坐小月中，開呢個post一方面想稍作紀錄。另一方面，係呢段煎熬的日子，睇咗好多媽媽分享，令我有啲心理準備大概要面對咩，無咁徬徨。如果你宜家正瘋狂Google而睇到呢篇文，由衷祝福你同你的家庭，希望只係虛驚一場。仲有想多謝威爾斯產科專科同5F病房嘅醫護，佢哋真係非常非常好。
身邊有朋友不孕/經歷過early pregnancy loss，一直都知道生育唔容易。所以啱啱開始試就中，都覺得好唔真實。由3wk5淡線開始，一直係開心mix擔心。每朝驗等條線變深，每次去廁所首先check吓有無見紅，未作嘔又擔心，作嘔到無胃口輕咗又擔心。記得8wk終於見到傳說中的閃閃，聽到心跳好想喊，醫生叫我冷靜啲，想喊一郁到又對唔準個心跳。到10wk見到阿B好活躍flip嚟flip去，慢慢開始定落嚟。
12wk3d - 仁安抽血T21：
照ultrasound見吓BB，胎盤已經生實，阿B手腳郁郁吓，心跳好好。自覺已經抵壘，希望快啲唔再反胃，可以全心enjoy 2nd trimester。見完醫生就同幾個朋友公布好消息，仲去shopping買妊娠紋油、添置新裝畀自己。呢日係懷孕以來最輕鬆開心嘅一日。
12wk4d – 威爾斯Oscar：
一直覺得政府產檢都係純粹走流程，開file留個record。而且前一日先係仁安照過，政府又應該等得耐就叫老公唔使連續兩日請假陪我，自己一個去。
醫生照完ultrasound：「BB頸皮2.5mm啱啱踩界，未算唔合格嘅，不過睇埋抽血，如果有咩問題會call你」另外排咗20wk照結構期畀我
當下心情好平靜，好爽快答醫生「哦，好啊，OK」
心諗「Oscar唔係好準㗎嘛，可能係阿B趴係度，應該係角度問題」
但係去等抽血嘅時候，唔知點解就開始流淚
威爾斯舊座地下有條好長嘅走廊，一路行一路不受控制咁喊，隔離啲阿叔阿婆望住
一路低聲同BB講：「你爸爸第時一定會教你笑媽咪驚青」
返到屋企狂問Dr. Google，見其實2.5mm唔算好厚，放鬆返少少，希望仁安快啲打畀我講T21一切正常。
12wk6d：
打咗幾次去仁安問，當晚19:30終於收到仁安姑娘電話：「T21報告出咗，醫生想約你後日見面」
個腦空白一片，叫得你即見（翌日係紅日），一定係有事，而染色體無咩小問題，唯有不斷Google同喊。
13wk1d – 仁安睇T21 report：
八號風球，好擔心要再等。好彩醫生繼續應診，橫風橫雨都照去了。去到見到report，大大隻字POSITIVE，第21條染色體增加，aka down syndrome。
由於T21只係screening，亦有0.03%機會假陽性，需要抽絨毛（14週前）或抽羊水（16週後）diagnose。如果係仁安做就要搵母胎學冼醫生抽，或者轉介返威爾斯。
同老公之前的直覺正確，it’s a boy 
13wk3d – 威爾斯登記抽絨毛：
覺得政府醫院抽得多啲熟手啲，星期一一早帶埋轉介信去威爾斯專科。登記後1個鐘左右，就見一位資深護士，佢拎埋我份Oscar report出嚟，驗血結果唔理想，得出「T21 1:9」high risk
姑娘詳細解釋之後嘅程序，安排星期三照超早期結構，星期四抽絨毛。雖然姑娘好溫柔，但言談間都已經講得好白，當T21、驗血、頸皮幾個indicator都同一指向，其實都好確定，抽絨毛只係程序上需要diagnostic test。
14個讚
13wk5d - 威爾斯照早期結構：
再見到阿B好想睇耐啲、睇真啲，但眼淚模糊視線，姑娘好好遞紙巾畀我。醫生非常仔細，每個位都照咗好耐，中間見到阿B個鼻好高（之前每次都趴低/用手遮住見唔到），立即燃起希望。然後醫生再度頸皮層，屏幕個數字顯示0.43，變薄咗?有鼻骨?係咪可以翻盤? 點知睇真啲，原來係cm 
隔咗一個星期，本應變薄的頸皮層由2.5mm增厚至4.3mm，醫生解釋就算真係T21 false positive，都應該有早期未照到嘅心臟或其他嚴重問題。而鼻骨亦唔係決定性指標，加上照到腿骨發育唔好，基本上維持原判。
