【護繩器不斷壓損鋼絲 加大承受力度】
林超雄續指，涉事鋼絲上未受力的段落亦發現有受傷的情況，原因暫未了解，但有關損害會加速出現金屬疲勞的機會。至於組裝及吊起LED屏幕結構上，主要靠Winch（絞盤，即Win子），上面有一個鼓，纏上鋼絲；Win子上有坑紋，防止鋼絲「跳」出來，行內稱「護繩器」（rope guard）。常見護繩器多數能轉動，免鋼絲受拖壓損害。惟今次紅館演唱會出事Win子不能轉動，鋼絲每次經過護繩器時受壓，縮小鋼絲直徑，而且不斷磨損鋼絲。「本身個纜拉住移動，係好自由嘅，但因為我（護繩器）而家壓住佢，條纜要郁，就要抵抗佢壓住嗰個力，即係話鋼纜受嘅力大咗。」
林超雄形容，護繩器對本身狀態已欠佳的鋼絲造成更大損害，續指：「我哋睇到佢係有被壓傷過，有被磨損過，同埋入面啲絲出現塑性變形，傷咗鋼絲本身抗金屬疲勞嘅能力。」另整組吊掛系統中，兩條鋼絲繩，左邊那條直接落Win子，右邊一條需經過滑輪組再回頭，「當你條鋼絲繩行過呢個滑輪組嘅時候，佢係受緊一個屈曲嘅狀態。鋼絲繩本身已經壓傷咗，再承受咁樣嘅屈曲，就好似『拗』緊一個萬字夾咁，令佢喺好短時間出現低周疲勞。」
【LED屏幕實際重量比文件顯示為大】
林超雄續謂，主辦機構提供之吊掛LED屏幕重量，比調查小組現場量度的重量相差很大、「爭咗一個大嘅百份比」。林未有詳解「加重」了幾多，亦未提到究竟是哪方加大有關設計負重、以及主辦機構是否知情，他指：「鋼絲繩吊緊呢個屏幕，比佢預計吊嗰個力大咗好多。金屬疲勞出現嘅周期同鋼索受幾多力有關；當受嘅力更加犀利，幾個問題夾埋，就令到條鋼絲繩好短期出現咗金屬疲勞。」
李子俊指，有關調查未完成，仍需進一步做化驗。記者問及是否負責監工及簽紙之註冊工程師在檢測驗收過程中做得不足，李指仍調查中：「而家講邊個要負責任唔係好公平，唔同政府部門亦都做緊調查，我唔想影響其他嘅部門嘅調查，亦唔方便講太多資料。」謂希望下個月完成所有調查，亦拒回應涉事鋼索是否及格。