多d, 聽聽小朋友意見，咁會比較易搵到適合佢發展既興趣。
我就無特別為考小學而報興趣班，都有offer 既。不時不食，小朋友手眼未ready 就局佢提早發展係大家都辛苦既。所以做家長都要留意。
該主題在最後一個回覆創建後180天后自動關閉。不再允許新的回覆。