喺香港已經夠麻煩
嚟到英國以為會好，點知仲麻煩
少少的溫差，熱少少又嘈凍少少又嘈
日日就為左件底衫發癲
叫佢著外套又話窄，叫佢唔好著又喊
日日就俾佢啲無謂事情勞氣
發完我脾氣仲要我攬返佢
我真係好攰
2個讚
幾多歲？叫佢自己決定得嗎？
我女係超高敏，好明嗰種煩已經去到令人崩潰嘅地步 
有時小朋友唔係嬲件事，係嬲你既語氣
1個讚
叫佢自己決定，事後唔好同人發脾氣
唔知係咪差唔多嘅情況，我小朋友著衫都好多問題，好辛苦咁逐樣解決，分享下睇下有無人啱用。
首先要控制自己唔好發小朋友脾氣，唔好覺得佢煩/唔乖，因為佢都唔想。我自己做錯過，結果小朋友寧願凍親都唔肯著件衫，我就知道佢真係唔係唔聽話。
然後要熟知質料。我有個小朋友皮膚敏感，唔著得冷和羊毛，人造纖維一啲啲得，簡單嚟講就係要滑嘅質地。但英國多數暖嘅衫都係毛低。
M&S大部份毛底，Next同H&M多啲滑底。有時去到店舖摸過啱，但無size，就網上再訂。有時無貨摸，就網上照訂，唔啱再退貨。試多幾次，我睇相就大概估到質料啱唔啱。
開頭好慘，買嘅衫一半都唔用得，買一件衫要用一個月時間。後來熟能生巧，問題係可以解決的。
最慘係佢對校服敏感。我搵左半年，先搵到似學校運動褲，但唔敏感嘅款。但jumper搵唔到，所以我仔寧願凍都唔著，我最多俾件低衫佢。老師要佢著jumper，我都要同老師解釋佢敏感唔著得。
如果都係搵唔到，就打底，將皮膚和敏感衫隔一隔。
另一個固執仔，就不是敏感，只是sen固執。例如唔肯著長褲，買咗好多款質地，有佢鍾意嘅圖案，勸到佢著，之後就易搞咗。
對固執sen好重要嘅，係事前通知。早一日話佢知要著咩，佢話要窄/唔靚，就早一日慢慢勸服佢。臨出門口通常都無時間勸。
打鬧一般無咩用，最好用搞笑方法等佢唔記得。例如：好窄咩？超人嗰件仲窄！我哋比賽睇下邊個著得似超人？
佢一接受咗一次，就會易搞好多
21個讚
好似神經質咁
我都唔知我小朋友係咪高敏, 又話凍又話熱又話窄又話鬆。佢2歲話好中意著牛仔褲就買左幾條, 但係買完之後就話硬唔中意著, 係夾硬來著左都要除返。有條褲摸過話想著, 之後套到隻小腿一半就話唔著要除返。
拉拉扯扯一年, 由開始要返學著校服, 要戒片著底褲都係日日嘈。叫佢自己揀就揀哂啲睡衣出來, 天熱仲要著長䄂。出到街俾人問佢做乜著睡衣我覺得好醜, 但係都廢事同人解釋。我都好想揾到岩佢著佢嘅衫, 買左好多都話唔著, 出去街睇又唔肯試。就轉季, 見到佢啲衫已經唔岩著, 但係我都唔敢再買。我真係好想俾幾十蚊收買人地啲二手衫俾佢著算。
我都好想知佢係SEN定係高敏定係統感問題。我諗返我自己(成人時)有時都會覺得件衫會好唔舒服, 皮膚會覺得痛, 都會想哂啲衫, 可能係遺傳都唔定。
攬佢真係萬試萬寧, 佢吵鬧發脾氣嘅時候講完你要講嘅野, 佢接受唔到就攬住佢, 攬攬下佢自己會冷靜到。諗下如果攬下佢可以慳返好多engery, 不如一早就攬住佢 
1個讚
我仔呢期都唔肯換衫，我夾硬換左夾佢去返學
佢發脾氣好過返學遲到
你對高感咁做後果好大鑊的 
我女細個都類似，呢件衫唔舒服個件太熱太短太長太緊又或認得哥哥著過唔要著。
之後無理佢，話得呢啲咋，大大下又好左，只係tag就一定要剪（佢自己剪，一見咩衫或褲有個tag就搵較剪）
我女應該都有啲敏感底，細個怕草怕沙怕水，去沙灘草地喊晒口。但我無屈服，反而去多啲，三四歲到就唔怕啦。
1個讚
你覺著衫果部分，我細個都會咁，點著都唔舒服，好想喊好憫憎。。。
唔洗窮到冇衫著啦, 你諗下三十幾度都仲要長衫長褲咁叫唔叫嫌三嫌四
我唔知點樣叫物質豐富, 我淨係想佢係岩嘅場合著岩嘅衫姐。如果揀衫係因為唔靚, 唔中意個顏色乜乜77, 我一定會爆佢。但係見到佢想著一件衫, 著到一半無啦啦會爆喊話唔舒服嘅時候就真係唔知佢做乜。
岩岩開學果陣, 死話件校服唔舒服, 有鈕又唔中意, 又話條短褲腳HI到唔舒服。日日返學要兩個人㩒住同佢換。如果學校可以唔著衫返學, 我實唔同佢著。我地用左好長時間同佢沖涼用海綿刷身先好少少, 點知停幾個月課一復課又反彈返。我都想知唔錫佢, 甚至打佢一鑊係咪佢就會自己著衫呀。
1個讚
我個仔由幼稚園至小學六年級都係咁，應該係再嚴重啲，要睇心理醫生。
你要有無比耐性跟佢玩十年。
佢上到高中已經正常返哂，現在大學主修心理學。
1個讚
我個無咁嚴重
要剪牌，所有衫褲真係著前比佢試過先，可能只係收口收得唔好，多咗線口，條褲cutting 唔好，件衫太貼等令佢唔肯著。有時短褲hi到佢粒濕疹，都會令佢好抗拒果條褲。我而家盡量買簿料褲，鬆身衫比佢著。佢著得舒服會叫我買這種這種衫，我會跟佢
帶出去多啲戶外活動，等d皮粗d。同佢玩咪埋眼，用佢其中一個公仔摸佢，叫佢估下係邊個公仔摸佢，以減低敏感度。lee兩個係我自己諗出來，無跟據的。
為佢我練得一手針子，佢幼稚園時要用滑身的滾條包車口，尤其大脾內側
好彩，越大越唔敏感了。
大家加油
2個讚
很明白
我仔就是三十度都要穿長袖，我真係激到喊出來，你地唔知以為我做呀媽痴線逼佢三十度穿長袖。
我仔細時我懷是高敏，到五歲評估話佢亞氏保加及感統問題。經過訓練開始個人無咁固執，來左英國天氣一年唔洗穿很多短袖他十分適應。係學校游水要赤裸上身加唔可長褲，要老師心理輔導下，咁佢都接受。
其實唔知既人成日覺得是縱壞，但我地鬧又鬧過訓又訓過逼又逼過，搞到大人人都癲，幸運的外人唔會明
1個讚
真係唔知有咁多小朋友有咁的問題
1個讚
高敏兒唔係單止皮膚敏感，係性格各樣加埋
1個讚
多謝你，呢個真係最難，一星期我起碼2日係黑口黑面咁送佢返學，日復一日咁好難唔燥
佢知道我唔開心的，之後會say sorry，但下午會為同一個問題再嘈過
1個讚