籌備兩年，終於撤退。有啲嘢一早寫好，唔敢post，亦唔知post 喺邊。留個記錄，唔啱聽唔同意唔使回，當時運低忘記睇過。
走原因原因兩個字，驚內戰。廿幾年前睇過一編分析，中國人口結構出現大問題，大約於2030-2035年間男女失衡，適婚男人比女人多3-4千萬，普遍係低教育水平，加上人口老化，如果經濟好還可以維持穩定環境，如果經濟減速呢班人冇辦法向上流，甚至溫飽都成問題，對共產黨嚟講唯一出路係戰爭。以中國大陸貪污程度連越南都未必打得贏，唔好講比較親美嘅台灣或者印度。出口轉內銷，加埋條件成熟，對外戰爭打輸好自然變成互相指責，繼而內戰。
絕大多數人話“中國”冇可能內戰，首先我想講“中國”呢個國家概念只係近一百幾十年先開始，東方呢片咁大嘅地方，4000千多年有記載嘅歷史係廿幾個政治上冇點進步過嘅皇朝組成。戰爭，改朝換代一路喺制度下正常咁重複，差唔多每一個皇朝統治下嘅某一段時間“中國”都係當時世上首屈一指強國，共產皇朝執政嘅依家相對偏弱。而每個皇朝衰落都係經濟萎縮/自不量力對外擴張引致。對比之下未來10年所有材料齊備加上夠時間發酵，蠢人掌權，其他實力各懷鬼胎，可以向好嘅轉向空間唔多，香港亦會成為對外討價還價嘅人質，呢啲就係我認為非走不可嘅原因。
我寫以上唔係想影響其他人走定唔走，大家去留有自己原因，我預測唔一定啱，我喺香港生活尚算舒適，到外地亦唔會太差，我唔願意承受任何生活大幅變差嘅風險，我估計資產管制會喺22-24年實施，就算機會只有萬份之一我都唔會搏，何況我評估機會大過萬份一好多。我自己評估2022年開始走佬代價會越嚟越大，窗口期盡快身體力行
16個讚
幾時開始計劃？
撤退計劃喺曾俊華落選後已經定好，曾/林鄭兩個都係傀儡，連個賣相好啲嘅都唔比香港，prepare for the worst 係必須。準備來來去去都係糧草先行，幾個國家開戶口，聞到味24個鐘內可以所有流動資金轉離港。
至於實行係2020年中，19年逃犯條例大遊行，721, 831, 到訂立國安法其實都唔覺得有太大問題，每一階段都有位比共產黨體面落台。我一向認為香港有兩個極端方向走，一係共產黨全面放鬆，捉官員祭旗，繼續用香港對外擴大中國影響力，恆指60000點指日可待。二係全面收緊，香港大量資金外流，港幣唔一定脫勾，不過唔脫就係資產管制。冇中間落癦。
我認為1機會遠高於2，因為中國金融唯一出入窗口係香港，唔好同我講香港只佔全中國幾少GDP，喺大陸換幾萬美金幾年前已經好麻煩，香港要換一百幾十億係循例撳個掣。香港死，大陸金融崩潰或者全面管控二揀一。我唔相信共產黨蠢都呢個地步。有年長朋友話我唔了解共產黨，佢係啱嘅。
我撇嘅決定係因為睇到兩件同送中/國安法冇關係嘅事。第一件係警察拍片幫阿婆推手推車大事宣傳，唔知有冇人記得。第二件係2021年港股中資股爆升但係其他類型股份暴跌。我睇到嘅係香港由金融托市大事至散仔宣傳都由大陸人全面控制，傳統港人就算係鄉下爛仔都唔會柒到拍啲咁嘅片。托市就更加，高價買起啲原本已經受共產黨控制嘅公司，平價賣走啲內在價值高嘅實業，等同燒外匯送錢比人使。高明托市係穩定股價唔比升唔比跌，總之外人冇錢賺。當然中國式托市大把內幕人仕上下其手發大達。
好多親戚朋友19年就問我點解唔走，朋友亦討論應唔應該走，我都係話共產黨唔會蠢到搞死自己經濟，而且一但出大事英國會收留英屬港人，其他歐美親西方國家亦會諗盡辦法劏咗香港。加上共產黨面子要緊會盡力托市比機會我賣資產，有定案點走就ok，唔急。呢個估算尚算正確，亦算全身而退。
3個讚
我無樓主咁好分析力，但影響到自己細路，就算要「捱」都要走。
3個讚
走資？寫於2022年四月
安排撤退第一件是係走錢，大陸唔會蠢到喺香港實施外匯管制我聽唔小，問題係香港太有錢，走資到一個地步唔管成個金融體系會崩潰。香港用港幣計價股樓加各種儲蓄總資產粗略估計十幾萬億美金，金管局有冇5%即係5-7000千億美金換比大家？真算加埋大陸儲備當多5-7千億，大中小資人人走資雪球一成形頂得幾耐？
我2019年同朋友講唔使賣樓住，因為走資潮開始應該有大約兩年窗口共產黨出盡全力唱好兼托市，直至冇錢再托，窗口2022年頭打開，2023年尾閂窗，一過就資產管制，而家係窗口期踏入第4個月，就觀察多年半睇下我預測準唔準。
