呃左大家入黎，唔好意思。
有關標題內容，如果大家真係有興趣，隨便上網搵一搵都大把資料，我就不詳細說明了。
見到大家隨意將白卡白卡掛响嘴邊，俾我既感覺或多或少帶有歧視成份……
我估計，無端白事响條街度俾人鬧，而又覺得對方毫無道理可言，氣憤之下為左令自己心理好過一啲，唯有暗自概嘆自己唔好彩，以自己遇到個白卡佬／白卡婆作結，意圖提醒自己唔好再同對方計較。
我患有情緒病，標題請大家認清精神病與情緒病之別，事實上亦有其重要性，只係今次既主題，我想先集中討論白卡呢個稱呼。
白卡係身份既象徵，白卡正式名稱係「殘疾人士登記症」。
無論係邊一種殘疾，佢地都有屋企人，大家可以嘗試代入角色，假如你係智障人士既照顧者，聽到人地下下白卡白卡咁講，一時之間可能誤會你取笑緊自己仔女，咁係幾咁難受呢？
時代進步，隨住大家對精神病既理解愈黎愈多，社會續漸消除歧視，然而我認為仲係未足夠，仲係需要有更多人去發聲；作為一位情緒病患者，我正因為受制於社會大眾既目光，唔夠膽俾人知道我確診，甚至至今仍然隱瞞自己既父母，呢啲唔健康既諗法亦幾乎窒礙左我既治療進度。再舉多一個例子，如果你地身邊既同事／家人／朋友一位同性戀者／跨性別人士等性小眾，佢地應該都會話到俾你地知果種收埋收埋生怕俾人知道既感覺。
大家既無心之失，以為講下笑無傷大雅，實際上卻係撒下左歧視既種子，當大家都習慣用白卡稱呼一啲响街上失態既人士，以此為一種常態，久而久之，種子得到養分，隨之而生長發芽，歧視就如病毒擴散！
如果大家認同我所講既野，想為消除對殘疾人士（當中包括精神病患者）既歧視出一份力，方法好簡單，你可以分享呢篇文章去你日常會使用既既社交平台/通訊軟件，例如WhatsApp、Signal、FaceBook、Instagram等等……
下一步，我邀請大家諗一諗可以用咩字眼去取代白卡呢個稱呼。情況好比現今社會已經改為以認知障礙症／腦退化症取締老人痴呆症呢個舊有稱呼。
「勿以善小而不為」，你地每一個微小既行動，都足以改變社會，請唔好睇小你既個人影響力。
後記：謝謝願意花時間，有睇到最後既你地每一位，我有意投稿去唔同既網絡媒體，如果大家有合適既建議，歡迎留言告之。
如蒙賜教，感激不盡。
39個讚
我想問白卡係咩嘢時候拎出來？唔拎出來人地點知你有病？
我有老友有精神病都有廿幾年（我唔知情緒病同精神病點分，但我老友講佢個病嘅時候，係話中度精神病，亦無要求我「正名」），廿幾年前佢最嚴重時係要住院，我當年唔知佢出事要住院，佢出院後病情反反覆覆時收到佢電話，對談中就知佢唔妥，而家唔知佢算唔算康復，但佢一直有工作，不過就要定期覆診，雖然已減好多藥但亦唔可以完全唔食藥。而家佢日常生活唔會有人覺得佢有病。
佢自尊心極強，一直好抗拒攞綜援之類嘅福利，知佢有病嘅親戚提起攞政府福利個D，佢就會好嬲。我甚至以為佢無白卡，問佢先知佢有，佢話搭車個D 梗係唔會拎出來，佢係唔會畀人知佢有呢張卡。
其實，白卡、精神病、情緒病…呢D ，只係一D 名詞，只有你發病呢D 名詞先有意義，你無發病，無人會聯想起呢D 名詞。只要你唔歧視你自己，人地唔可能歧視到你。
8個讚
其他國家地方唔敢講冇,但歧視喺香港好司空見慣了,等於論壇上都係一樣. 冇人想做殘疾人士,就算普通受傷臨時要用拐杖行路,普通人都一樣歧視,甚至唔幫助(讓座就是其中一樣),更何況殘疾人士. 做咗殘疾人士都一樣要面對人生,不過肯定有好多心胸狹窄既正常人,衹要殘疾人士有寬大既心,唔需要理會他人眼光或語言,理氣直壯咁做自己冇錯既野就得.
PS: 但精神病情緒病好唔同,這隨時真係會影響他人生命(就算捉到都因此病改變咗判罰),所以更唔好因自己殘疾問題,受了他人眼光做成自己情緒出問題,久而久之便形成精神病,有呢啲病主要都係自己做成,所以樂觀啲,不用理會那些世俗凡人,好好面對自己特別人生.
