超低能爛gag
自己忍唔住傻笑
如果國歌加返中國，共匪條氣會唔會順返啲?
願榮光歸中國香港
Glory to China Hong Kong
唔俾講香港加油，又成日話要中國香港
咁係咪要中國香港齊仆街先得？
寫幾句農管，之前對大白同香港未來有啲諗法，難舉例同長篇大論所以冇寫低，大陸搞農管就好容易一齊睇到端倪。農管搞嚟為乜呢？農村錢唔多，唔關財政事。農民鬆散冇組織性，屋同農村維穩冇關。為準備打仗要增加糧食生產？唔會啦，層層濕腳，減產就有份。搞乜嘢同大白又有乜關係？大白係一班蝦蝦霸霸嘅爛仔，大城市經濟唔好又多一批以前打工廠工嘅盲流冇嘢做，呢批三五千萬人先係動亂嘅潛在風險，政府又養唔起，唯一解決辦法就係比小小權佢哋繼續去蝦霸更弱勢一群。呢幾日好多打交片，大陸人由上到下都係以為自己有權用盡，我話你係就係，我話唔得就係唔得呢啲說話聽過晒，蠻荒世界鄉下就係咁。香港慢慢都會睇齊，公職人員已經係咁，跟住到中資機構，紅藍港人，跟住到成個香港都會係咁。大陸包括港澳成個社會結構都漩渦式下跌，難講幾時有大規模反抗，未必係政府鎮壓，大陸最大可能係自己打自己。最後香港都有一批一樣嘅賤種，港共已經安排好點養，唔係做差佬就係關愛隊，梗有一個喺您身邊。
2個讚
都可能同黎緊(實行中)數碼淫民幣有關 任何資金都要入冊入賬 農民最唔聽教聽話 管在源頭
低智人管治智識人 
死路一條
講兩句習帝同中亞國家開個乜嘢峰會，新聞睇到張相，第一個反應係DLS搞乜L，唔係因為又宮女又太監又cosplay 又復古，係擔住塊高長身紅旗，上半有個白色圓形，中間有個黑色圖案（原來係個唐字），加上大紅色背景。因為睇新聞張相唔大，驟眼睇完全就係80幾年前第三帝國發動二次大戰宣傳產物。行得皇朝帝制皇上可能真心相信天朝打仗必勝，千秋萬世，心水清局外人要有血腥改朝換代心理準備。
器官捐贈之前寫過冇新諗法。
國泰空姐段錄音聽咗，語氣似講笑多過歧視，我仔女講錯嘢我都可能差唔多語氣笑佢哋。錄音冇前冇後，唔恰當就一定，有冇歧視難講。有心人裝冇心人，再黨國傳媒同香港班屎忽鬼加鹽加醋，大陸傳媒只有propaganda，一切都係黨國機器帶風，想迫國泰跪低係表象，成件事最終都係拉返去經濟喺崩潰邊緣，民怨接近撳唔住，唯有不停搵外敵分散焦點，只要對分散內部問題注意力有幫助敵人大小都唔放過，同類事件唔會停，對住大陸人要醒醒定定。
四川地震香港究竟有冇捐二百億？可能災民真係冇收過任何捐款，所以香港榜上無名。
好消息一段，公屋改申報資產要求同扣分制，好期待藍廢人鬼打鬼篤背脊，憎人富貴厭人窮，一定互篤。
2個讚
朋友比新聞我睇，師父級氣功大師食瞓痾都練緊工，退休後逍遙江湖，係咪10歲見識睇完功夫，高人比咗本如來神掌之類秘笈佢練，打敗黑暴壞蛋之後開糖果店賣波板糖。唔知呢個大師會唔會借啲易扼妹妹仔學生妹？
講個港樓半笑話，話說有位仁兄先幾年賣走10個物業撤退，佢話都接近高位賣出。地產代理話睇樓準買家問物業有冇不幸事件發生過，例如有人過世。代理話冇，而且業主係投資高手，運氣又好，越買越多越買越順，買賣從未蝕過錢，叫準買家放心。仁兄話心裡面媽媽聲心諗代理係咪倒佢米。另一位仁兄一路呻間半山豪宅高估價少少放盤，放咗咗兩年一路跟住估價減價但係睇樓人數一隻手數得晒。
華格納政變? 都唔係unexpected, 俄羅斯會唔會全面內戰或者再解體我唔識分析，中國皇帝肯定心驚膽跳，中共邊個有軍權更驚，我更關心嘅係香港班有槍有權契弟會更強硬表忠，惡性循環又跌多一層。