點解窗口期係2021年尾開始？加拿大公佈2020年由香港流入超過300億美金，估計英美澳星都差唔多，我估計2020年開始每年流出一千億美金，2022年頭已經燒咗共產黨超過二千億，加埋托市買中概股又一千億。政府口硬但係事實開始恐慌，越驚政策越亂，整個防疫封關都係為咗防走資。同大陸通關更加係妄想，一通關每日上10億計人民幣現鈔流入香港換外幣，數碼人民幣推得咁急應該都係位咗防資金外流。如果錢黎到香港但係境外人民幣市場拒絕兌換一樣會引起大混亂，所以封關係最好解決辦法。放棄中港人流貿易對經濟影響大唔過走資引起問題。咁幾時同大陸全面通關？香港資產管制一開始就可以通關。
買樓賣樓？下定決心唔走嘅話我會買樓，因為怕惡性通脹樓價飆升，又怕資產管制連自己啲錢點使都係共產黨話事，有間屋起碼唔需要擔心住問題。有打算走嘅話更係錢先走。另有一派睇法係一開關大陸大把錢嚟香港買樓，我就諗共產黨點會比佢所餘無幾嘅美金同你一班想走嘅人換間港樓，比你攞美金去西方國家？我都預測樓價最終會升，不過升市之日唔再會係硬貨幣計價，賣樓所得亦攞唔出國境。
有一個走資觀察，就係藍人走得比黃人快同決絕。先唔計資產有限一羣，我認識過千萬港幣資產嘅黃人好多人走/想走但大部份資產留港，藍人比較進取，人走資產走，又或者人唔走資產走。我諗法係黃人雖然不滿政府，但係對香港未來仍然有期望，我叫呢個觀察做預期同願望混淆，預期樣樣差，但願望會變好。講真如果我唔怕資產管制我根本唔會走，口講滿意施政自己過自己生活我冇問題。至於藍人更客觀同實際，對香港反而冇感情負擔。
5個讚
香港資產管制呢part, 可唔可以講多少少，你覺得會點樣實行？
我只係分享自己觀察同分析，網友千祈唔好當我靠得住。
先講多少少點解我咁驚外匯管制。3-4年前，有人買樓賣樓，買股票賣股票，資金有出有入。你我賣樓啲錢去邊？我就留返喺香港金融體系，睇下等下有冇其他投資，就算唔投資都會擺銀行，就算換外幣都係擺香港銀行。全世界當年最安全方便低稅就係香港。今日你我賣樓賣股提款啲港幣擺去邊？我就搵人收我啲港幣換美金比我再匯去英美澳紐加星。我一千幾百，你又一千幾百，有錢人賣間中半山豪宅三五千。有冇咁多美金流入換我哋啲港幣？冇人換咁點？唔怕，金管局仍然肯換，仲肯換幾耐？我唔知。
資產管制就算最蠢最蠢嘅人負責都唔應該會事先走漏任何風聲，係死罪。金融市場會有動靜，但唔係人人識分辨。政府一定有聲明話一切正常。實行前實有人知，但係自己先走，唔會講。大財閥知都唔敢走。公佈一定係收工後，可能幾個鐘前話冇事冇事，跟住就做嘢。應該星期日淩晨，鬼鼠政府慣例，星期一起身發覺自己嘅世界唔一樣但係已經冇嘢可以做到。
至於點發生我純粹猜測唔會話比大家聽國家金融崩潰冇外匯，而係會用一個好堂皇理由。例如同外國有小規模軍事衝突，為咗保護國民限制人同資金流動。一切人民福祉為出發點。
5個讚
大陸好穩定
又係大約三月寫，今日已經冇咁適用。
好多人話睇下大陸幾穩定，大陸人唔覺得共產黨有咩嘢唔好。我睇法係大陸政治穩定性同經濟增長完全掛勾，有增長對將來有期望就算現況幾差都唔會亂得出樣。心態係我今日生活辛苦，但係出年會過得比今年好，我下一代會過得比我好。呢種正面寄望就係穩定性嘅根源。唔好話經濟衰退，只要增長減慢一段時間，可能係兩三年，蟻民意識到下年生活唔單只唔會好過今年，可能會差過，跟住下一代生活連自己都比唔上，就會係亂局開始。2019年反送中拉起發展龍頭廣東省經濟減速序幕，武肺係戲肉，封城騷亂開始印證我睇法。
大陸有冇可能北韓化？方向上會係但實行困難，地方大人口多，到處火頭，點壓？加上由奢入儉難，大陸人試過開放甜頭對未來有期望，突然間所有期望落空，仇富又仇貧，唔亂有鬼。星星之火，越潑越大，越壓經濟越死，惡性循環，根本冇出路。
5個讚
我欣賞樓主嘅思路，不過細節上有其他睇法，雖然樓主叫我忘記佢，但我又痕想交流下。
關係內戰，其實英國和俄羅斯打核戰機會，應該大過/快過中國內戰？如果為避戰爭，樓主會去邊個國家？
講下自己背景，我2014年也做了類似嘅風險預測，當時已決定幾年後走。2019後不斷加速，今日人已在英國。不過我走唔係為避戰，所以我都繼續留英國。
