自從帶左對仔女去扒獨木舟，我地直頭愛上左！愛到自己買左隻！ 可以幾時想去邊扒兩個鐘都可以！XD (男人買大玩具嘅最佳藉口！）
作為在職父母，工作真係用左好多時間，同小朋友嘅時間真係好少。。。。加埋仔女天生親媽媽多啲。。。。之前我會單拖帶仔女去旅行，目的係想製做同仔女獨處嘅時間。而家武肺，出海真係一個可以完全獨處時間！
小朋友好得意，出發前話去扒船仔，聽到開心死！出到去見到海浪，驚到喊死！
好喇，上到船驚左一陣。。。。。。
「快啲！快啲呀！」
「去果到啦！」
「阿爹好慢呀！」
有魚跳出水面「好搞笑呀！佢跳dump 咁呀！」
雖然妹好得兩歲，喺哩個完全獨處嘅時間，真係可以好好傾計。
「點解你成日要媽媽唔要阿爹嘅？」
「阿爹惡，會鬧你（仲未識分你我 哈哈）
「咁阿爹陪你多啲啦，唔會惡架」
「好呀」
「要阿爹夜晚講（故事）書」
「好呀！好似講比哥可聽咁，抱住你地一齊講」
等佢地上小學，一人買一隻，想同佢地去遠啲。