另外之前仁安有提過我胎盤較靠近背脊，抽絨毛可能會較難，但醫生話無問題，而且就算角度刁鑽都可以由陰道抽，唔會煎熬多幾個禮拜等抽羊水。。
13wk6d – 威爾斯抽絨毛：
抽絨毛/羊水都安排係專科門診比較隱蔽嘅25號房，有獨立等候區。當日有2位女醫生+3位護士負責，老公可全程陪同，解釋同簽完文件後就照ultrasound確定落針位置。首先打麻醉，痛但可以接受；然後醫生就望住ultrasound落針，隱約feel到入針推郁個子宮，我完全唔敢望，怕見到阿B喊會郁到。抽完醫生再照阿B心跳畀我哋睇，再抽埋老公同我嘅血，全程大概半小時。之後要係等候區坐30分鐘，再量血壓同等姑娘畀覆診期先走得。過程中都好冷靜，但一行出抽絨毛房，就忍唔到嚎哭，彷彿可以做嘅都已經做完，已經無next step。
14wk 1-3d：
絨毛樣本會先做快速測試，3個工作天有結果，確診的話就按時覆診。如果無事，威爾斯會打嚟改覆診期，等10日後產前基因體晶片(CMA)檢測結果再見醫生。
一直無收到醫院電話改期，已經心中有數，趁weekend一家三口出去行吓草地，係海邊影咗幾張家庭照。
同老公傾好各種安排，包括唔帶走BB、要同BB道別等，亦google睇吓15週fetus的image做好心理準備．
另外趕工織咗個籃同帽仔被仔畀阿B，原本仲打算將來織好多好多嘢畀BB…
14wk4d – 威爾斯見醫生：
終審確診唐氏，醫生解釋情況，了解我倆意向後，就安排翌日入院，所以當日要留深喉唾液做covid test (之前2小時不能飲食)。
政府醫院因疫情關係不能安排老公陪診，令我好不安。但打去仁安問，探病時間都縮短至4-8pm，加上要3-5個工作天安排入院，所以最後都選擇威爾斯。
最後一晚去搭天星小輪，竟然搭中嗰一架對我倆好有紀念價值嘅「午星」，而船長又居然開咪話壞船，於是係海中心漂咗好耐，等佢阿爸可以慢慢同佢介紹吓，彷彿冥冥之中個天係度安慰我哋咁。
16個讚
14wk5d – 威爾斯引產：
一早入院，老公只能送到5F婦科病房門口，姑娘安排我係窗邊位，醫生解釋程序同抽血，另外有負責情緒輔導嘅姑娘過嚟傾咗陣。
塞藥引產 5劑藥/course，每隔3小時一劑。每次塞藥前要去廁所，因藥後1小時不可落床。塞藥由每更當值醫生+1位護士負責。藥後可能有發燒、痾嘔等副作用。
11:30，換好安睡褲，塞第一劑藥，有唔舒服但唔痛。係個心好痛，控制唔到眼淚，姑娘默默捉實我隻手。藥後大概30分鐘開始有普通M痛感覺。
14:45 第二劑藥，好快覺得下腹痛感增加，痛過比平日M痛最痛，發燒39度。16:00痛到落唔到床，食咗止痛藥，有減輕一陣。之後明顯感到痛感起伏cycle，最痛個吓會好凍，原來宮縮陣痛係咁。姑娘先後畀咗冰袋同暖包我敷肚，但作用不大。
18:00 第三劑藥，痛到無力講嘢、亦食唔到，但未夠時間再食止痛藥，姑娘話可以打止痛針，不過可能會嘔，我已經迷迷糊糊話好啦打啦。打針後痛感無咩舒緩，反而好想嘔。
19:00 非常非常感謝當日病房主管姑娘，酌情畀我老公入嚟陪診。好痛好痛，開始質疑自己之前一直計劃唔打無痛順產，其實根本不能承受；又質疑自己係咪未ready為人母。
20:XX突然有液體係下身湧出，知道係穿水了。痛感減輕一陣後，好快又再來襲。但一直無姑娘講想痾又唔係痾嘅感覺。
姑娘預告9點交更，老公就快要走，好痛又不安，呢個時候feel到有嘢咕嚕咕嚕咁滑出下身，痛感減輕好多。但姑娘話只見到推咗粒藥出嚟，要再等。
其實我feel到陰道有嘢暖暖的卡住，知係阿B。嗰刻唔識反應，好似應該push，但又唔捨得真實感覺到個仔嘅呢一刻。呆咗一陣發現老公真係要走，於是用力推咗一吓，又再流出一堆液體，然後就feel到個仔挨住我左邊大髀。原來皮膚感受到個仔的溫暖，心中都會好warm。姑娘好快嚟剪臍帶，帶走阿B，我只見到佢嘅背影，好細個。阿B真係好乖，知我自己一個搞唔掂，趁爸爸係度出嚟。
