我被離婚，明明係佢單方面話離婚，但當我收到佢嘅離婚draft，佢係用1年分居做理由要我協議離婚，我好不甘心，佢已有第二個女人（個女人細佢18年），但佢不認，佢係話佢唔想再容忍我，所以要同我快啲離婚！明明前2天我地一家三口仲好開心去玩，我地3月本來移民，佢俾左夠錢我叫我同小朋友快D去外國生活
佢仲要用1年同我離婚，我好心痛，我一直以為我地好幸福⋯我同佢由相識到結婚16年，佢之前好愛我。點解可以做到咁絕，掉低我同阿仔
我情緒同抑鬱病好嚴重，所以想找個地方可以找人聽我呻下
我有睇心理醫生同食藥，但幫助都不大，我成日諗住點解佢會咁選擇？佢仲話佢要自由，話分開唔關第三者事，佢話對我無晒愛，仲話我篤眼篤鼻，佢話佢諗左一日，決定要同我離婚，我問佢咁小朋友點？佢話個仔將來會明白點解佢要走！！現在佢對我仲衰過陌生人。
現在我所知就係佢同佢個小3已分開左公司無一齊做，你地話咁樣都叫做佢地無野？
其實我知道我無後路，只可以向前行，但真係好難， 尤其要開始搞離婚手續嘅事，我個人就會更加唔開心！ 點解事情發生得咁快， 佢用一日去決定同我離婚！！
好好哭一場，俾啲時間自己Hea 下，瞓覺，睇劇，做個facial ，剪下髮，做過spa，但過了一排請為自己好好生活
你的幸福係你自己創造，不依賴任何人
Let it go
喊完就慢慢學識咩野叫做放手
好多野都可以冇答案，特別係感情上，冇哩個第三者仲會有其他嘅第三者，當佢唔再愛你，唔再願意花時間係你身上，再多嘅點解都係冇答案
要過哩一關真心會好難，只有時間可以治癒到
多謝你，我已經無左自己咁，你講個D 我都有做，但當一到夜晚我就會好寂寞。 我好無用。
放手係點架？我好似唔識。。。係咪即係放低之前同佢嘅所有野？
唔怕核突嘅話可以睇下哩個mv
https://youtu.be/XfI5DwNj9oc
Sorry, 我都唔識點答你
或者唔知道你需唔需要一個擁抱，再難過嘅總會過去 （抱抱）
你就當呢世同佢既緣份就係得16年啦，你仲有個仔，好來好去對大家都好。
感情嘢由來都冇永久保養，壞左就係壞左，掉左佢啦。
你先為自己同個仔著想，試下唔好諗個衰人，一個爛咗嘅人係唔會為你同個仔帶嚟幸福
移民過新生活啦，攞佢啲錢好好過日子
難做都盡量做，咬緊牙關，會過去的
睇晒。。多謝你，睇完喊左。 人真係好殘酷。其實我都差D死去，係朋友救了我，個男人都知道，但佢一D 反應都無。其實佢真係好絕，我好蠢仲希望佢會回來。
我廿幾年前同個男友分手喊到死去活來，嗰條正渣男。喊咗個幾月好啲，而家掉轉頭睇：得啖笑
不用sorry, 我多謝你俾擁抱我。
我知道講啲大愛嘅說話可能好冇用，但請記得 要好好咁愛自己 先會有人愛你。
唔開心咪喊，想做乜就做乜，總有一日會叮一聲，然後你發現，果個好深刻嘅難過好似過咗去
我差不多晚晚都會喊，事情已發生左4個月，我情緒都控制得唔好，我個小朋友都見到我喊，佢好擔心我，我覺得自己對阿仔唔住，令到佢不能在一個健全家庭長大。其實我仲係好愛我老公，不過現在嘅佢已經不再是以前嘅佢。。。佢變得好恐怖，我最蠢係跌咗落去佢個劇本度，佢不斷喺佢朋友面前數臭我， 我仲因為咁不斷怪自己係咪我嘅問題令到頭家散左。
想請問你之後係點樣爬番起身？係咪唔好再諗佢之前對自己點好？
我都想同佢好嚟好去，但佢做唔到，佢對我D態度好差，仲衰過陌生人。 現在就算我死佢都唔會關心。
其實佢變咗心，真係你做乜佢都會無動於衷。你無謂作賤自己，對佢來說反而會睇你吾起，你為個仔好，為自己好，一定要活得比佢好。而且無謂鑽牛角尖，邊個啱邊個吾啱，對件事無補於事。積極啲諗下點安排以後日子，多啲愛錫自己，不要將精力心思放喺啲吾值得留戀嘅人同事上。日子漫長，你仔好須要你，千祈吾好做傻事。
多謝你。佢都有話我鑽牛角尖鑽到個地都裂，我真係唔可以俾佢睇死。
當一個男人變心就算再做幾多，再難過佢都唔會睇得到，仲只會覺得你煩。被離婚是痛，但目前為咗小朋友點都要自強，學會放下唔再諗點解佢唔再愛，點解要放低自己同小朋友，點解會有第三者，因為已經唔會有答案唔再有意義。難過完就要抽身為將來過更好的日子。
利申：早幾年都行過呢條路，同樣本身有抑鬱，不過現在回望真係無謂咁辛苦，早早過新生活好過
你一定好傷心了，呢個時候個人會好亂，但唔好太去考究點解會發生呢件事，或諗點解會係自己，諗太多只會浪費自己心力同精神。
就算咩原因都好，賤嘅一定係佢，因為佢連自己碌鳩都管唔住，你冇做錯，個天自會有報應俾返佢。
既然有筆錢又可以移民，就用佢d錢同阿仔周圍玩周圍食，制造多d同阿仔嘅回憶。
試下聽欣宜首「無表面傷痕」，係佢親身經歷，你會感覺到有人明白你，希望你可以釋懷d 
既然佢無情，你都唔需要對佢有義。
為自己為仔仔刮盡呢個男人，有幾多拎幾多，呢啲都係你和你仔仔應得的。
比自己一段時間去傷心，這也是人之常情，始終十幾年感情，唔係話放低就放低。傷心過後，為自己而活，令自己開心啲。