售出貴價飯盒的餐廳是北角「黃店」「人人和平」。人人和平昨日在 facebook 表示，年初疫情高峰時生意轉差，老闆曾想過賣雙餸飯，「但我哋平時連入貨都只揀靚食材，實在唔想做 cheap 自己」，於是沒有實行。
昨日，人人和平指有一間公司的新加坡客人來港開會，因為初抵埗按例無法即時入餐廳食飯，於是就查詢他們能夠提供甚麼午餐，「小編決定將腦細構思嘅雙餸飯變成 $188 高級和平小菜雙餸併燒味飯，有馳名燒味、帶子 / 蟹鉗，仲會確保熱辣辣送到」。按照人人和平提供的圖片，飯盒的餸菜包括最少 4 件咕嚕肉加菠蘿青椒、一件蟹鉗、菜心、叉燒和燒肉各兩件。人人和平並指，「做人做生意都要有麝自然香，唔好似高官走去柬埔寨招商反而話柬埔寨冇人質事件，真係影 cheap 晒香港人。」
人人和平的帖文吸引不少網民留言，有網民就質疑飯盒的利潤可能很高，「188 蚊，賺你 160，果然係高級飯店」、「食水深到呢」、「兩三年來都不時支持你哋，不過我就覺得呢個價位真係高咗啲喇」、「今次幫你唔落」，「只睇張相，$68 都要諗吓」、「如果真係靚食材 188 唔貴，但你張相影出黎都咁肉酸，點俾人食呀？」、「好奇想知賣呢個價係用乜嘢肉？係咪用西班牙黑毛豬做嘅叉燒、燒腩同埋咕嚕肉？用邊一款蟹做嘅蟹鉗？」
不過，並非所有網民都批評餐廳的做法，有網民就認為製作飯盒以至經營餐廳都牽涉不少成本，不能見到上述定價就認為定價太高；亦有網民評估，今次的高質飯盒連運送都是餐廳跟該名客人「度身訂造」，應該當個別事件看待；「有價有市，有咩問題」、「覺得佢賣得貴咪唔好買」。
而翻查人人和平的餐牌，他們的午餐定價 55 至 80 元不等；如果以日常餐牌計，揚州炒飯、乾炒牛河、櫻花蝦炒飯定價約 100 元。
其實我認為… 覺得唔值、咁貴、嘩唔好去搶嘅… 不如唔好食。
3個讚
呢盒野最盡值 $70
黃店啲嘢係貴，我早幾個星期去九龍灣大渣哥食 lunch, $70 幾元一碟滑蛋牛飯，味道係 OK, 但如果附近返工份工搵少啲都唔會常常幫襯。下午茶都貴，$50 左右，下午要出來蛇王都貴過人。
黃店收得呢啲價錢，質素一低一定俾人插到開花，藍店都係又貴又難食又搵笨，但人哋擺明係奸商，入得去就願者上釣，中伏都係自己攞嚟。
1個讚
X2 最緊要明碼實價，覺得貴咪唔好幫襯囉，嗰班網民好多餘
7個讚
呢張相個炸蟹鉗……
有d 似凍肉鋪買果d? 
