由於 見到英國 Miele 上代頂級蒸焗爐 DGC68xx大減價 ($13xx ~15xx鎊)，所以出個post介紹下 佢 d 嵌入蒸焗爐，方便大家新屋入伙裝修考慮。
現時市面上Miele嵌入爐 有 6千系列(舊)，同7千系列(新). 6千系列係貨尾，平左好多，硬件性能 / 設計上，6千/ 7千系 基本相同, 兩者最大分別係 7千系列 支援 wifi, 手機app控制。型號再分幾個級別，2xx 係基本型，全手動功能；4xx有少量 預設auto功能；6xx彩mon panel及 更大量auto功能，有其他進階功能/配置；8xx全touch panel, 食物探針，全auto功能，最高功能配置。size 分XL (45cm 高) 同 XXL (60cm 高)), 除左電功率唔同(基本上最小都 3千幾w)，其他性能一樣。
為左方便講落去, 我用 屋企部 DGC7840 尼示範。
話明蒸焗爐，就講左水先，水缸位置係control panel 後面，升起後有兩個水缸，左邊缸係收集冷凝 / 廢水，右邊缸係新鮮水。
拿出水缸後，機身管道接口有機會滴出少量滯留水落散熱風糟度，所以會自己吹乾。
考慮到自潔功能，所以部機既水氣流動都幾複雜下，比起一般蒸焗爐 多左廢/冷凝水處理部份。
蒸焗爐，大家都關心蒸氣部份，Miele 蒸爐 /蒸焗爐 全部都係由背面噴出蒸氣，比起只有機底蒸盤既機，蒸氣擴散得好好多。6千系每層都有一組蒸氣噴頭，但今代 7千系列 噴頭數目就減到只有 2 個，好彩係背發熱器風扇會著住，幫手吹開蒸氣，所以應該無咩影響。我估減噴頭既原因係蒸氣糟有積水唔易乾，所以今代取消佢, 由管道直出噴頭算。
爐腔底部左右兩邊小孔就係蒸氣噴頭。
爐腔底部為下發熱線(類似上層M 形) ，冷凝水會在爐腔內伕再次蒸發。
濕度 / 蒸氣 過高時，爐腔空氣會由右上方氣孔經散熱風扇抽走，再於冷凝水收集管回收，新鮮空氣會由背發熱器後閥門導入。
底部中間油隔蓋住既就係廢水取集管，如烹調後，爐腔出現過多冷凝水，收集管會經水泵排水到廢水缸，所以 慢煮又好，人手低溫蒸都好，Miele d 蒸焗爐 點都唔會出現成灘水。
上層為傳統發熱線，非紅外石英管，係純頂層發熱 mode 下能更好控制溫度；全燒烤mode時，兩組發熱線均會啟用。
講完部機大概, 下面開始show 煮出尼既效果
純蒸功能
燉蛋 (90c，15 MINS)
蒸焗 full grill 10 min + 蒸焗 80c/80% 20 min + grill 8 min
叉燒
無線溫度探針 自動烹調鹽焗春雞
純焗咸豬手
8個讚
網絡功能，其實無咩作用，本身都係要放食物入爐，係爐面按 同 係app按制 係無分別。自動烹調+溫度探針，本身就唔洗理，所以我試完work 就關晒個爐d網功能同wifi連線，所謂多個香爐多隻香爐多隻鬼，網絡上越少設備越安全。
保養方面，我建議每次用完機後都進行爐腔自潔，部機會以飽和蒸氣焗腔身。油脂受熱後，會透過底部冷凝水廢水管經泵排到廢水缸。如果特別污糟, 可先噴專用清潔劑，再進行爐腔自潔，再加沖水程序帶走油脂。另外，用完慢煮 / 低溫蒸煮後，最好開100c 蒸返 10 min 或者 直接開乾燥程序 烘乾機身 D 鬼鼠位。
後話，蒸焗爐係咪真係一機就取代晒另外兩款爐？高級機功能上,做到等同, 但執行上一部好唔過二部。
- 如果人多食飯, 蒸焗爐肯定唔夠用，因為焗完野要等佢凍返晒先可以再蒸食物，否則等如蒸焗。
- 純蒸爐 全功率都係用係產生蒸氣，加熱速度明顯快好多，如果分時加餸蒸，速度更明顯，開一開門，放碟餸，快極都減10c，跟著要等佢升返溫，早放既餸，變相蒸耐左。
- 部份焗爐有熱解清潔功能，清潔油脂效果遠勝於蒸氣自潔。有d高級型號焗爐有空氣過濾，減少油煙味添，最誇張既有LIVE CAM。
如果有地方放，又成日煮野，2 部+ 方便好多。
另外，Miele d電器比其他牌子貴一大截，以設計，造工，性能 的確係優異，值唔值就見仁見智，但香港行貨就一定唔值。。。
8個讚
謝謝你嘅 review
我住北美洲，而家呢邊 Miele 已經停售純蒸爐，只有蒸焗爐，幸好呢邊個個屋企都有純焗爐，呢個蒸焗爐絕大部分時間只當純蒸爐用，係有 d 浪費
咁真係貴好多，miele d蒸焗爐價 = (焗爐+蒸爐) x 1.7 左右，如果無特價，真係唔好買。
佢地新7千系列，將DG (純蒸) / DGM (蒸微波) / DGC (蒸焗) , 3 種爐 都group晒入 stream oven度，DG72xx / DG74XX 純蒸 最低級，你果邊索性唔入。
實在鍾意佢嘅蒸爐，冇辦法，唯有焗住買蒸焗爐，舊年知道會出新系列，就預訂咗 74xx，但一路都未有貨，啱啱一個星期前收到 Miele 通知，最近有貨到咗加拿大，但 local dealer 都未收到，仲係要等
雖然等埋左D , 但性能一定唔會失望.
E 個係 純內置程序 整既雞下脾 , 無用溫度探針.
1.5 KG 雞下脾, ~45 mins
7440 本身無溫度探針, 你可以外加 meater plus , 手動停機.
1個讚
好精明既用家
宜家成日講IoT
但好多人無視左呢樣野 
E家d家電連網已經去走火入魔，最誇張連抽油煙機 都有wifi連線，明明部機 識自動跟爐頭一齊開關，自動跟據油煙情況 調整轉速，但都要整出尼俾你係app度按制。。。
1個讚
你講得啱呀，而家真係走火入魔，連牙刷都話要有 bluetooth，有 app，真係痴線
