我女今年七歲，明顯對畫畫、手工、藝術方面好有興趣，所以我想放多d資源響呢方面，想佢有系統d咁學，但坊間好多畫班好似都冇乜系統，都係小班畫下畫，做下勞作咁。
畫班老師建議可以學下素描，同時繼續恒常畫班，但每星期兩堂畫畫佔用多咗課餘時間，我擔心對小朋友有d吃力做成負擔，可能要cut另一樣課外活動free返時間出嚟。其實七歲小朋友應該學乜嘢畫？
依家得閒會帶佢行下美術館同畫廊，有時響車上面或餐廳佢都會自己攞畫簿出嚟畫畫。仲有冇乜嘢活動可以推薦？
請問有冇對美術方面有認識既朋友可以比d意見？感謝。
我有兩個朋友讀 Design 畢左業，以前一齊讀中學小學。小學嗰陣已經係好鍾意藝術，經常會隨意畫畫。佢地有上普通畫畫班，素描係學校教+自己學。兩個嗰陣都有好多獎，記得有星星河比賽，升中都有諗過報體藝不過最後冇報。
佢哋課外活動就係畫畫同音樂，冇其他活動。升到中學就冇再上畫畫班，自己專研，兩個都有 DSE 讀 VA。
暑假有啲素描班、紙黏土班，可以上嗰啲嘅，咁就唔會太辛苦。五六年級就會開始教素描，鍾意畫畫嘅人就會自行研究同練習素描。先七歲，有冇諗過留白，畀空間佢自己諗做咩畫咩？
畫畫同寫文章一樣，自己練筆都可以練到返黎，留白自由發揮成效更大更開心。我呢兩個朋友都係話畫畫咁靚都係因為細個好多時間去自我陶醉，鍾意畫乜就畫乜。
5個讚
多謝你嘅資料同意見
其實阿女一得閒就會畫畫，乜嘢都會畫一餐，算係好多空閒時間畫自己嘅畫。我覺得有興趣可以比多啲資源同技巧學習呢方面，等佢可以更容易畫到自己心目中想畫嘅嘢。暑假有參加多啲手工班，不過依家返學就唔想學太多課外活動影響休息。
2個讚
咁就已經很足夠。到 9 歲左右再學其他畫技都未遲。
我識一個小朋友 6 歲已經畫到好靚，簡直令我自愧不如。佢冇上畫畫班，全部畫都係自己睇完 Youtube 片同埋望住圖片再畫出黎。你女女都可以試下咁樣先，等自己熟練左就再深入學。
呢啲都係佢 5.5 歲左右畫（2019 年畫嘅）。佢媽媽話等佢大少少再定性啲認真啲就畀佢深入學。
4個讚
我反而想知無藝術天分可以點幫小朋友
我兩公婆都無果條 gene
小朋友而家同我地一樣
其實小朋友仲細,比佢自由發揮鍾意畫乜就畫乜就好,這是孩子創作靈感的泉源, 所以我女兒當初都係咁,唔會常阻止佢做的事情. 曾幾何時一大卷廁紙全部冇晒,整出好多不知名作品,牆上留下的藝術多年,間中都回看往事歷歷在目,雖然小學及中學老師都給予她肯定,不過高中選科都沒有選,知道這衹是其中一種愛好而已.
藝術既野,家長唔好要求孩子有什麼高的限制,可以講參與咩畫班都可以,衹要唔好阻止孩子創作就得.
其實藝術，有得"系統化" 架咩？
我做緊嘅係培養美感欣賞 (生活上嘅野) 加上唔同素材、方法、類型都去試，叫得試，就要睇機會，所以無得系統化
我兒今年11歲，一年半之前開始學畫，有教素描，但因為顏色單調，一般小孩唔會鍾意，一般家長唔要求，畫班老師唔會想教
另外，我有安排流體畫、小手工、紮染、影相等，希望話佢知，藝術唔係單一畫畫，學畫只係學技巧，多d唔同小手作嘅實淺都可以係學習技巧
下一部，我有d想教我仔織野…
(我係英美術白痴，但愛做手作嘅人)
1個讚
呢樣好重要,畫班好多時阻礙小朋友既想像力,咁細個唔好上咁密畫班
1個讚
我覺得藝術係有少少天生，如果唔係就唔會有藝術細胞呢樣。
我讀小四個時突然對畫畫自然開竅，無人教，當時仲係無上網，咩都自己練，用色憑直覺去調色打造陰影深淺光源。
唔上班好過上。我試過一d centre, 夠膽死叫細路照圖片畫，扼殺細路創意。
到大個d先進修技術啦，而家可以介紹佢睇名畫膽睇參觀下藝術博物館
我有個朋友開畫班，唔出名都係做下附近街坊生意咁開左好多年。我印象最深係佢d學生黎上堂係學生想畫咩就畫咩，無特定主題，導師係輔助同引導佢地（/同佢地一齊玩）。有時個個畫嘅野都唔一樣有時有d熱門話題就個個爭住話要畫例如前排鬼滅同mirror 
2個讚
我係讀藝術，亦都係做藝術嘅，
喺入咗大學之後，花咗好長好長嘅時間，去學習unlearn
因為由細喺香港嘅教育太著重標準答案，
藝術系入面嘅老師成日叫我地問問題，
我先發現，自己連問問題都唔識問。
比較好彩嘅係，我只係六歲嗰年上過一個畫班，
畫班就係老師畫咗一幅standard嘅畫，
然後我地要跟住佢嘅方法去畫。
我覺得好悶，之後就冇上。
中學時修art，老師係比較自由嘅人，
上堂介紹好多唔同嘅artists比我地識，
又比我地參加好多exhibition，
由得我地自由發揮，嗰段日子真係好開心好好玩。
所以，如果小朋友係中意藝術嘅，
真係唔好追求「系統性」訓練。
而且佢仲好細。
想當年我係去到中四五，
自己真係想畫好啲，
就自己去圖書館搵素描書嚟睇，
不過素描唔係我中意嘅嘢，
玩兩玩就轉咗去做裝置藝術。
當年素描好叻嗰位「高材生」，今日做緊保險。
當年會考art拎D，但係日日喺度整手工嗰位同學，今日喺柏林做緊artist。
由得佢自由發展啦～
帶佢去睇下exhibition、睇下書都好，
咩類型嘅art都睇下，
最緊要佢有興趣～！
4個讚
培養美感欣賞，呢個講得好好！
而且係生活上嘅美感！
呢樣嘢最重要！
2個讚
多謝你用藝術系學生角度話我知你嘅諗法
我有位設計師同事，佢嘅意見係學素描好重要，話上到大學，學過素描嘅學生個底係有啲唔同，所以佢建議我女學素描。
我當年考油畫唔想跟會考題目畫,離左題我都係拎D,我本身係學校係考第2名,可能素描果度拉返高分 
當年學校第一名係畫畫天才,佢之後去左外國留學,唔知佢而家點啦~ 我就做左化妝師 
1個讚
好多臥虎藏龍呀
嗯嗯～ 其實好睇小朋友自己興趣係咩
例如有同學係中意design嘅，依家做graphic，其實係用電腦，佢素描當年成日唔合格，但依家真係一個好好嘅designer
有同學係真係用畫筆畫畫叻嘅，依家就做illustration，就真係素描底重要喇
有同學其實係中意影相，咁係對眼重要
所以如果小朋友中意素描，咁咪素描囉！
如果小朋友中意砌模型，咪砌模型囉～
只要係佢真心有興趣嘅嘢，佢會自己搵到方向的 : >
1個讚