囡囡15個月，之前有上過Baby Gym，到上星期開始上Playgroup，一星期兩堂。
我見其他BB都好定，得我個女不停走，成日去老師後面搞教材………唔唱歌唔聽指令，一味走去搞教材同洗手盆……
係呢間playgroup唔啱佢？定過一段時間會好啲？有無過來人分享下？
15個月坐唔定都正常, 好動嘅BB可能鍾意周圍探索多D
不如你諗下你想佢上PLAYGP嘅目的係咩先?
2個讚
都係想佢explore多啲，呢樣我唔擔心…
我又想佢理解返學係點，但佢始終太細，嗌唔聽都正常
好矛盾！特別其他小朋友好冷靜，我個個完全嗌唔聽
希望過多排會好啲！
多謝你！我會觀眾多一排～有需要先轉playgroup
又或者搵機會問老師點做好啲
咁15個月太早了吧, 如果你話想比佢當見下同齡小朋友就可以,
但如果平時都有PLAY DATE, 咁就不如CUT左PLAYGP啦,
過來人覺得好多PLAYGP都係嘥錢
2個讚
明白！咁我自己諗清楚想要咩先！thank you
依家個間就係同幼稚園有connection，但你地講得啱，有啲本末倒置！
我囡都係咁，唔去playgroup都唔知原來咁多小朋友咁細就可以坐定定…
鍾意探索係好事嚟，不過幼稚園 interview 如果有 circle time 環節就頭痕
可以考慮吓 montessori playgroup，好適合鍾意自主探索嘅小朋友，留意課堂有幾多 free play 時間，坊間好多自稱 montessori 但得廿分鐘 free play
我有諗過上分離班，但好似太細個我唔捨得
分離班是完全無意義和呃錢的，就算上分離班唔喊，返學一樣可以再喊，因為環境唔同。
小朋友夠大個，有足夠安全感就自然唔會喊。
我仔15個月時上playgroup都係坐唔定，全程走黎走去。我好辛苦咁捱左果期學費之後，就冇再報，到佢2歲上n班，不知坐得幾定。所以我發覺係15個月，根本唔會坐定定。
到生第二個，我冇再報任何playgroup，直接讀N算了。
1個讚
你有冇教佢要坐定定？因為我上堂時成日見啲家長喺後面Q埋手或者按電話，雖然控制課堂秩序係老師做，但我覺得上得親子班，家長上堂時姿態都好影響小朋友。
唔係話一嚟要佢坐足成堂，我覺得係家長嘅心態都要調節，上堂前預告定上堂應有態度，每次鼓勵佢坐耐少少、再耐少少，慢慢去教佢。
雖然小朋友探索係好正常，我地都要教佢去到唔同場合就要唔同態度，應該玩時就去探索，應該坐定定時坐定定（例如搭車、上堂、餐廳咁）。
至於課程適唔適合，要睇課堂安排，如果真係坐成堂就要諗下啱唔啱你小朋友，我自己鍾意有時坐下、有時free time咁。
你解答左我其中一個疑問！！！多謝你！
我直頭收埋電話架！不過我好認同預告有啲用！第二堂有預告的確有少少進步，有兩首歌嘅時間定左！
我會再試同檢視吓點再做好啲 
我諗係我無信心自己教到佢上N班，又貪間playgroup同幼稚園有聯系，所以未有勇氣放棄住 
但聽你哋講完我會再諗清楚，同俾多啲信心個女
係，其實Playgroup 真係無咩用，咁細個根本唔需要“上堂”。
一旦開始上幼稚園，就一直讀到大學，有排佢讀啦，咁細個喺屋企自己同小朋友玩算。
其實你想教到佢乜野架？真係要睇下你既期望係乜。N班都係自理多架咋。
我冇帶二寶去pg，平時都係同佢玩下泥膠，去公園，聽下兒歌，都冇乜特別野會“教”。唯一一樣我有刻意做同安排，就係培養佢睇書既習慣，每日我都會用15分鐘同佢講故事（沒有認字成份），揭下書，呢樣野對小朋友係畢生受用。
如果可以陪佢上堂，其實換另一個家長入去 eg: 爸爸、公公呢 d, 你預期佢會唔會定返 d ? 如果咁就定返 d，可能係你平時管教上出咗少少問題
我分享下小小經驗
我大仔從小唔怕陌生，我以為返學唔會點喊，點知喊左近個月，佢大個之後，我問返佢，佢話唔係唔捨得媽媽，喊係因為佢驚，唔知入邊係乜野。
第二寶，佢好認人，除左照顧者以外，係唔可以比其他人抱。咁到佢2歲讀N時，我就預早安排每星期有一日帶佢去幼兒園附近行，認下間學校。又適逢間學校有搞暑期playgroup，就嚮開學前報左幾堂，等佢再認下個環境。
到開學，佢只係喊左3日就完全適應（佢仲要係讀全日班）
2個讚
佢平時都曳嘅，但叫得聽！返學可能太興奮，環境唔同掛！