講少少對輸入外勞諗法，坊間好多分析，我睇法好簡單唔使諗咁宏觀長遠。香港大陸每一個同輸入大陸勞工有關嘅機關組織都有著數撈，點會唔落力。香港係有錢有職位空缺，不過幾千億美金幾萬個職位同大陸長遠救經濟失業潮所需只係杯水車薪，大家都係有得搵就搵心態，市民如是，有錢佬如是，官僚亦如是，錢有出冇入，唔知仲可以燒幾耐。
3個讚
用我見解講香港有關近況，大陸經濟同外交情況極差，京官想香港幫輕部份經濟困局，可惜香港樣樣唔好，人錢都繼續走，賣地收入印花同其他稅收樣樣跌，而且完全冇曙光。加埋唔知邊個低能諗到絕世好橋同流氓國家玩本幣交易，以為人民幣國際流通威威，攞人民幣同人換比人民幣更垃圾嘅貨幣，轉過頭人哋唔係同大陸買實金就係嚟香港用人民幣換美金走。
上級比壓力但係香港一班廢柴毫無辦法，廢柴包括班大陸官員，實事做唔到比京官媽叉問候小不免，卸膊唯有又扮做嘢揾香港人出氣，拉懲罰Me, 高調馬騮戲通緝八人，搞羅冠聰家人反映嘅係經濟究竟有幾唔掂，比京官小到撻皮，環保團體國安，無家者國安，類似核突扮做嘢小動作陸續有來，可以視作大陸香港困局一個指標。我之前寫過支聯會我捐過唔細數目，被騷擾遲早有我一份，撤退就係避開呢個情況。
至於會唔會停或者放鬆少少，我覺得唔會亦唔得。香港有權嘅都係一班以前出中環會自卑嘅鄉黑爛仔廢柴，冇學識冇見識，就算收指令要放鬆都控制唔到尺度，大陸經濟死到臨頭要清算港官港警習帝顏面何存？建制要食狗糧只可以繼續搵敵人繼而鬼打鬼，黃營繼續有人受罪，大家可能難過但係呢條係必經之路。
講下乜嘢四不青年，簡單講就係人口結構同經濟問題，大陸人最鍾意低智口號，好早寫低日本學者廿幾三十年前就預見今日問題，人口結構問題要用最慢嘅政策化解，最好係做咗大家都冇感覺嘅政策，今日叫人多生仔定唔生仔影響嘅係二三十年後嘅社會，今日嘅禍係二三十年前種落，冇得解決，只有硬食，加埋經濟週期唔就，就係今日大陸。成年男女失衡高峰仲未到，十年後多咗三四千萬適婚年紀但係冇家庭男性將會係爆發內戰危機高峰。
加拿大再放寬港人移民，類似政策相信就到頂，呢啲政策可能係西方歐美劏咗香港嘅最後部署。我有個預感不久將來會落閘，邏輯上應該係中港先落閘，但感覺係歐美停收港人。可能三幾年，幾年內決定唔走以後都唔會再有低成本離港移民呢支歌仔唱。有冇印象摩根大通總裁戴蒙21年尾防疫最嚴格時間訪港，我好相信當時一定要嚟香港原因係制定好撤資應變計劃，睇港股表現同資金流向應該大量外資已經開始全面撤資。我相信一般人撤退代價會加速上升。
同支持政府老友傾偈，佢心情煩躁又講唔出原因。我話你決定留港就唔使左諗右諗，但可以參考大量其他極親中朋友開好外國銀行戶口，送仔女去讀書或者用仔女名買間屋，留條後路比自己。
5個讚
樓主有冇fb ig
""根據該報轉述，「靖海侯」的文章主要講到近幾年撥亂反正行動對香港獨特性的影響，當中指出，香港國安法實施後，少數人（包括官員和議員）不問事情性質輕重，動不動拿國安法來做事；也有人慣性為國安法相關政策加碼，「無腦轉移壓力」，於是圖書館的「魯迅作品被下架」、無關政治的電影停播。
「靖海侯」批評這種「寧左勿右、不管後果」的行為是卸責、消極表現，目的不是協助管治，只是為降低自己擔責風險，此舉與「軟對抗」性質雖然不一，但負面影響相同。“”
老友比咗篇嘢我睇，話大陸識得掌握分寸反駁我話香港乜都國安情況唔會停。以上節錄一部份。