其實我想走係因為預期人才流失之後香港連基本安全都無
各行各業生手，求其，或者唔夠人，生活每一環都可以出離奇意外
考慮下jersey, 我explore 緊
低稅，basic allowance 多過UK, flat rate 20% on income
No VAT, no CGT(!!!), no inheritance tax
遠離政治核心，少恐襲
暖，means 電費無咁貴
十萬人口全部中產，治安好
大部份工同住屋都係 st Helier, 行返工都得，唔怕塞車
缺點，無咩學校，買野難 D 悶D, 屋同物價都貴過倫敦少少 (但稅，交通，電費我覺得offset 到）
佢地有好大班都係無性既蠻人，如果個個都窮真係可以各地騷亂
香港人好多都係中年中產豬，邊諗到咁多𡃁仔會咁勇武
英俄/歐俄/美俄打仗唔識分析，冇喺非英語地區生活過，對人同文化都唔了解，有睇法都係聽返嚟，講嚟冇意思。
至於打核戰都係一般見解南半球影響“比較”細，我自己應該去邊都難生存，由細到大都係和平盛世，先進大城市生活，衣食住行基本生活需要手到拿來。全面核戰全世界生產/貿易/物流斷晒，突然要乜冇乜唔知點生活。
出口大國
出口大國，其實出口啲乜？衫褲鞋襪？家庭電器？火車路軌？定飛機大炮？
以上階錯，出口嘅係勞動力，由40年前廉價勞工到而家超高效率貴價中低端勞工。再加自然環境。兩者都係以破壞自己嘅資源換來外匯。
對一般人出口換返嚟嘅外匯由30年實質生活改善，到過去10年換取對未來生活改善嘅寄望，之前寫過期望就係維持政治穩定嘅最重要元素。對權貴就更係家財萬貫，財大氣粗。可惜長期洗腦交易令一班蟻民以為自己係當權者，搞到神憎鬼厭。以上冇乜新論點所以唔多講。
大陸封城封得過癮，好多人話封城背後都有目的，我就覺得連大陸高官甚至習總都未必係真係有明確目標，啲政策爛到根本冇人知點收科。但係經濟政局淪落到一個點，做下做下唔覺唔覺就會向住一個救政權嘅方向走。記得我講大陸經濟影響政局，當經濟向上人人對未來有期望政局唔會差得去邊，因為大家有乜不滿都會選擇忍耐，出年會好過今年。但係經濟差對於政局嘅不滿就會爆發，防疫政策玩爛咗經濟就會用更大力打壓不滿，救政局希望保住政權。但係經濟又點呢？係又封唔係又封點維持經濟活動，已經唔好再講增長。
又要搬返老土劇情出嚟講，matrix裏面人就係電腦嘅電池，唔好講科學上成套理論唔成立，共產黨政策後果就係慢慢張所有人變成佢嘅電池，借防疫令大部份人冇任何流動，慢慢放鬆之後就係大家原地返工放工，幫共產黨生產，總之餓你唔死，娛樂仲可能有少少，向上流出國門免問。歷史上呢種地位叫農奴，歐洲有上千年歷史，我唔相信呢個係共產黨一早諗好嘅計劃，領導好可能真係諗住可以稱霸世界。但係社會政經結構下呢個係必然發生嘅方向。至於能夠唔能夠成功？我相信可以維持幾年時間。
上一段寫過中國出口人力同破壞自己天然資源，食物靠輸入，出口死火自然冇外匯買嘢，到時食都唔夠食，就係大亂開始。
2個讚
有人覺得共產黨乜嘢事都有全盤計劃，運籌帷幄，好似2003年後花十幾年時間計劃整治香港。我完全無法認同，你可以話大體策略定好，但係其中細節同發展都係由一連串偶然性事件互相影響，每一件事都係整個社會互動，唔喺任何人計算之內，一環扣一環，就成為歷史。
皇朝制度有一個定律，就係到時到候改朝換代，成因離唔開天災配合人禍，人禍係蠢人賤種當道。重點係蠢，做乜錯乜，聰明有能力嘅人幾時都有，不過當領導人眼睇手低以為自己天下無敵聰明人自然會低調自保。
我見到嘅係領導人
志大才疏
庸碌無能
好大喜功
下屬
牛鬼蛇神
各懷鬼胎
陽奉陰違
民眾
仇富鄙貧
不擇手段
自私自利
結局大致可以預見，但係過程同時序冇辦法預知。
講埋躺平，對我嚟講完全係偽議題，社會總有小部份人冇向上流動力，原因好多，可能精神問題，可能家庭問題，可能人生經歷。但係絕大部份人唔多唔少都有希望向上心態，成唔成功一回事，總唔會話我唔想生活變好乜都唔理。躺平點解突然間咁多曝光率已政權又高調評論？當政權跟本比唔到一個環境人民向上流，推卸責任係共產黨一貫技倆，人民躺平變成最佳藉口。永遠唔係政權問題，係其他人責任。
1個讚