話說2 年前2020 年差唔多都係依啲月份, 我發現個賤人偷食, 當時晴天霹靂, 不知所措, 我係女人, 又有一個小朋友, 當然唔想離婚啦!! 一心諗住佢偷食都係貪玩, 諗住大佢, 同佢講唔斬欖就同佢離婚, 點知個賤人二話不說就話咁就離婚啦!! 佢同我講, 佢放唔低第三者, 初初我都仲係唔相信架, 以為過多一排佢就會死心!! 但我真係太天真啦, 佢一直呃呃哄哄既方式去哄我同個第三者, 佢呃我話分左手, 但其實無分手, 之後又畀我發現到, 終於2021 年新年, 我同佢再攤牌, 佢認佢一直呃我, 但就話係2020年尾已經真係無再搵第三者, 不過佢好認真咁諗過, 佢真係放唔低第三者, 佢唔想咁樣同我過一世, 佢話已經唔再愛我, 佢驚當佢唔係愛我既時候, 就算無依個第三者, 佢都驚自己會再一次偷食, 於是佢話佢想搬走, 搵返個第三者, 個一刻, 我知道無得再勉強啦!! 好啦, 佢要走我都無辦法, 總好過日日見到面, 都唔係愛人個種感覺。
係新年攤牌之後, 佢就真係搵返個第三者, 仲隔晚就等小朋友瞓左就去搵個第三者, 個段時間, 係我人生裡最痛苦既時間, 點解一個男人可以同佢未離婚既老婆講, 去搵第二個女人? 個時我成日等佢門等到無瞓過, 真係好痴線既一段時間。3 月既時候, 佢終於都搬走, 初初佢搬走係有唔習慣, 但我知道我個人係輕鬆咗, 唔再需要問佢返唔返黎食飯, 唔再需要等佢門, 我都用左啲時間去令小朋友習慣, 初初佢都會扭計, 會有啲焦慮既行為出現, 我知道, 係因為屋企環境轉變令佢咁樣, 之後我都有繼續陪伴佢, 同佢傾計, 令佢明白到爸爸點都係愛佢 (就算佢幾賤都好, 我都唔想影響小朋友對佢既觀感)。
佢搬走都無一年, 個賤人終於都發現佢同第三者唔會好結果, 竟然想回頭, 但係我已經對佢完全死晒心, 佢根本唔值得我去愛!! 於是我同佢提出離婚, 當初佢唔肯, 因為分居未夠一年, 佢唔肯, 我亦都無多餘錢搵律師幫我搞離婚, 只可以等分居夠1 年先啦!! 因為我識佢之前, 佢已經負債累累, 但我都係後期先知, 到佢真係自己還唔到, 佢想我幫佢問銀行借一大筆錢還左先, 佢再慢慢攤長黎還, 佢偷食左一年我先發現, 係我未發現既時候, 好蠢咁幫佢借左一筆錢, 當初諗住大家兩公婆無計啦! 又傾過我哋兩個加埋點都還到啦, 幾年就可以清晒!! 點知到我借完都無半年, 就發現佢偷食, 個刻我唔肯離婚, 係怕我自己一個女人帶住個仔, 我一個人揹唔起佢條數,因為佢條數係我名借, 其實離左婚, 佢唔還我都追唔到佢, 中間有搵過6299, 佢哋一句話幫唔到我就算, 個時我就知道, 我真係好ON9, 結左婚又點, 真係唔可以有錢銀來往, 後悔一世呀!! 雖然而家佢每個月都還晒錢畀我, 但有時會還唔足, 其實都係我畀佢頂, 而且佢$1 都無畀過家用, 生活費我, 佢只係還錢已經無多餘既錢畀我, 依2 年, 我都係靠自己!
佢而家話想返黎同我重新開始, 又突然間話發現自己仲係愛我, 真係BULL SHIT, 係愛我既話, 點會偷食? 諗住玩完, 返黎做好人呀?! 佢而家仲好厚面皮話想同我用另一方式相處!! 間中同我講笑, 返黎探小朋友, 又扮無嘢, 其實佢對住我有無內疚? 點解可以咁厚面皮, 仲可以出現係我面前? 結婚咁多年, 一直都係我照顧個家, 家用都無點樣畀過我, 有錢剩都唔係畀屋企, 而係自己拎去用, 一個咁無責任感既人, 點解我咁遲先發現??! 今年2 月, 佢終於都肯離婚啦, 我就約左去家庭法庭辦手續, 希望佢真係做返個人, 畀條生路我行啦!!
其實我打咁大段嘢出黎, 唔多唔少都因為我未完全放得低依件令我咁難堪既事, 但我絕對係放低左個賤人, 只係自己未釋懷到遇到一個賤人, 仆街, 但我仲要曾經唔清醒!!
好希望我哋辦手續之後, 佢還晒錢畀我, 大家就無拖無欠…