我加返我答案。第一爛仔黑警要表現權力，你有任何唔同意唔服從黑警都會用國安兇返你轉頭。第二所有公職人員都會用國安掩飾佢哋犯錯同無能。第三所有公職人員同其他藍屎廢柴都可以用國安做藉口吞卟，有乜嘢唔想做一句國安唔做就唔做。遲早會變到去街市投訴扼秤，大陸賣魚佬小返你危害國安，去銀行投訴過數問題，中銀大媽小返你挑戰國安，地鐵職員，大廈保安揸住雞毛當令箭串七七要睇你身份證，你話返佢又國安。唔好笑，大陸就係咁。
有咁好藉口比一班廢柴做錯任何嘢都可以過骨，要停並唔係幾個京官幾十個高官可以控制，文化一旦形成想返轉頭冇咁易，大陸可以試下再教育三萬黑警，幾萬個公務員，二百萬個藍屎睇下點。
3個讚
冇
寫低我對近日事件諗法
李克強，唔死，習總心慌。死，習總更心慌，所有中共高層恐慌。對往後中國理政影響係冇任何有見識有能力人仕會再諗貢獻社會，所有人都諗點離開中國自保或者發難政變。呢個就係我之前所講大陸條條死路。
721案，唔理點審點判，我同下一代都清楚知道港府大陸政權由上到下勾結中港澳黑幫恐襲市民，再誣告社會棟樑試圖掩飾自己罪行，改寫歷史。我深信將來歷史會將721列為中共瓦解嘅源頭。
資產價格，先講樓，朋友終於返香港賣半山豪宅，話比20/21年高峰跌咗超過3成。呢位朋友就係覺得開關後會有大量大陸資金嚟推高樓價嗰位，我睇法已經寫低，維持睇法，套現價會越嚟越平，亦越嚟越難。富人有幾個物業低價賣一個等於再壓低其他物業估值，自己企硬人哋減價賣一樣拖低估值，中上產唔忍痛撤資只能夠眼白白睇住自己資產日日縮水。
股，唔敢太睇淡，因為西方資金賣得七七八八，大陸開口話嚴打唱淡沽空，相信大行一來冇嘢估，亦唔想太張揚借貨沽空或者借貸比客人沽空自找麻煩。死氣沉沉會係常態。
強積金，睇怕進貢比大陸會變成常態，呢幾年唔攞走到退休同大陸社保差唔多，七除八扣輸通脹淨返比你好大可能唔再係掛美金嘅港幣，比返筆唔知乜幣你都冇大用。
美國新制裁法案，希望成事，法院到律政司中高層全落鑊，幾十個賤種被制裁當然好，更好嘅係道門又開闊啲，以後陸續有來，大把賤人唔使諗移民，永久享受封閉體制。喺香港嘅就再低調啲，比外國揼完搵黃絲出氣係指定動作。希望建制廢物快少少忍唔住鬼打鬼，我食住花生打氣。
暑假返過香港，感覺冇乜太大變化，要對外行業員工笑容少咗，特別係出入機場機次，機管局入境處海關個個口黑面黑。幾個星期見過兩次打交，印象好耐冇見過。夜生活真係幾靜，去過幾個酒吧區都唔熱鬧。街坊區鋪頭早收咗，比較大嘅飲食舖少咗，人流同幾年前差別唔大。唔知觀察反唔反應香港實況。
財赤，幾年前差唔多任何場合同任何人傾到呢個話題所有人結論都係政府要增加收入，依家愛國者治港有個好處係唔再需要顧及選票，減福利容易咗。收入一邊股樓成交銳減，印花稅無望。賣地似乎地產商唔多睇政府面色。加入息稅銷售稅比較正路，不過銷售稅成本高再迫多啲人上深圳消費。發起窮惡重新實行遺產稅就恭喜再恭喜留港有錢人。
兩年前估計今年尾之前實行外匯管制，依家未見風聲，可能太悲觀同估錯。越遲撤資成本越大大概冇睇錯。仍然深相信資產管制會數年內實施，有多餘錢擺海外完全冇壞處。
9個讚
周庭
