希望唔好比人炳
結左婚或者拍拖耐左, 可能會無咁愛對方,又或者越來越愛, 或者其實當初大家覺得夾就結婚, 未有太了解對方,或者結左婚咁多年可能已經淡左, 或者結左婚令大家越來越離不開對方,好愛好愛？
我自爆先, 拍拖時愛,覺得係時候結婚對方又OK就結婚, 結左婚後越來越愛, 結左十年,突然發生左啲事, 唔係唔愛佢,而係佢令我太傷心, 佢既行為磨滅左我對佢既愛,開始將對佢既愛去番多啲自己度, 雙方檢討過,可以繼續生活落去亦希望再試下重新開始,但心知自己係開始攰…
而家希望平平淡淡
大家唔介意可以分享下
做人幾十年匆匆，求其過到日子我都ok了，人始終係獨立個體，下下一定要好愛對方直到永遠唔會感覺好有壓力咩？熱戀過之後轉到做感情已經好好。
愛
同自己講，自己都大把缺點，放大佢嘅優點嚟令自己開心啲
我反而愛得多過初初結婚，可能係人老了，轉為感情，更加珍惜呢個會伴我老嘅人
初初結婚磨合得多拗撬，冇咁愛
愛！而家移咗民後更愛！移民前有咩都仲有自己家人同朋友，移民後只有更倚頼對方，雙方關係更為好咗。在香港時大家都工作太忙，工作壓力太大，早出晩歸，容易磨擦。移咗民後甚至兩性關係都頻密咗
我同老公一齊廿幾年，結咗婚十幾年，移民後發覺佢好錫我同小朋友，越嚟越愛佢。雖然佢唔浪漫，大時大節唔會送禮物，但會記得所有節日帶我哋食飯慶祝。我哋平時好似朋友，有講唔完嘅話題，乜都傾一餐。當我遇到問題或心情唔好時，佢會開解我同諗辦法幫我解決。雖然一齊咁多年，我哋每日都會擁抱同錫，瞓覺佢會拖住我，所以令我越嚟越愛佢
結婚25年了，一定有愛，好愛又唔知喎，倚賴一定係（雖然我成日同人講我自己一個都可以）。係有講唔盡話題咖，最重要佢係我咁多親人中相處最舒服最放鬆的一個，就算對住老爸、老媽都要個腦係度轉要照顧對方感受，對住老公就唔使就，好放心佢會包容我。
有時佢行過嚟後面攬下、錫下額頭、都仲會心跳加速。
愛
大家一齊努力、成長。亦會比空間對方。及講過發生任何事情也不可blame對方。
啲回覆好閃 
看來，關係好的夫妻都唔少！
拍咗拖1x年，結咗婚8年。純粹都係覺得係時候結婚，咁就結咗。
除咗搞結婚同埋新屋裝修之外，基本上都冇”鬧交”出現過。
開頭覺得已經係感情，唔可以用到好愛去形容，但係發現我同好多人嘅話題都會有我老公嘅存在，所以佢已經算係我生命不可缺少嘅人。
我唔知係唔係愛，但已經一齊20年，有1個小朋友，我愛佢又如何，最緊要係大家都相愛，單方面付出係冇意思⋯⋯
以上既回覆好閃呀
要繼續sweet落去
點講呢
唔好可以話好愛，但人生再來一次，又覺得會再揀佢
我最愛嘅男仔應該係我仔，真的，第一眼見到個仔先知咩叫真愛
絕對認同，愛自己個仔多過老公
呢種真係無條件嘅愛、單方面付出都無怨無悔
愛。
不過好似你咁講，突然發生啲事影響感情呢啲真係冇得預計⋯⋯
相愛很難
移民後大家冇咁大壓力，我唔駛跟小朋友功課同默書考試，佢準時收工唔駛 OT。小朋友瞓晒我哋仲有時間一齊煲劇，性方面都頻密咗