啱啱有咗第二胎，因為太唔舒服，日日都向屋企休息，覺得有啲鬱鬱哋，又成日亂諗嘢
剛剛fb見到個舊同學，冇結婚，好似成日單身
幾年前見佢去咗日本working holiday，已經好羨慕佢
啱啱又見到佢一個人去咗台灣，相信短時間都唔會返嚟嚕
真係好羨慕呢啲自由自在嘅人，應該冇乜家庭壓力，自己一個話走就走，做自己想做嘅嘢
即刻覺得自己向香港嘅生活好困身，結婚生仔已經成副心機擺曬落去，有時都會反問自己，而家嘅人生係咪自己最想要嘅，有機會揀多次，會唔會好似人哋咁自由自在生活呢
純粹舒情
生小朋友確實有好有唔好。有時會見佢地2個識照顧大家。有時哎交。自問又覺得生活多了 樂趣。
當佢地同你講好鐘意你。錫你。呢啲又開心到不得了。
1個讚
恭喜你呀
又俾我都舒情下先
當人習慣左獨身，係真係唔想有家庭束縛。
一個人，只要你唔會感覺寂寞，真係無敵。
要同一個人共建美好家園，係好高好高難度既事，過程中幾多機會會total loss？
到生仔，就更多不能預測既情況。
然後條數係，
（1個好高難度嘅老公 ）+（ 1個好難預測嘅仔 ）= 你要賭上你呢世人全部精神心血青春財產。
我已停止去渴望，因為我知我賭唔起
4個讚
互相羨慕啦。係好羨慕單身人仕，同時佢地又羨慕我地。羨慕左7年後，慢慢唔再諗人地有咩好，專心發掘下自己有咩人地無既好，然後將佢放大
4個讚
我初初都好似你咁諗。
後來覺得bb幾時跟你出世係一個緣份黎。
2個讚
比我再揀我婚都唔結
1個讚
我係新手爸爸，我一直幻想個 B 大過一齊踢波行山打機。單身無辦法實現。
3個讚
細個諗住早啲結婚早啲生仔。
到咗大個出嚟做嘢先知道可以咁自由自在，尤其是自己搵錢咩都試過玩過曬，旅行又去曬，個人成熟咗穩定咗，所以可以安定落嚟生小朋友。
有時睇返都會諗下如果後生幾年生會唔會舒服啲，尤其是啲中學同學個仔都幾歲，有啲都生緊第二個，不過我覺得每個人嘅選擇都唔同，每個選擇都有好有唔好。
冇咗之前嘅經歷同回憶，都唔會係而家嘅我，所以我從來都唔會諗太多或者後悔人生嘅每個選擇。
7個讚
如果可以再揀，希望早多幾年結婚，宜家年紀太大無咗生仔呢個step
以前自由自在咗廿幾年我覺得夠了
2個讚
同認樓上，你經歷既所有經驗造就你既選擇，俾你記憶同時間都回歸番去當時，你都係會做相同選擇。
困身時想自由d, 獨身時又想有所寄託。
1個讚
可以諗返以前點解自己會揀生小朋友之外，諗下可能你果位單身朋友未必係自己選擇單身，佢都羨慕緊你。唔係話自己嘅價值或者人生決定要建基於別人嘅肯定，而係好多嘢其實都係我睇你好，你睇我好。而可能係另一個平行時空冇生小朋友嘅你都諗緊「點解我當初唔生小朋友呢…」
2個讚
身為典型 晚婚+高齡產婦嘅香港女性，我已經體驗夠獨身嘅自由自在，先走入婚姻和生BB的，所以唔會羨慕獨身生活，因為後生時已經體驗夠了。
人生唔同階段要有唔同經歷，咁先有趣。
4個讚
我當年冇諗過生仔
原因係自由慣咗(後生時幾自我)
我老公嘅話打動咗我，我改變咗主意。
從來冇後悔生仔，雖然佢青春期時激親我，但都慶幸有機會做咗阿媽，感恩。
我生命中，每個階段，都因神和身邊嘅人，變得更豐盛。
4個讚
各有前因莫羨人
我又分享下自己既故事先。我後生時做過7年空姐，過住你所講既「自由自在」生活。
有個同我同年，當時已經移左民去加拿大既朋友，我有時飛去佢城市都會探佢。有一次佢開口話好羨慕我一個人自由自在，無憂無慮，想去邊就去邊，但我同佢講，我都羨慕你同我同年但你已經係兩個仔仔既媽咪，又有個錫你既老公，大家睇大家好，做ftm 都曾經係我既夢想。我夢想早結婚，有兩個小朋友，又有個好老公咁。
今日佢已經生左第3個小朋友，我無再飛，過返95 既生活，未婚（雖然有個穩定男朋友），仲係好鐘意小朋友但如果要生都已經係高齡產婦
但我又無悔當時揀左呢條路，人人經歷唔同，最緊要自己開心。
3個讚
有好有唔好。
單身/唔結婚/唔生仔當然自由自在，想做咩都得，冇咁困身，少左負擔。
不過可能到左某個年紀就會想有個partner(男女都好)，但又未必搵到； or 又想要小朋友，但可能就太遲，女人越高齡越多女人問題，想生都未必生到。
所以你羨慕佢時，佢可能都羨慕你。
我自己30前，辭左一份做左6年既工，再掉低男友，去左英國working holiday 一年。然後30幾先結婚+高齡生仔。
我好proud of 自己做左出走一年既決左，因為睇到好多野，試左唔同既工，識左好多朋友。後悔既反而係返左香港做野太上心，攪到周身病，最後攪到做高齡產婦！
～活在當下～
3個讚
每個人有權選擇，而每個選擇都是有代價
1個讚
我同你一樣都有類似嘅矛盾，已經三十後，第一個小朋友先出世無耐，但係已經覺得好困身，好懷念自己以前自由自在嘅生活。
但當問番自己，都係想同老公有兒女，大家一齊經歷更多。依家見到個女嘅時候，真係會覺得好滿足，單身嘅自由年輕時已經擁有過
1個讚