人講我又講，你估大陸有咁好心真係放佢走，極權政府公安話妳可以去加拿大讀書，不過每年要回國報到，傻嘅都知走咗唔會返香港，所謂有案在身不過唔知點審，走咗唔使煩，費事越審越收唔到科，特別係周庭個人，恰細路女你班大陸匿喺大陸整死一百幾十個冇人知，喺香港一個周庭影響大過大陸死一百個。萬一周庭喺香港出事中共驚過佢。依家咁去外國大陸免麻煩仲有得抽水，話周庭畏罪又得，出賣戰友又得，呢種惡毒唔係一般文明人諗得出。唯有希望周庭同家人都安全，我估家人都走咗，唔好覺得太多負擔同使命。
其實寫咗細細段關於加稅，有朋友問如果加稅有冇乜嘢可以提早預備，我話留得喺香港，加入息稅/銷售稅/出入境稅都冇乜可以做。怕恢復遺產稅可以先轉移資產，又可以買定保險當預繳，睇下益政府定保險公司。不過轉移長者資產去外國要問清楚律師外地法例，萬一要喺外國辦遺產外國唔一定承認香港遺囑同法院認證。識人家人喺星加坡開咗戶口，家人去世，承辦遺產都有啲繁複。至於物業稅股息稅我傾向相信物業稅會比較重手，股票比物業流通太多，依家環境持有股票多數係大陸資金，股息稅喺自己銀包攞錢，一有風聲大戶散戶即賣，冇著數。物業稅可以精準收割韭菜，地產商到一般小業主無一倖免，開始可能先割持有多於一個物業業主，政府再冇錢就人人有份，大部份冇持有物業港人就算唔落井下石都唔會大反對。
3個讚
要樂觀嘅人仲似樂觀，到底睇唔透，定睇得太透？
仲有兩日聖誕節本來唔想post, 不過幾件事好不安，比上次話香港大小事全部受共產黨幹部控制更不安。
夏寶龍連唔講得嗰句都講埋，唔好諗個人利益，一切黨國為先。即係話共產黨已經預備好犧牲香港嚟保住佢哋自己。我唔覺得犧牲香港保得住大陸經濟，不過做炮灰就梗。
美國極速通過針對中港法案，都係表態隨時預備好開片，唔好有僥倖心態。
講句香港消費市場，好多人講過，消費疲弱同港人北上同外遊冇關，十幾年前北上消費已經係常態，羅湖火車同過關巴士嗰種墟冚比今日更甚。今日消費疲弱係因為大量高消費家庭移民加埋冇晒高消費遊客。惡性循環冇得救。
Patreon 支持海外港人被拉，妳係咪所有喺社交媒體講反政府言論都係用隱身戶口加VPN, 唔係的話就謹慎啲。就算細至呢度，如果係用慣常email login 都小心。唔係話網主會出賣資料，講真要hack 一般網站唔係難事。
港股港樓再急跌，其實過去幾年睇錯市以為股樓會大反彈嘅依家都唔會接受現實套現，我起碼一半朋友都係。夏寶龍已經講埋比大家聽預備為黨國犧牲，兩三年前係好價錢套現同冇咁好價錢嘅分別，未來一年將會係賤價套現同一無所有嘅分別。
1個讚
劉細良，醒目搵食講古佬。睇得多歷史係真嘅，不過都係有前設比較偏頗，唔全面。堆堆砌砌套落今日社會，更搵到好似啱晒嘅一段，百發百中只有佢啱，英文叫over fitting, 用於對未來推測冇參考價值。壞鐘一日啱兩次，日日噏更有啲中。講啱嘅成日翻炒認屎認屁，錯嘅預測題都唔再題，面唔紅眼唔眨，一般財演水平，我叫之為政演。
一開始想埋政府堆以為可以做King Maker, 唔受佢玩一百八十度轉身黐泛民，當時當佢真朋友嘅依家都過得唔多好。最想講係以下，劉去加拿大短時間就想做King Maker, 我自己住過加拿大/澳洲多年，劉講嘅除咗嘩眾取寵問題無限放大我諗唔到第二種講法。我唔知前市議員趙錦榮同劉有幾深交，小心不自覺做咗用完即棄扯線木偶。
佢節目我都有揀嚟聽，作為講古佬劉有佢一手，小事放最大，有咁極端得咁極端，陶傑黃世澤之流，實有光譜一極忠實粉絲，當免費娛樂我覺得可以，盲從就祝好運。
以上係我個人對劉睇法，劉同陳僑先生事件誰是誰非我完全唔知，亦冇睇法。
我記得寫過有一段嘢係針對劉，之前冇指明係佢，今日補返 :
