其實你老公仲未戒奶，仲係媽寶，都未ready獨立成家娶老婆，連叫阿媽唔好成日上黎都唔敢講，奶奶冇義務冇責任就下你，但你老公有，佢係仔都係你老公，有責任同合理地要Balance 兩個女人既需要。
我奶奶都係crazy跟蹤狂，我老公明知阿媽係咁既人，直頭係唔俾佢知我地住邊，同一定唔會俾鎖匙佢，唔係阿媽就岩曬。
可惜老公自己揀，你都唔好expect一個人會變，一係就心甘情願接受佢係咁既人，最多求神拜佛有日佢會開竅但都唔好太大期望，一係就離開呢個人。係我離完婚再結婚之後既肺腑之言。
7個讚
你哋真係好淋善，話說我係冇婆媳關係，因為我一入門已經擺個勢出嚟︰我唔恰得，我唔介意你個仔同我分開，你哋唔使旨意比氣我受
我結婚想唔擺酒，我奶奶堅持，話要影靚相，好丫，你嚟料，我怕。我照擺，我奶奶竟然夠膽霸住我個新娘房化妝，我當然有得化但我啲姊妹係要避入女廁，好丫，我嗰晚冇嘢，只係不停咁喺個新娘房講︰唔好意思呀要你助手(我化妝師個助手，幫我姊妹化)入女廁化，我唔知奶奶聽唔聽到，正常唔會聽唔到，我個化妝師都忍住笑同我打眼色。咁我嗰晚冇黑面，氣氛都OK
兩日後我老公返我娘家食飯我就發威︰我喺我媽同成家人面前發惡數我奶奶，然後警告我老公你咪使旨意做媽寶，我忍你阿媽一晚咁大把。我娘家當然幫住我，成家jer到我老公頭暈，我老公又係好怕女人煩佢，我同佢講︰你怕女人煩，但你只可以被我煩到，你咪使旨意做兩面人淨係坐喺度唔郁呀，你有乜事唔幫我，小則我返屋企整死你，大則我親手喺你面前KO你阿媽，絕對唔會比面
我老公知道大禍臨頭，所以每次喺我發脾氣之前佢衝出嚟解決咗先，因為佢知道後果非常嚴重，而我係絕不介意因為婆媳問題離婚！我day1已經講得好清楚
我奶奶知道好多說話係我迫我老公講，佢知道佢個仔根本唔撐佢，都冇乜興趣玩
咁當然，我奶奶本身份人又唔係話刻薄，不過會唔太考慮後果同有少少阿媽啲煩嘢，但我把口太利害，佢知道唔夠我講，亦唔敢惹我
我有比鎖匙，但我同我老公講明佢阿媽夠膽唔出聲上嚟我即刻發難，係即刻，我會夠膽喺成班人食飯時叫奶奶以後唔好唔打電話就上嚟，嗰度唔係佢屋企。我老公知我做得出，所以佢好似同佢阿媽講咗五次唔好上嚟，唔好唔打電話就上嚟 
而我隨住十幾年婚姻相處，都唔會話下下隊人咁衡，你唔惹我我絕對好nice，感情都算好，我奶奶有時都話我細心，好仔不如好新抱
我一結婚已經好明確比我老公知道我同佢阿媽如果佢夠膽揀佢阿媽，佢會冇咗我，結果係非常work
12個讚
痴線，炒節瓜會硬 
衰D講，到底佢食有冇食過好野架
2個讚
男人好賤，講真架，你一味忍，佢又睇死你一定會忍，99就更加成日搵個仔情感勒索你要你屈服，所以真係唔好咁低能去忍，不過又唔好明刀明槍，大家咪你做初一我做十五囉，重點係，唔好兜口兜面同佢嘈/日日係老公面前講佢呀媽不是，例如飲湯呢壇野，一係就好似樓上咁全瓜宴，一係就推佢返去飲媽媽奶，而如果佢呀媽上嚟打坐，你咪返娘家hea下囉，佢地話你，你大條道理話，見到你地咁母慈子孝，搞到我都好掛住我呀媽呀，呀99日日嚟我都日日搵呀媽，隔一排，你老公會問你幾時返屋企，你又可以同佢講，咁你飲完媽媽奶我咪返嚟囉！ 