之後姑娘再幫我按吓個肚，就排出胎盤，好快退埋燒。然後有病房姐姐幫我簡單清潔、換安睡褲。個幾鐘後落床去小便要同姑娘拎個刻度兜，確認量足夠。當晚醫生有緊急手術，所以4am先叫醒我確認胎盤完整，同檢查出血量。
害喜感覺突然消失唔係好慣，第二朝派餐已經唔再覺得難聞反胃，除下腹有少少冤痛，亦無感到任何不適，但當值醫生建議我觀察多晚，咁就留多一日。
出院前姑娘安排一間獨立會客室畀我同老公同BB道別。將籃同織物交畀姑娘，姑娘幫BB清潔好，換好衫，仲印好小腳印畀我哋，貼埋防水膠紙，好貼心。BB好平靜安詳，個鼻似我好直，佢爸爸笑言係公公嘅gene好強大，唐氏都㩒唔低。道別過程係傷心，但見到BB、拖吓手仔、傾吓計、好好說再見其實係好大relief。同老公本身都唔中意墓園安葬，甚至自己日後亦會做大體老師，所以決定唔帶走BB，交畀醫院同大學化驗。另外3個月後覆診，跟進化驗同詳細genetic test結果。
唔記得之後呢段時間係點過，總之同老公互相撐住，感恩枕邊人真係好可靠。有時候掛住BB，就攤落床、合埋眼，回想掂住個仔嘅感覺；慶幸老公有影低BB，半夜突然好不安擔心有日會唔記得BB個樣，睇吓張相就安樂返。見到奶奶媽咪擔心，深深體會兒女債真係由孕day1甚至計畫懷孕就開始，只要一息尚存都要繼續，或者種種擔憂哀傷，就是為人父母必修的行吧。
Know that Im with you the only way that I can be
Until you’re in my arms again
．．．．．．．．．．．．．．
最後好想多謝威爾斯專科同5F病房嘅醫護人員，由拎報告返去到住院，見嘅醫生、護士、病房姐姐都好好。佢哋嘅程序相當人性化（聽過同路人分享其他醫院用膠袋裝住未清潔的BB畀父母）。病房護士對病人態度之好更顛覆我對公立醫院嘅印象，雖然好忙，有個婆婆無得出院扭計，姑娘會不時去哄婆婆傾幾句「有無掛住我啊」「婆婆你今日靚咗wo」、幫婆婆facetime孫女；面對嘈吵大媽，姑娘都係好好聲氣。特別好感激懷孕中嘅5F病房IC姑娘，我本身都無預計過老公可以陪我，但佢主動offer我老公酌情探病，等我哋可以一齊面對，係最困難的時刻幫咗我哋好多。
入院物資
- 口罩（除進食外，需長期戴）
- 安睡褲1打
- 抽紙、濕紙巾
- 暖壺（每張床都會派壺熱水，姐姐定期refill）
- 炒米茶
- 叉電線（床頭有USB位）
- 橡筋（無風筒洗唔到頭，紮起較方便）
- 梳洗用品
- 眼罩、耳塞
- 餅乾／蛋糕仔
- 拖鞋 + 襪
43個讚
睇到一半我忍唔住喊. 媽媽要加油呀.你要多休息TAKE CARE.
小天使一定好快會再返黎你地身邊的
9個讚
謝謝你的分享，只是睇文字都好大感觸，媽媽你一定好難受，不過你已經做得好好，將你嘅經歷寫出嚟會舒服啲。
祝福你們，希望你身心都早日復元。
3個讚
多謝你的分享, 我無呢啲經歷都忍唔住喊…可以將過程和感受寫出來都需要好大勇氣
祝福你們平安渡過呢段時間, 小天使下次健健康康返黎搵你地!
樓主你好勇敢
多謝詳細分享
希望你坐好個小月
BB執好行李會再黎拍門
抱抱樓主
睇到忍唔到都流眼淚
希望bb 快啲執返好行李返黎搵你地
舊年8月我係瑪嘉烈經歷左同你一樣既事情，我個女係T18 Edward syndrome.
時間沖淡左好多傷感，不過作為媽媽知道傷口會永遠都係度，偶爾會發惡夢，夢見自己再懷孕又遇到一樣既問題。
有時夜欄人靜，會有種淡淡既罪疚感，覺得自己好狠心唔要佢。有時抱住大女，覺得點解一個可以得到咁多愛做掌上明珠，但另一個乜都得唔到。好多好多胡思亂想。
想再生多個，諗佢唔知會唔會番黎搵我做媽媽，但又好驚再有咩意外自己𠄘受唔住。我知道哩個陰影真係會跟住我一世。
希望你可以比我更堅強樂觀，加油!
12個讚
您好勇敢！BB會執齊晒嘢再返嚟搵您！
等緊佢嘅時候記得要好好休息
善待自己
一邊睇一邊好想喊。感受到你果份痛。希望你身體可以快復元。