“有人覺得共產黨乜嘢事都有全盤計劃，運籌帷幄，好似2003年後花十幾年時間計劃整治香港。我完全無法認同，你可以話大體策略定好，但係其中細節同發展都係由一連串偶然性事件互相影響，每一件事都係整個社會互動，唔喺任何人計算之內，一環扣一環，就成為歷史。”
2個讚
再寫劉細良，主要寫比自己將來參考同教細路。
聽劉都有七八年，頭幾次已經覺得唔對路，內容唔係全部同意，不過尚算啱聽。一路都久唔久會入城寨YT 聽下，大部份片都係聽十分八分鐘聽唔落去轉台，咁多年感覺完全冇改觀，由語氣到身體語言都覺得劉唔係可靠嘅人。我唔識任何同劉有關嘅人，知城寨台一路做大，亦完全唔知劉同咁多人有牙齒印，有段時間又話義務做乜做物，又話免費送書，以為劉係大好人一個。今日爆料嘅台都冇乜聽過，所以我對劉印象唔算先入為主。諗過點解咁多人支持但係我反感，亦諗過係咪多人支持所以我都繼續聽下。最後結論係劉用歷史講古，我都識用我知識講古，不過好多嘢尤其科學性唔係咁易有定論，特別係對未來推測，呃下人可以，呃唔到自己。近日睇劉舊拍檔講返劉作風，卒之明白點解我對劉有咁差印象，城寨根本係一個棚，又或者邪教，設定係信者就算唔得救都自我感覺良好，唔信嘅注定係失敗者。諗返轉頭做咗幾十年人總算冇白過，有基本閱人能力。
今次事件我清理咗好幾個YT subscription, block 埋推薦，一啲都冇衝動去睇返，八卦都冇興趣。
最後收返用黃世澤陶傑比較劉，黃頂多係傻佬一個，陶傑擺明搵食，人前係形象，廢話加嬉皮笑臉。兩人有排都未到反社會偷呃拐騙慣犯級數。
3個讚
每年721都重提，2019年7月21號，香港政府/警隊收指令勾結黑幫諗住教訓市民點知因為白痴無能錯漏百出搞到變成黑幫大規模恐襲一般市民。反送中事件早喺3-4月已經有大量澳門/廣東黑幫混入示威者挑撥攪事，後來直接有警察假扮示威者破壞車站店舖，放火，當然亦係共產黨聯同香港政府/警隊默許甚至積極參與。721/831之後我仍然未對香港前景太悲觀，只要中共肯交十個八個官員祭旗大部分香港人會收貨，西方國家亦冇口實全面針對中港。睇法全面改變原因之前寫低咗，事後發展到今日同我估計大致接近。反送中事件我少有參與但有全套應變準備，過咗五年發展一家人全身而退，生活亦因為適時套現所有香港資產而無憂，可以話係得益者。睇到721案議員區議員被政治逼害唔覺得開心，但係引發中港資產價格大跌經濟收縮同文明世割席引發為中共解體嘅係我估計，亦樂見。五年過去連審/判案都繼續嚇怕全球資金，共產黨低能程度唔到我唔講一聲服。有心理準備比港共逼害仍然不顧自身安全反抗嘅人好似黎智英/周倖彤我向佢哋致敬。我自問冇自我犧牲精神，亦覺得就算冇反送中事件中港一樣會走都今日境地，只係路徑唔同。當日發聲反抗又冇準備會受港共逼害嘅我為你難過。已離港又繼續發聲推動中共解體嘅我感激。因為負起家庭責任被逼留港嘅我為您難過希望你仍然有機會離開。
8個讚
奧運除咗壓軸馬拉松之外都冇特別興趣，對劍擊運動完全冇認識，冇興趣，亦唔識欣賞。點知同長輩食飯比佢轟炸，話阿女點勁點勁，為國家爭光。唔識嘅以為佢係阿女老竇。我即刻上網搵下乜料，同佢講阿女好嘢，一家人都淋漓盡致咁發揮香港精。廿幾年前驚共產黨移民加拿大，阿女又係叻女，幾肯定未讀完書就黐埋共產黨搵著數，咁上下大個覺得香港有著數就返去搲，返埋大陸讀個乜七學位，入埋啲左派團體做共產黨啦啦隊，退咗役大把世界撈，做政府又得，搵個地產商比個位佢又得，入大學做一官半職又得。我話同你哋一家都差唔多，如果細個啲開始訓練表妹可能都有差唔多成就可以為國家爭光。親戚唔順氣話你又知人哋唔係真係愛國為咗搲著數先代表香港，我笑笑口一句咁又係，你咁愛國都係97前雞咁腳走，可能阿妹一家都係真愛國。即刻轉話題講大陸出口幾勁，全世界都要靠大陸。
