盡量幫襯黃店，對佢哋食物質素同職員態度嘅容忍度都會高啲。太子基隆茶餐廳係我會專登搭車出去幫襯支持。每次見嘅員工都係年長嘅，有次佢哋同我講笑整鬼我，所以感覺係有人情味，常去幫襯。
但有次，收銀變咗個中年女人，我 order 四個餐，落單過程佢態度好差，串夾惡咁話咗我兩次，隔離堂食嗰位食客聽到都抬頭望我，尷尬又激氣！( 後來先知原來個女人就係老闆 )
第二日睇到開飯網有人寫以下呢段至知應該唔係我落單時講得唔好所以畀人鬧：
「一間餐廳最緊要是食物，但服務態度都是非常重要。收銀個中年女人的對客的態度非常差，問多一句都很不禮貌對你，坐下食一陣都見到其他客買外賣都有同樣待遇，當時個客買一杯咖啡16元，好像沒有零錢，說給500蚊可不可以，她就回應不禮貌說是否想唱錢，個客即刻面黑黑，說不是想唱錢，有點比屈感覺，anyway，食物味道就好普通，分量又少，最後到我埋單找錢，佢好大力擺錢落枱，完。以後唔會幫親了。」
之後幾個月都冇去，直至上星期四，唔見個惡女人，再幫襯。四個餐好小心慢慢 order，以免再畀人鬧，位收銀叔叔見咁就叫我一路講就得，於是我話佢知上次嘅事，佢聽到之後就笑，話「我唔係佢，佢啲性格係咁㗎嘞！」仲叫埋其他員工過嚟聽，話好好笑。佢話老闆好少喺度，叫我唔使驚，話下次如果老闆喺度，佢會主動出嚟幫我。
四日後再去，撞正派緊飯，老闆企正喺門口，唯有硬著頭皮行埋去問「請問而家係咪可以照幫襯？」佢依舊面口同態度都一樣差咁答「梗係可以照幫襯啦！我哋要做生意㗎！」
好彩係原先位叔叔幫我落單，五個餐，姐姐拎出嚟畀我嗰陣大大聲講好多次多謝 ( 雖然畀少咗個湯，其中一杯嘢飲畀錯，但冇所謂)。其實呢間啲員工好好禮貌，有人情味 (深水埗嗰間都有禮貌)，唯獨是個老闆咁有性格，希望唔會再遇到佢。