細個以為年紀一到, 有啲嘢就會自然發生
哈哈哈
咁多絲打單拖去外地既~ 同你say個hi先 
可以做下筆友
明白有啲事係有時限去做，但人生真係有無限可能，我估大家都冇諗過呢一刻會人在外地，唔係正面L嘅我都不得不認為而家先係人生下半場嘅開始。
祝安好
3個讚
係，我係香港時唔滿意自己份工嘅industry（做左太多年，真係悶）及職位，只係因為同事好而留低。估唔到去到外地居然見工越見越好，有好多之前想做嘅industry都好welcome我去試，仲升埋職俾我…真係世事難料。
同意而家先係下半場嘅開始！
6個讚
你PM到嗎?
其實細個時係父母或個環境話你知，人生條路係咁樣咁樣走，一條公式咁，你最好跟住走… 幼稚園小學中學大學然後有份搵到錢嘅荀工又搵到個好老公結婚生仔生活美滿好似必然咁，因為想你係咁呀嘛，點知考試考到會有人跳樓，又唔係個個入到大學，大學畢業都可以搵唔到錢… 夠有d父母，18歲都唔畀你拍拖，20歲頭就突然擔心你有對像未，想你快d結婚生仔… 佢哋真係覺得d嘢喺石頭爆出嚟…
然後你唔係咁樣一條直線咁去，個個格仔都checked，你就會覺得自己係失敗者。但其實人生唔係一條公式，每個人條timeline都唔同。好記得我28歲時裸辭去咗澳洲working holiday一年，人生第一次做隻脫韁野馬，先第一次感受到咩叫自由，第一次可以做自己，呢個年紀，好多女人係想趕及30歲前結婚生仔，但我係覺得你連自己都唔認識，個世界咁大你又未見識過，冇自己思想，走去生仔係咪又繼續將上一代或社會教你嗰一套繼續延續畀下一代？
同埋嗰時喺澳洲認識嘅外國backpackers，好多都係18,19歲咋，細我十年，但感覺佢哋思想獨立好多，同埋佢哋係high school畢業未讀大學，係父母支持gap year一年去學獨立自處、去做嘢耕田捱下苦、去見識下外面世界先，然後先返去考大學… 人生真係唔一定跟住嗰條直線走架，有好多可能性。話說回來我覺得你好叻，好勇敢，上年出嘅post問意見，一年後你已經言出必行做咗其中兩件事，雖然雪卵失敗(點解嘅？)，但你一個人移咗民喇，真心勁，好多人得把口架咋，或者過到去根本生活唔到呀、想啃老呀咁(我老公的家姐姐夫就係咁)…
你好明顯係一個好有計劃而且唔係得把口講嘅人，我覺得香港女仔(或華裔喇)喺外國男眼中係好吃香嘅(親身經驗)，話唔定你可以嫁個英國人，而家擴大d自己嘅生活同社交圈子，緣分好快到，祝福你！
5個讚
多謝你打咁大段嘢呀
其實我唔係一個typical 跟timeline走的人. 但好「可惜」我一直都想有小朋友, 而呢樣嘢唔同「演藝夢」、「讀第二個唔相關既學位」, 係有死線, 年齡限制. 亦唔係一樣一個人可以完成既事.
所以…睇下點啦, 可能下年再返來留言, 又有唔同呢 哈哈
1個讚
香港人不嬲都係有條RULE咁…
成日會講…幾多歲應該搵幾多錢, 幾多歲應該買樓, 可能突然到50歲, 發現呢50年…都冇為自己做過乜野
明白呀，所以你本身打算雪卵，我覺得係一個好明智嘅選擇，可惜你話雪唔到… 所以我都想知係咩原因？
我自己呢，一直冇話好想生小朋友，細個時係以為係必然要發生嘅事，但大個咗就有好多顧慮同懷疑，又覺得唔一定要跟條公式走… 我老公一直想要小朋友，但因為我唔想，佢都冇迫我，但然後我過咗36歲，個心態就變，可能就係因為有死線… 可惜我哋發現兩公婆嘅精子質素同卵巢功能已經好低(我就快38啫，又未話已經4字頭，但情況差過好多4字頭嘅人)… 結果我哋直接去做IVF，都已經無謂再嘥時間試自然懷孕喇，8月去咗台灣做，本身bingo咗，但上月中流產咗…
所以有d嘢，時也命也… 可能咁講好衰，但畀你結咗婚有伴侶，都唔代表一定生到… 我自己都有喺呢度IVF討論區發文爬文，聽得好多嘅一句都係｢緣分｣…
話說回來，本身你話雪卵其實真係好聰明做法，如果我早d知有呢樣嘢，可能都會一早雪定先，喺台灣雪都唔係好貴。又問多少少，如果你雪卵失敗，但直接借精做IVF/IUI又得唔得呢？或者可以諗下，例如話到40歲都係未有對象，就自己生?
(唔好意思，我係比較長氣，寫親都幾千幾百字…)
2個讚
係呀，人生悲哀莫過於此，到死先發現自己冇活過… 或者成世人淨係去滿足父母同社會對你嘅期望，而冇真正為自己做過乜嘢…
1個讚
可能有啲到50歲仲對住2個小學生又諗自己夠唔夠錢退休，佢地讀唔讀到大學，有冇錢比首期
所以一直贊成有經濟能力先生仔，仔女讀唔讀到書，買唔買到樓，就睇佢哋自己造化，父母要盡能力供書教學同栽培，但事實上唔係所有人係讀書材料，呢個世界都唔係話讀到書先搵到錢先會成功，做人做事態度同待人接物更重要，樓買唔到可以租，冇話一定要點點點。
1個讚
罐頭嘅生活，陪住香港人好多年