見到不時有人問SEN小朋友問題, 我整理咗少少自己嘅家居訓練心得，加埋之前回覆其他人嘅內容, 希望幫到其他同路人。
先講背景: 我小朋友係自閉譜系, 觸覺+聲音高敏, 語言發展遲緩, 社交+專注力弱
- 觸覺: 如果小朋友好驚人掂佢, 又唔肯掂沙/泥/水, 多同佢玩messy play/剃鬚膏/動力沙/泥膠/麵粉/去沙灘(由低刺激性嘅項目開始), 等佢慢慢適應, 就算佢好拒抗, 都唔好迫佢, 嚇怕咗仲衰
- 專注力: 喺安靜嘅環境(即無電視或其他人會騷擾嘅空間), 多做table tasks, 任何遊戲都可以, 但一定要放喺枱做, 迫佢坐定, 由1-2分鐘開始, 從佢有興趣嘅遊戲入手, 慢慢拖長時間, 提高專注力
- 言語: 喺遊戲途中, 重覆描述佢/我做緊嘅動作, e.g. 媽媽 執 波, 故意好慢同強調咁講, 擴張佢嘅詞彙 (想詳細知點做可以上網search下Parallel Talk同Self Talk)
- 情緒控制: 自閉小朋友好恐懼陌生環境, 去新地方前最好先做情景預告, 例如去睇醫生, 就先喺youtube或圖書搵診所/醫院嘅相/片比佢睇(真實圖片比圖畫好), 同佢解釋咩叫睇醫生, 會做咩步驟, 比個概念佢地, 到實際去到現場就會無咁驚恐
- 社交: 返學+playgroup, 同齡小朋友嘅peer influence真係比自己單對單教有用, 亦比機會佢地適應&學習解決問題, 如果佢唔想同其他人玩, 要表示理解, 由得佢地喺一邊靜靜觀察都係學習一種, 千祈唔好打擊佢地, 話“你學下人地XXX”咁樣, 佢地建立咗一定信心就會踏出第一步
- 眼神接觸: 自閉小朋友眼神接觸較少, 盡量喺佢地視線水平同佢地講嘢時, 如果佢地眼神飄移, 就輕輕用手引導番個頭望住你, 多做多提醒, 佢地慢慢眼神接觸會多番
最後, 如有懷疑, 千祈唔好諗住觀察下或相信小朋友大大下會變好, 早介入早治療真係可以進步好多。同埋部分政府服務真係要排好耐, 家居訓練叫做好過無, 自己小朋友自己救!
最後最後, 我好慶幸遇到個好好嘅言語治療師比到好多實用意見我, 小朋友上咗8個月, 由唔識講嘢到講到完整句子, 亦變得大膽咗肯表達自己, 個過程真係好艱辛但有滿足感, 所以大家能力負擔到的話, 真係去搵私人服務唔好等。
希望大家努力, 共勉之 