(利申: 未食過佢地既炸蟹鉗)
1個讚
係啦， 如果係附近返工， 我自己唔捨得食70幾蚊一個lunch
五六十就最好
有四十都唔區（40幾可能係外賣價）
如果188， 我都係出返去先
（雖然係炸蟹鉗， 但真係唔平）
3個讚
佢呢份係tailor-made比商務客，同對家開會討論完，都唔係賣比街客食。
要符合客戶要求有好多背後心思都係成本，已經唔係單純一盒飯嘅價錢。如果咁計，好多corporate service都係印下文件簽下名，紙筆墨水點解可以收幾千幾皮。
再何況，大家關注緊「黃店」標籤同呢樣完全無關係，唔覺得一個新加坡公司客戶會太Care顏色。好多公司budget人均$188根本唔算咩，最主要係可以符合到佢要求。出面連鎖買杯咖啡+個三文治都過百啦。
11個讚
如果收得呢個價，除咗食物質素有保證，做好擺盤好d先令人覺得有差別
4個讚
唔識呢間野喎
北角黃店 太平飯店 之前有做唔住出兩餸飯
佢本身打冷，兩餸飯有蝦有蜆都係$6x
近炮台山有間好出名兩餸飯，有龍蝦有大閘蟹都唔洗$100
早幾日先係幫人係 北角皇后餐廳 買咗兩個焗豬扒飯餐（包湯、飲品），有折扣都二百六十幾。
另外同呢單無關係嘅問題，點解大家覺得黃店食水深（which我唔覺）有問題？
食水深呢樣嘢，有兩種睇法：一種係佢賺得太多，成本低賣得貴。如果係咁，大家都無辦法判斷佢成本幾多，只係靠自己估。結果感覺往往黃店食水深，因為佢地一般用料靚，唔會偷工減料，呢樣大家又唔會知道，反而覺得佢同樣嘢賣得比人地貴。實際上如果咁計，金拱門先至食水最深。
跟住佢地會話第二種，D嘢賣得唔值呢個價。咁其實都好簡單，唔好幫襯就得。如果你本身係黃，買一樣唔值嘅嘢只會係令黃圈蝕錢，唔需要勉強。人地可以都有佢嘅target client，即係人地賣紅酒你想飲可樂，咁咪去搵可樂飲，唔係覺得點解人地唔賣可樂。如果間店無足夠市場同生意價值，佢自然開唔落去，例如龍門、梗秸都係例子，除左人人和平，藍Page仲鬥過友利，不過友利都開到第五分店。
至於如果覺得買黃當慈善，咁就唔好話貴唔貴，不過本身呢個無必要。
何況黃店一樣有Nancy客，佢地識得賺多D錢，只會覺得係好事。如果唔啱心水唔需要勉強去幫襯，返工帶飯先係最平。
3個讚
我都覺得問題係呢張相表達唔到 $188 商務便當既精緻度
好奇睇下"人人和平"facebook page
發現出左兩個post 回應呢件事
一個就list out 佢每碟餸單點售價
另一個就post 張外國果汁相出黎問人覺得罐果汁值唔值賣英鎊三磅
解釋所有野都係成本
與其出一個又一個post 解釋 $188 定價同背後成本
不如借呢次機會試下整多幾款精緻少少既商務便當
post 多幾張靚相
或者可化危為機
吸引其他公司客訂購?
1個讚
做得黃店，係要承受比狗騷擾等等額外風險，將風險計入價錢係合理做法
1個讚
關乜事？
$16 雙拼飯又話人地黑心豬肉
乜都有人講架啦
明買明賣，佢tailormade 加送貨又唔同計法啦
3個讚
佢衰在用個勁cheap嘅膠兜裝住，啲肉又唔靚，條菜都亂咁擺咁，材料幾高級都死啦，真係樣衰過街邊2餸飯。
認真啲影啦唉。
2個讚
人人和平一向定位係中價餐廳，
菠蘿咕嚕肉，又真係用新鮮菠蘿。
叉燒標榜用加拿大豬。
個燒腩仔都幾好食。
疫情高峰時期，姊妹西餐店賣嘅港式蕃茄焗豬扒飯$100一盒，仲係只限外賣。
雖然係小貴，步驟同用料做足晒，拍得住酒店水準，一試難忘。
今次$188值唔值就見仁見智。
商務客，應該俾得起，同埋相信應該幾好食。
呢間嘢應該冇味精或者靚味精，
第二日翻叮嘅質素同第一日嘅差唔多。
1個讚
好重味精
食過一次以後唔敢去
返到屋企飲咗兩罐可樂都唔得
仲有叫個黑毛豬叉燒，Un 到不得了，食咗兩舊同佢講un 到嚼唔到，俾埋嗰兩舊渣佢睇，叫佢收返成碟等廚房自己返去試吓，佢講咗句唔好意思
最後埋單佢收我full price。我都費事同佢嘈，因為黃店丫嘛
最記得係第二日去產檢變咗妊娠高血壓
問我係咪食過好鹹嘅嘢
結果戒口戒咗6個星期
同埋樓面同經理夾埋屈後面枱客
明明有對夫婦預訂左一碟羊腩煲，仲話特登嗰日搵咗邊個高級經理定係老闆之一訂
講晒時間地點對話內容等等
佢哋就淨係話無 record，又話如果真係有預訂，佢哋會點樣覆電話嗰啲，跟住係咁單打嗰兩個人。
我哋一路食一路聽，都覺得有啲過分。
