請左個超級唔掂的黑心陪月
佢住大埔 25000 一個月
份約寫明要比頭尾利是 另加車錢
呢個人工我expect 係d 做得好好既經驗陪月
點知係超級唔掂 完全係呃飯食!!
[陪月經驗成疑]
佢聲稱做左十幾年
但我諗真正幫襯過既媽媽唔多
因為佢只係一個乜都唔識既大媽
仲要粗手粗腳 爭d出意外
[唔識餵奶 一出院就餵120ml]
Bb食完奶仲喊 佢就話係未夠飽
六日大就比佢食120ml 一餐
食到bb 不斷嘔奶 直程響鼻度噴出黎
食完奶要掃風 佢就禁電話
未掃完又擺低bb 去做其他野
[成日lee埋響廚房 阿b喊都唔望下]
餐餐煮肉片炒碟菜 都要響廚房個幾鐘
係個幾鐘屈響廚房無出過黎！
重點係bb響廳度大喊十分鐘
佢都唔會出黎望下
完全零反應！（我有裝cam睇到）
我響房泵緊奶 話佢做咩唔睇下bb
佢仲話返我轉頭 話媽媽都要出黎湊下
咁我請陪月返黎做咩？
[煮野難食 打斧頭呃錢]
買送打斧頭就一定
D單只攞其中一張
其餘買既野全部話無單
日日三百幾蚊送 炒肉片走天涯
最好笑日日都claim有個item係中藥
問佢係咩 佢即刻打個突 講唔出！
[唔識幫bb沖涼]
沖涼完全無正規手勢
求其響廁所烏低幫bb除衫
唔會抺眼抺鼻有次序咁做
沖完涼求其一條紗巾就包住阿b出黎
紗巾同索水毛巾都唔識分
個身未抺得乾透就幫bb著衫
[以為工人係比自己用]
我有工人但工人主力湊大寶
叫佢洗下奶樽 佢一心老馮諗住工人做
死死地氣去洗
之後叫佢洗埋lunch啲碗碟
佢就發爛炸 拎碗筷返廚房時鏗鏗聲
仲要串話「我幫你洗埋大寶兩隻碗仔添喇，我職責夠唔係照顧大寶！」
忍唔住話佢
佢話做開既客都有工人
當初知我有工人先肯黎做
唔知我工人只湊大寶
（個工人究竟係咪請返黎比佢用？）
[未比訂金之前乜都話識]
叫佢教下工人煲炒米茶
點知又英文一隻都唔識
簽約果陣明明話識（又講大話！）
工人完全唔知佢做咩
簡單溝通都唔識 完全零交流
[催乳愈催愈痛愈塞]
至於大陸讀既催乳 唔知係咪淘寶証書
只係死力按 痛死人
仲要痛完都係塞奶！
因為我上胎都有請陪月（今胎佢無期先不幸請到佢）
人地催乳係邊按個胸會邊噴奶通奶
佢只係一味死力 完全推唔鬆
寧願佢話自己無學過 好過亂咁按
[唔好盡信媽媽谷]
總之搵佢一定後悔
媽媽谷有幾個人介紹過佢
唔知佢地真心用過佢未
建議大家 咪全信哂啲媽媽
記得簽約時訂明要有試用期
否則只會搵黎搞
坐月休息唔到 更徒添煩惱！
120ml？？最初兩星期好似係每餐食90ml左右咋喎