如果情緒病咁易醫好，就唔會有白卡依個證明啦
唔好講到揸白卡既人好似好輕鬆，有啲情緒病既症狀唔係同你講笑
好似抑鬱症咁，唔係你一句「唔好唔開心」就可以開解到；精神分裂亦可能24/7聽到好多幻聽/出現幻覺，你試吓日日一訓醒就聽到有把聲叫你去死去做物做乜，一日你或者頂到，一個月呢？一年呢？
我覺得平常人對依方面無認知係好正常，但個人思想狹隘，鬱啲唔岩聽就叫人驗腦就好有問題
其實真正要返屋企果個係你，乖
其實香港成個社會就係需要多啲體諒，好多人出事其實唔一定係佢自己羅黎，正如無人知道自己幾時會有傷風感冒咁
我本身係工作環境遇過好多智障人士，佢地除左智力，有一部分人同時仲有情緒問題，有時佢哋亦會因為依啲情緒問題又唔識表達，跟住有好多過激既行為，有時甚至被迫綁手綁腳，有時聽到同事間都有好多對佢哋既抱怨，個人認為，返工壓力大家都有，但係唔係代表我照顧緊既人一定錯晒？
佢哋智力已不如我哋，有時俾人誤導下就可能唔小心做左唔知咩錯事，傷害到人，咁佢會唔會係有心咁做？
你我既然共處同一個年代、同一個地方，平時相處俾多少少愛心/耐性，係唔係咁難？
互相尊重又係咪咁難？
20個讚
我叔仔係弱智人士，我99成日都講白卡，
『佢有白卡，有無優惠』
『佢有白卡，係咪唔洗排隊』
因為我老友有病，我都好明白，真係唔係一句唔好唔開心就開解到佢，真係要好有耐性聽佢講嘢，需要嘅個種耐性係要好大好大好大。
講真如果佢係正常人，我一早唔畀面講哂所有最mean 嘅嘢頂佢，就係因為我對佢有差別對待，先可忍受佢
4個讚
鬼佬咁，聽既覺得歧視，講既真係冇咁意思。
唔通我講佢係精神病，會令人舒服過講佢係白咭？
個稱呼真係唔重要，態度先係。
7個讚
係呀，成日都係咁，仲成日搭車唔排隊。
得佢兩個果陣我唔反對，但我地5個一齊出去時我同老公會去排隊囉
樓主
認真想問
如果用網上語言想鬧普京係癲佬
你認為鬧佢"黐線"、“有(精神)病”、"白卡"邊一項比較無咁帶有歧視性?
2個讚
其實情緒病同傷風感冒一樣 大家都可能會有
係一種病 當事人唔想亦唔係佢控制到
1個讚
就算掃街果條友 我都唔會叫垃圾婆垃圾佬
我通常會講 幫手掃垃圾果d姐姐
改下稱呼未必即刻會有幫助 但有好多野都可以由我地由社會對佢地既稱呼做起 改變下一代既諗法
12個讚
我覺係好正常，既然有病，點解唔可以拎下呢 d 優惠？老人家、小朋友、大住肚孕婦，呢批正常人，都可以有優惠著數，有病更加要比優惠！有啲人個樣睇唔出，唔講真係唔知，咁講左有著數，比著數條友，都係出於可憐善心眼光，無歧視囉！
你99醒呀！
我覺得好睇拎住白卡同埋親人心態。
有人會好敏感呢個字眼，有人會正向接受，因為拎住白卡係一個事實。
所以對待特殊既人真係要留番一線，直接係可以但只限某種人或某種朋友。
4個讚
認同樓主所講有d人講「白卡」時帶有歧視，我自己聽落都覺得好un耳
另外上面有位講嘢咁涼薄，仲以為去錯forum
11個讚
mrs.A
22
其實：
崩口人忌崩口碗
講者無心、聽者有意
有人提議唔好咁稱呼咪試吓囉。
肥婆、豬扒、地中海，都唔係個個人都接受，更何況「張卡」真係被label
9個讚
我阿爸都有「白卡」，佢係癌症病人，長期病患都屬於殘疾人士
其實「白卡」即係「殘疾人士登記證」，唔單止係精神病患者先可以申請
但我都覺得個社會普遍將「白卡」同「精神病患者」掛鉤，甚至乎將「白卡」當貶義詞咁用
變相對於其他殘疾人士嚟講就有啲唔公平
另外又有啲字眼係話「有白卡就係拎福利，對社會冇貢獻」，呢方面嘅說法都係帶有標籤性
其實有「白卡」嘅人，就算係精神病患者，佢哋一樣可以正常返工，正常出糧，正常交稅，只要有適當嘅治療，佢哋同正常人冇乜分別
唔係個個精神病患者都好似向青山偷走出嚟咁嘅
20個讚