4個讚
你講得非常啱，你咪追我嗰時就當我係寶，追到手就忍你老母 ← 我名句
我直情唔介意先做衰人，愈衰愈好 
4個讚
唉…其實我未成親就已經有同佢講過…“唔可能一味叫我就…其實婆媳關係…係男人應該處理既野…”
三大條件︰
- 強硬娘家(我嗰個夠照)
- 寧願離婚都唔受氣既準備(我絕對係)
- 本身對老公唔好一眛惡，要愛鍚佢等佢冇咗你唔得 (我係，起碼我做錯嘢會主動道歉，好多事我係先考慮佢先)
3個讚
我直頭係被唱爛既衰心抱，佢仲有個心抱架，就因為我唔賣佢帳所以佢由唱另一個變左淨唱我一個，仲將另一個既缺點化哂做優點，聽到我耳都側埋，未嫁都唔知女人可以有幾恐怖！不過咁，反哂面當大家透明都叫平平靜靜，好過以前咁又單打又比說話你聽，仲要趁個仔唔在場先出聲！因為佢，我覺得直頭擴闊得身心既視野，因為太可恥，我都覺得自己無限升級！ 
1個讚
你好勁, 俾著係我會呢世都唔會煮節瓜佢食。冇份煮又咁多嗲, 要食節瓜一係自己煮一係生食啦
其實應該個個星期都買一兩打比99，叫佢煲比個仔飲，因為自己無佢咁叻煲唔到佢陣味！順道送佢個仔返99度，自己留係屋企unun腳，再影張相叫個老公慢慢食埋先返嚟
你認真嚴正聲明再同佢講多次。
佢唔改變做返個保護妻兒既男人，就算你而家忍到，將來生左小朋友你冇可能忍到。
佢唔開竅絕對唔好同佢生仔，到時你連點湊仔教仔都冇say。
1個讚
我真係要學下… 你地都好勁…
佢阿媽煮野好難食嫁…就算未結婚之前… 我去親…都係要自己煮…
因為我對食有要求, 佢地無乜
我媽叫我忍讓麻… 所以我都真係要學下做好老婆… 由滾節瓜湯開始…但係我自己一d 都唔飲… 好野要留俾老公麻…
1個讚
阿妹，硬淨d，見你即刻買節瓜，你都唔係小綿羊嚟。啱啱結婚，同老公、男家都要時間磨合下，你越淋善其他人就會越得寸進尺。
5個讚
我唔鐘意鬧交…但係更加唔鐘意俾人蝦
7個讚
你有無試過同老公鬧交？我脾氣都唔好，但我好少同老公鬧交，偶然越過我底線發一次脾氣，我老公慘過食屎
1個讚
兩公婆一齊最重要係溝通，仲要係有效既溝通，仲要對一世。
你睇下你老公受軟定受硬，點講佢先會聽得入耳。又或者掉返轉過，offer可以安撫曬兩母子需求既方案，例如佢一個星期去奶奶到幾多次咁但就唔好日日上黎。
最緊要達成目的：講掂佢唔好俾奶奶成日上黎。
要煮節瓜湯煮到佢求你煮其他野
我呢，就唔同人鬧交硬碰，但曾經有人令我唔開心話我唔識湊小朋友呢，我就令佢寶貝仔由每星期返屋企食飯到而家一年返幾次囉
1個讚
鬧過一次… 果陣佢哥成親… 佢地就全部搬左去隔離街… 呢到就順便裝修…
裝修完… 本身講好左話佢媽跟阿哥住隔離街…叫我過去住… 點知我應承之後話整張床留間房俾佢阿媽鐘意住邊就住邊喎…
頂呀… 咁咪者呃我…
我即刻就話如果佢阿媽一齊住…我就唔會再過去…
呢單嘈左2個星期…
我直頭同佢講"阿媽無得換…女朋友有得換… 換過個女朋友啦…"
佢知道我唔會係呢個問題讓… 所以隔離間房到而家都唔放床…
如果佢阿媽過黎住… 我即刻返阿媽到…唔會再講野…
4個讚