T21同抽胎水都話係愛德華氏綜合症，照超聲波已經睇到手掌內屈同腦有泡泡
18w1d入院做左引產手術，由塞藥到等待，經歷左穿水、發燒、出血，最後感覺到佢慢慢咁滑左出黎，一共用左9個小時。其實過程係出乎意料唔太痛，只係我個人有d迷惘，好似重覆緊我順利生大女時候做過既野，但無咁痛，快好多，但係結局完全唔一樣。
我係事前做左好多心理建設，而且深深咁相信，終有一日佢一定會再番黎搵我做媽媽，我地而家只係暫時分開。因為堅守住哩個信念，所以我成個入院過程都好似好平靜同輕鬆咁，直到引產完，姑娘問我要唔要見下佢，果一刻我既眼淚係咁湧出黎，我問姑娘，佢外表同普通人係咪唔一樣？（因為愛德華症既bb外觀係會唔同）姑娘諗左一陣，淨係好含蓄咁話佢外表係光滑既，但係佢未有皮膚（可能因為周數太細）。我聽完之後，鼓唔起勇氣見佢，我驚我接受唔到事實，亦都好驚見完會崩潰，或者之後每日每夜，一合埋眼就閃過哩一個畫面，所以我同姑娘搖左頭，表示唔見，淨係要左腳印帶走。
到出院我收到個腳印，只有大人手指一格咁長，寫左佢有165g重，哩個係我唯一對佢既認識。到我出院番到屋企，摸住明顯平左既肚，終於深刻咁感受到，佢無係入面，我同佢已經徹底分開左。而我連睇佢一眼既勇氣都無。
我望住1歲半既大女周屋跑黎跑去，攬住佢，好想問佢你知唔知你曾經有一個妹妹，只係佢無你咁幸運，如果佢可以出世，你會唔會同佢玩？定係你會搶佢玩具同偷偷打佢？偶然你會唔會攬下佢錫下佢？
我同自己講，我一定要振作養好身體，等佢番黎搵我做媽咪。
有無媽媽好似我一樣，相信走左既BB會再番黎？或者經歷過走左既bb真係番左黎自己身邊？
27個讚
聽到你嘅經歷好心痛。我未為人母，可能未能完全同理到果種生理與心理嘅痛苦。你好堅強呀！我都相信份緣份會再續的！
希望你早日康復， take care!!!
1個讚
Big hug for you!
首先你一定要好好保重、休息、盡量釋懷。
2018 年我化學、小產各1 次；2019 年再懷孕、但因為基因問題， 同年6月， 20周引產，隨後幫寶寶搵咗佛堂念經、渡向
我年紀已經40+，本身已經有個teenage 嘅女女，就算養好身體，都唔可以好似之前咁易中….而2020 年我離開香港去咗外國定居，我同老公去最後一次佛堂同寶寶講：如果佢想，就跟我地返外國，最後同年10 月我再有BB……
最後今年6 月我就生咗個仔仔。
非常巧合，係佛堂完嘅日子係9 月、我10 月就check 到有BB， 引產同生仔仔都係6 月，2 者只相差幾日。
所以我非常相信仔仔就係之前嘅寶寶
17個讚
我曾經有個女(第一次懷孕),15w5d突然穿水,早幾日先產檢完,一切正常…一直都好想要女,所以陀到佢,好開心~但突然就咁,我喊到癲!入院第一日個肚已經扁左,第二日先有超聲波照,女女已經走左…塞藥排女女出來,痛死我!支止痛針副作用又勁…我嘔左幾次,又暈到第二日…真係痛過生B!排完,我隱約見到有團紅紅地嘅野俾姑娘拎走左,我好想見個女,但姑娘唔肯,話BB唔好睇,睇左會影嚮下次懷孕,因為我好想生返佢出黎,所以我冇見個女,老公就有去睇。最後個報告係唔知乜原因女女要走…
坐好小月之後我一直睇中醫睇到1年幾後再懷孕、個胎穏左先唔睇。佢地用同一個乳名,可惜呢個BB係仔,知道唔係女我都喊到癲,因為我只生一胎,今次係仔,即係唔會再有女…但我最後都相信佢地係同一個B,只係性別唔同。
生左仔仔之後,我梗係愛佢啦~依家2歲半,有時見到佢某D角度睇似女仔,我都覺得佢地係同一個BB~
BB未返黎果段時間真係好難捱,個個月黎M都喊一次…你要加油,養好身子,俾信心自己同BB,佢一定會再返黎! 
