由結婚開始就同奶奶住，本來都無乜野，一生完仔後做ftm就發覺一齊住真係好多問題，但又無得搬走，有時已經將佢講既説話當耳邊風，但仍然覺得佢好煩，點算好？
其實我奶奶已經好好，好多家務佢做，好錫我仔，我仔都好痴佢。只係教養上總係會有D唔同既地方，佢唔干涉我其實都無問題，但佢有時會暗示下佢覺得點做先正確。例如平時我比D唔係飯/粥既野我仔食，好似蝴蝶粉，薯蓉，佢就會係隔離話：小朋友都係食粥有米氣到肚好D。我仔已經16個月，我有時會比D大人飯佢食，佢又會話：BB好似鍾意食粥多D。我有時會反駁佢，白米好無營養，可以食下其他野有唔同營養，外國D小朋友都無食飯架。
跟住今日佢比粥BB食，咁啱BB瞓得多左，一起身佢就話：你唔洗理我呀，我講下架炸，不過我發覺BB次次食粥都瞓得好D。跟住我忍唔住發脾氣，佢就不停話我講下架炸，你唔洗聽我講。
我真係好厭倦呢一種生活模式，其實我只係想自己個仔用自己方法養育，所以我先選擇做ftm。而且我又係D好怕人煩既人，我真係唔知可以點同奶奶相處，我覺得我已經對奶奶有一個好抗拒既心態，有無媽媽可以比D意見…
佢話唔使理佢嗰啲，可以真係唔使理佢，唔需要諗佢目的或者assume 佢係咪passively aggressive.
佢講親乜嘢，盡量唔好拗，唔使講自己意見esp 係同佢相反嘅意見。譬如佢話覺得米粥好啲，你就話「哦你覺得米粥好啲～ 」就咁rephrase 佢證明你有聽，但又唔使講自己。佢之後會無限loop 自己嘅「阿毛理據」，到時你先應哦哦哦，係阿係阿？，icic 咁求其應都得。
同一時間心態上你都要為自己set boundaries，人哋覺得點係人哋覺得，你唔一定要認同。咁樣自己都冇咁上心同激心。
我有朋友做法係一嚟就擺到明虛應佢，但我覺得呢個唔work，最好要顯示有認真聽，佢先覺得你唔係反佢。如果佢覺得你係企佢對面，佢會樣樣嘢都煩你。
佢講嘅嘢左耳入右耳出，但係你自己落手做呢，就做返自己嗰套～ 盡可能口舌上唔使同佢9 up 辯論，已經煩少好多嘢。
除非佢鬱手干預你做嘅嘢，否則都要keep 住呢種練eq 嘅方法。
我奶奶都係唔講嘢會死，乜都要加自己意見嘅人類，不過唔係同住，我都練習緊呢個方法。我覺得係work 嘅，但最難嘅嘢係要控制自己情緒，因為之前佢一講嘢就覺得佢係intruding，就會嬲咗佢先同覺得我做乜要聽你講etc，情緒一來就好難控制，就會開始9 up 辯論模式which is 嘥口水。
發奶奶脾氣 你都幾威架喎
其實你奶奶都好唔話得（同其他奶奶相比絕對係最優質果10%），你唔能夠又享受緊佢嘅照顧做呢樣果樣，又唔准比意見湊孫，特別係你明知佢都係錫孫。
點睇都係你心態問題多啲，不過呢樣唔可以怪晒你，疫情困獸鬥係人都癲⋯⋯
你道理係啱，食白米係無咁好，但奶奶都唔係逼你丫，其實可以hea應「係呀係呀，最好樣樣都食啲！」「食粥好呀，趁細個試多啲唔同嘅嘢，有咩敏感問題可以問返健康院丫嘛」
至於食粥
奶奶如果煮埋餵埋，我實歡迎架
盡量唔好黑面啦，關係破壞左就修補唔到，奶奶唔係自己阿媽。
同意，有時bb爸爸唔係到我會煮米粉比bb食，佢爸爸係到好有心機咁。
整番茄魚湯，雞湯，排骨湯比bb撈飯。
有時煲牛肉粥，魚粥。
果啲我自己整唔到，好時佢會整好先出街。
單睇餵食
試下同99講 邊餐佢負責，呢餐我負責，大家煮咩都唔好理，只要係對bb好有營養就得。
其實你99都幾好好，我身邊朋友話佢啲99係俾垃圾食物俾bb食。
你發佢脾氣，佢都仲可以同你講話自己”只係講吓嘅咋”，咁佢都幾好脾氣
樓主奶奶算係比較好喇我覺得，俾人發完脾氣唔會嬲。其實同住係湊bb既話題上，就算親生呀媽都係好易鬧交，有好多上一代既意見係我地眼中係唔科學/冇根據。如果搬唔到出去一家一主，暫時唯有都係虛應求其hea下佢，否則日日同住面阻阻好難頂。
我同99非同住，不過見面都密，每次佢都會有唔同嘅意見。佢有佢嘅理由，雖然係冇evidence base嘅，最多咩內心取笑下佢就算，佢幫我湊嗰陣咪佢話事囉。
如果99(或任何人)有份幫你湊/煮飯，你就要接受佢嘅做法。係99到比乜BB食我都唔會理，佢湊得大自己兩個小朋友，我好有信心佢唔會湊死我個件。
改變性格同諗法 / 搬出去住
你咁樣每日同自己過意唔去會好辛苦，長期會影響精神健康⋯⋯
你奶奶係咁話：我講下㗎咋，都幾好
肯溝通肯認衰
明顯知個新抱唔鍾意聽，個又忍唔住想講
多謝各位既回覆，我諗我最先要做既野就係改變自己諗法。其實我奶奶湊我個仔既時候我無加意見，所以我希望佢係我湊既時候都唔好加意見。我自己覺得甘樣做其實好簡單，但我諗對於老人家黎講，佢覺得佢既意見係為BB好，所以會忍唔住講出黎。同老人家相處真係好大學問，估唔到生左先發現甘多問題