係呀, 下欄位俾香港人做
真係好想走，
但又無乜朋友可以傾吐。
要走已走，要留就留，偏偏自己仲慢吞吞。
1個讚
冇追晒所有回覆，但見到標題+樓主情況，有少少嘢不吐不快。
雖然我相信自己響度浦咗咁耐，都唔會有人誤會我係藍C，不過我都係利申先︰我兩公婆已有共識要走，依家反而係諗加拿大定英國。不過唔講太多了。
首先，大家都要認清一個現實，所謂移民，退後一步諗，唔係BNO VISA，呢度有幾多人可以走？或真係有機會有能力可以走？我諗好多人諗都冇諗過走到。呢個正正就係好多人對過英國有猶豫既地方。尤其身為一家之主，要諗掂全家嚟緊開支，唔係要生活，係要去到生存呀，講緊長期得開支未必有收入，除非諗住過去守幾年都得，亦「真係」可以接受生活質素比香港大跌，好多人依家衝動實話乜都冇問題，我自己好細心諗過，真係模擬過，我係咪接受到，答案係唔完全得(我覺得自己已經過草根生活的了)。
做人父母，移民都係為下一代，但去到如果朝不保夕，要個小朋友一齊捱，又係咪佢想見到呢。我哋諗到香港會變得好差好差，但去英國點生活都係一個未知數，我有朋友過咗去，實況係點我心中有數。有成功搵返老本行，有轉工種成功開始新生活，有適應得好好，但亦有婚姻出問題…所以有時有D人諗多D，會驚會猶豫，覺得香港係Comfort zone 唔想走，我好能夠理解，亦唔會話佢哋既任何決定。
所以當我見到有兩公婆因為咁而嘈，就覺得好唔抵…好多時大家目標都係一致想頭家好，只係諗法同顧慮唔同，唔應該覺得任何一邊唔走就係港豬。就算今日迫到佢走，第日遇到困難都會比另一半怪返轉頭。所以走唔走都好，試下了解下對方立場同顧慮，一齊試方法解決。要記住，始終大家目標唔係移民，而係點先對頭家最好。
10個讚
50/60/70後食正香港經濟起飛
有層樓有D積蓄, 去英國真係可以退休
當然有人財力唔厚, 能力又有限, 年紀又唔細
擔心移民後生活成問題, 絕對可以理解
始終講民主自由之前要有飽飯食
人之常情
1個讚
我冇覺得佢唔走就係港豬呀，但個因果關係係咁：佢本身係一隻港豬，所以佢唔想走
好多謝你嘅留言呀，我都好認同你所講嘅嘢，其實我同你想法都幾近似，我好認同你話最緊要係為一家人好嗰個point，但個問題係我覺得去係對我哋一家人好啲，而佢覺得唔去係好啲，咁係因為大家角度唔同，我從非物質上嘅嘢出發，佢從物質上嘅角度出發。而我都好怕佢去到會唔開心，或者會影響我哋夫妻關係，所以我先至咁糾結。
我哋移民其實唔會有好大家庭經濟問題嘅，因為老公行業喺嗰邊其實應該唔難搵工，只係人工唔會好似香港咁高，另外佢仲有啲生意，可以remote繼續做都得，普通養家應該唔係問題，所以我哋如果真係走嘅話都唔算好艱難嘅。
我一向都明白民主自由唔可以當飯食，但明明有條件去追求，但就因為大家想法唔同就要放棄，唔多唔少我覺得有啲可惜。
補充一下：我係諗住去加拿大。
4個讚
慢慢諗都正常呀，始終移民真係一個好重大嘅決定
真係好悲哀
1個讚
唔知會唔會行到封網
只怕到時想用都冇
根本依家都有啲網巳經被封咗，大家開定vpn 吧啦
封還好
mon post 仲煩
我老公都係港豬
由於收入同專業人士差唔多
但佢又唔係專業人士
移民嘅話 佢係搵唔番果舊錢
去到英國打工得番香港收入1/5
但我自己以前係英國讀書
所以都想個仔有更好教育
所以我已經不停咁講
個仔大點就會同佢走
佢自己留香港繼續做港豬
3個讚
我同你一樣 
總之小朋友離開呢到最緊要
有冇傾過送小朋友到外國讀？
可以諗下加拿大，如果你係最近五年讀到大專以上可申請owp
或者申請study permit 讀兩年書，預廿萬學費左右
可搵啲細城市住，唔好去溫哥華多倫多果啲咁貴，一個人做賺錢半工讀慳慳地都夠，預4-50 萬入息比移民局批
好同意，雖然我都等緊visa 批，打算8月走，但每晚幻想自己要個細路一齊捱: 想買d 好野食又唔捨得，無得去貴dd的餐廳，無得去吓呢度玩果度玩，樣樣要同個細路講: 阿媽未揾到工，唔好使感多錢，零用錢又肯定無得比佢架啦…亦唔夠錢比佢學吓呢樣果樣equip 自己
雖然唔系話樣樣比物質個細路，但系本人愚昧覺得呢d 就系生活質素
2個讚
唔係愚昧，呢啲係要諗嘅現實問題
我讚同移民嘅好處，但見到啲人個個話 “just leave”, “依家係走難，咩都唔好諗總之走咗先”，就好反感。單身自己一個，就話啫，一家大細，just leave之後瞓街，你養我嗎。
移民係一大project, 要好好計數和計數。
3個讚
從另一角度思考，保持到物質上的生活質素，但生活失去了自由，活在白色恐懼下，咁嘅生活係咪仲有質素？
香港嚟緊仲係咪一個搵到銭的地方？也值得思考一下⋯
2個讚
單身或者2公婆走反而簡單，去到直接揾工，搞唔店最多咪回流香港，冇得輸。
有小朋友就唔同，如小朋友太細媽媽冇得番工，要計下老公一個係咪養到全家。有小朋友想回流都難d，外國讀書happy開，點轉番香港高壓填鴨教育。
所以係移唔到民風險vs安排好d先移，好多家長都好爭扎，都情有可原既。
3個讚
既然都走，改變下自己諗法。
外國有度好，自然環境、公園多，呢d 都係免費，
天氣好，一家人出去hea 住享受大自然、細路跑跑跳跳，帶少少嘢食去野餐，都可以好開心，最緊要係你嘅心態。
4個讚
我認同一家大細要計好數既、講到物質生活真係無得同香港比、朋友香港都叫中上、去到都係落手落腳照顧屋企、出街食真係少、貴同唔掂囉、而家easter break 就會帶小朋友去下博物館同其他地方行下、另一種生活啦