6個讚
雖然無經歷過，但睇完我喊咗，難以想像嗰種痛。我諗BB只係未準備好，希望寶貝快啲執齊嘢，早日返來搵妳地。加油媽媽。
1個讚
睇到流眼淚
我自己無經歷過呢啲，希望你一切安好（hug hug)
1個讚
朋友經歷，幾次流產，最後一次係20幾週突然穿水，生左仔仔，佢同bb講記住認住媽咪返返黎，佢其實係高齡不孕，但之後連續生左兩個，第一個係女，第二次有左，last m果日正正係佢仔仔走果日，未知性別前，佢問女女覺得bb係弟弟定妹妹，女女多次好肯定話係弟弟，最後真係仔，佢話覺得真係大仔返左黎
6個讚
Virtual Hug xx
2020年3月小朋友離開咗我哋，踏入第10週當日出血，照完發現無心跳同停留喺8週嘅 size。一直好自責，覺得 BB 明明喺我身體入面但係我連佢走咗我都唔知。BB 走咗幾日發夢，夢見佢係男孩子。
休息咗年半，再次有咗，而家15週，驗到係仔，先生話係小朋友返嚟搵我哋。
一直有心結，覺得對唔住離開咗嘅 BB。直至最近睇咗本書，叫「靈魂的出生前計劃」，開始釋懷。以前會成日內疚同怪自己，覺得係因為自己做錯而令 BB 嚟唔呢個世界，但係本書提醒我，早喺 BB 仲喺我肚入面嘅時候我哋已經俾咗滿滿嘅愛佢，佢係喺一個完全被愛嘅環境下先返去天堂。
喺佢返嚟搵你之前，請好好休息，調理身體，佢會喺合適嘅時候再返嚟搵你！
17個讚
一定係佢番黎搵你
好開心你地又可以重聚，我希望我都有一日等到佢番黎搵我。
1個讚
我明白你心情，由開開心心係雲端跌落黎果種感覺。
我慶幸自己已經有一個健康囡囡，如果唔係今次我真係會承受唔住打擊，每次我好難過既時候我就去同大女玩，攬下佢，我係醫院果陣每當想喊就開cam睇下個女係屋企做緊咩，咁樣我先捱過左漫長既過程。
我相信能夠做母女／母子一定有背後解釋唔到既緣分牽拌，雖然你生個係仔仔，但佢一定係之前無帶齊野果個bb再番黎搵你，只係換左個性別
2個讚
懷孕到廿幾周先流產其實真係好難受，佢已經成晒形有胎動，同媽媽已經開始有交流
你既朋友最後能夠由不孕到流產到最後生到2個bb，真係好唔容易，但最後得到咁好既結果我都鄧佢好開心
上天係會獎勵努力既人，BB亦都會搵真心愛護佢既媽咪，祝福你既朋友幸福快樂
你既分享比左好多鼓勵同啟發我，我都想去睇哩本書
我希望bb真係好似本書講咁，係短暫既時間入面都知道我愛佢。
佢短暫既存在，走既時侯唔係無留低任何痕跡，我為佢既來臨曾經興奮開心過，陀住佢短暫既十幾周入面，我帶住佢去過海洋公園，去泳池玩水，去冒險樂園，去海邊散步，去海灘曬太陽。知道佢唔健康後，我擔憂過，我傷心過痛哭過，我幫佢改左英文名，從此佢會一直係我心底 直至我地將來重遇。
14個讚
mrs.A
13
放手都係愛嘅表現！
我同寶寶講過： 如果有一個比我更好嘅媽媽出現、要爭取，我一定會祝福佢。
引產前，我地去過旅行、周圍食buffet 、放題。我老公係外國人，所以只有外國名，有衫仔、小公仔陪佢走。
1個讚
心痛
我都經歷過小產（早週數，不知性別），喊到死去活來咁樣。。。然後我生左大女，大女完全係天使咁好湊、生性，我成日都覺得佢一定係一早就認定左我係佢媽咪。
3個讚
我100%相信係會, 我好多年前, 個仔7個月大因病走… 我當時好阿Q 同樓主你諗法一樣, 佢返到上去, 個天醫好咗, 佢會返嚟搵我… 一年多D之後, 我家小姐出世… 我當時見到佢身上有兩處特徵係同阿仔一模一樣, 其中一樣係同一隻手有斷掌, 我就覺得佢係醫好咗返嚟… 樓主, 安心養好身體, 佢一定會搵番你呢個嫣嫣…
3個讚
我都相信。
我自己都小產過。只要個心堅定BＢ返黎，ＢＢ一定會返番媽媽身邊，只係時間上唔知幾時來臨。
1個讚
我第二胎時，11w左右見紅，私家醫生話已流產，我企喺診所樓下喊咗陣就飛的去醫院，醫院醫生話等自然流產或塞藥，我揀等自流。返到屋企當晚，叫老公同大仔錫吓我“肚腩”（當時佢4歲幾，唔知我大肚），bb好乖，可能知道爸爸、哥哥同佢道別，第二朝就自流，好彩無咩痛，我親手執返胎囊去醫院比醫生cfm，呢個畫面永遠記得。留醫時，見同病房嘅媽媽們塞藥，發燒發冷，呻吟叫痛，戥佢哋辛苦
之後去健康院覆診，好記得姑娘安慰我“呢次bb拖唔實媽咪隻手，下次會乖乖拖實㗎喇！”。3、4個月後，我有咗細仔，雖然係仔，但細仔個樣超似我細個時，完全係mini me。連佢啲性格、小動作，習慣都同我極似，我老公都頂唔順
。而家細仔都5歲幾，諗返仍然眼濕濕喊。
樓主加油，bb會返嚟你身邊
4個讚
可能因為你大女第一次帶漏野，走左知道媽咪咁傷心，再番黎搵媽咪果陣就決心要做個好乖好乖既BB,等媽咪唔好咁辛苦
1個讚