2個讚
睇咗記者被恐嚇報導，連家人，家人僱主，租屋業主，鄰居都被恐嚇騷擾，要承認我冇諗過可以咁快喺香港發生。騷擾性之全面除咗政府包括入境處，稅局一定有份，選舉事務處，審計處，土地註冊處同商業登記都可能有提供資料。咁廣泛參與除做污糟違法嘢除咗國安喺背後指揮我諗唔到其他。至於點解咁高調擺明車馬做唔見得光嘢應該係政府高層因為香港財政搞到一窩屎，幫唔到大陸不特只，連自己財政都快出大問題，儲備乾塘，大陸幹部應該比好大壓力香港一班廢柴官員，完全冇辦法之下唯有高調賴記者再打壓希望交差過骨。
有個少經驗唔知解唔解釋到香港消費方面嘅經濟情況。話說18/19年朋友有個細舖位租約期滿，幾個朋友諗過好唔可以自己做飲食，背景係一個係業主，一個整嘢食非常好，我就可以夾一份投資。我哋唔擔心冇生意，但係計完數出嚟發覺如果想回報有意義，唔係淨賺人工同非常一般回報率，打理嗰位冇可能唔奴隸式長時間工作。帶返今日香港零售/飲食，固定成本有租金，水電煤保險，人工。活動成本係入貨價。固定成本佔多，假設做一百萬生意額有七至八十萬基本支出，人工同投資回報就係靠最後二十萬生意額。有啲朋友久唔久會影啲相係食肆晚飯環境，大家都話三四成入座率係常態，如果七八成入座係維持營運，八九成係好盈利，三四成可以想像同執笠距離有幾咁近。諗唔到有乜嘢出路，有一半人口同政府血海深仇，想市面有返活力不設實際，要成本同價格減到同鄰近地區一樣財政上嘅痛苦我唔敢想像。
有啲幾投入運動但留港朋友話運動輸晒財務又困難心好灰，我唔敢同佢哋講同我一樣賣咗樓返外國依家都唔知幾開心。我開始同意習近平所講百年大變局，社會動盪一定有贏家輸家，個人層面暫時係我贏佢輸，47人同埋其他政治犯特別係冇心理準備嘅係大輸家。大局係中港國力倒退最少十年或以上，我再強調運動係全面大捷，唔係大敗。依家只似係動盪開始，出走去文明世界未必即時改善到生活，大部份人更大可能生活即時變差，但係下一代有機會喺正常社會成長，唔會政黑一家只要睇你唔順眼就有政府背後嘅黑社會恐嚇，亦唔需要成為極權一員都有出頭機會，每代走難都係咁，自己衡量邊樣嘢重要。
5個讚
今日賣晒港股，睇返我2023年舊貼話港股唔敢睇太差，對返圖表當日大概17500點，我自己跌落16000點買咗啲有息派低估值港股，有值搏率亦有正現金流。上星期升到上21000點已經準備賣，我一般覺得任何時候價位上落10%係市場噪音，所以等23000點，入市當時都係同一邏輯，所以17500唔睇淡亦等都16000先買。尋日去玩冇睇，今朝清貨。今日賣走後等個別公司如果派息率同股價吸引會再買。至於港樓，第一租金回報唔吸引，加上交易價貴，流通量低，現價格唔會考慮。不過如果有一日樓價跌到租金回報吸引我亦會考慮。至於我一日講到黑嘅外匯管制風險因為我用外地加外國護照開嘅戶口，再加上用美金抵押借入港幣嚟買，所以排除咗所有港幣風險。大陸托市運作已經好多分析我唔多講，夾升股市容易派貨難，大市同我買入價比升咗4成，即係息率跌咗4成，對我要比美金抵押對港幣借貸息差已經唔吸引。投資睇風險回報，只要唔係傷天害理就算極權統治地方我都唔介意。