住屋問題分分鐘變感情煩惱。有網民指,其兄與女友進入談婚論嫁的階段,由於女方「家底」不錯,家人提議男方搬進女家同住;雖然哥哥不甚介意,惟父母卻非常反對,直言「住老婆娘家嘅男人真係會俾人睇唔起」,引起網上熱議!
該名網民在「香港討論區」上,以「結咗婚住老婆娘家既(嘅)男人係咪好冇用?」為題發文,指哥哥跟其女友談論結婚事宜,而女友本來就有「家底」,由於女家不想他們搬離太遠,以及擔心她「住得差」,故提議樓主哥哥搬進女家同住。
樓主指,哥哥本打算跟女友婚後搬出去住樓住,再抽居屋,又指「再唔係女方住我哋度都冇所謂,反正有間房」,又認為即使住女家亦無所謂,「唔使交租又可以儲多啲錢」。不過,樓主的父母聞言後就堅決反對,認為男人住進女家很「無面」,「變咗咩都要聽女方話,好冇用」,更指住在老婆娘家的男人會「俾人睇唔起」、「好似食軟飯咁,講出去好難聽」。
帖文引起網上熱議,網民的意見兩極,有人直言看不起住老婆娘家的男人,「個感覺好似入贅」、「我會睇唔起呢種男人」、「點止冇用,直頭垃圾,食軟飯!」、「似湊細路多啲,講出嚟都俾人笑死」。不過亦有網民認為夫婦間有共識便可,「最緊要兩夫妻有共識,唔好理人咁多閑言閒語」,若未有能力買樓,暫住幾年努力儲錢更實際。
樓主父母思想咁守舊,又真係要接受現實:自己個仔係賴蛤蟆食天鵝肉![:joy: :joy:](https://www.babydiscuss.com/images/emoji/twitter/joy.png?v=9)
佢應該要揀啲家底差過自己㗎嘛~咪唔會俾人話佢食軟飯囉!
3個讚
門當戶對~ 講就好封建,但現實係擺在面前
千金小姐要跟你住公屋居屋? 人地阿爸阿媽唔想係人之常情,唔想搬去女家即係想女家貼埋新屋比佢結婚?
2個讚
相見好同住難喇,俾著係我第日都唔會想個女既老公搬黎同住。情願資助佢地首期叫佢地供樓搬出去住。
On 9喇,真人真事,男人搵獨生女,外母屋企有三間房
拍拖男人進注入場,到籌備婚禮,外母立即裝修屋企,
婚後個女生兩個,外母一手包辦湊哂
慶幸男人有返工,但放假日連午餐痴住外母食
2個讚
我都識人係咁, 但我見外母幾ENJOY, 個女同D孫喺身邊, 有D老人家覺得咁樣仲開心
2個讚
又要面子, 自己又冇能力, 學咩人講面子,
香港地民生來講住屋一定係最大問題
8個讚
係,連住屋都搞唔掂,學咩人講面子,同埋都係啲父母自己鍾意周圍同人講仔囡住邊,根本無人想知
2個讚
咁又咁講︰外母通常好少刻薄女婿,點都好過個女住去男家度
9個讚
咪係, “講出去好難聽” – 咁邊個叫你要講出去啫?!!
文中提到女家唔想個女"住得差", 我估男家住公屋,
如果要咁計, 女家同親戚講個女嫁後住公屋, 咪仲難聽
戴返頭盔, 唔係睇唔起公屋, 而係比起有家底嘅人, 公屋點都算係"差"
2個讚
咪係, 將心比己, 自己個女由中產私樓嫁去住公屋有邊個父母想
3個讚
朋友有兩個CASE︰
一個係男住居屋女住公屋,兩個都搵到下錢不過上車困難,婚後住女家度,因為男家多兄弟姊妹,女得一個,居住環境嚟講女家好過男家,好似都幾和諧,個外母煮埋同湊孫
一個係男女好似有少少錢,不過男既有層唐樓比佢哋住,女家反對話個女唔住得嗰啲唐樓,好似最後女家比錢買層細樓,只寫女名
想有頭有面就唔好要個仔等抽居屋啦, 抽完都係得1房。
而家外父屋企大到有多一間房呀。 ![:crazy_face: :crazy_face:](https://www.babydiscuss.com/images/emoji/twitter/crazy_face.png?v=12)
如果女方家底好,女方父母用自己名買層樓係屋企附近,俾女同女婿住,就解決曬所有問題。