大家好 其實我主要係求安慰
我而家11週 我由第7週開始嘔
初初第一個星期嘔都仲返到工
之後已經嘔到完全返唔到工
一日嘔10次 食唔到嘢飲唔到水
最後醫院都入過兩次 要吊鹽水同葡萄糖
我而家只要唔準時少少食止嘔藥都會嘔返
啲醫生護士都安慰我好快過架啦咁
同食藥無咩影響
明明係專業意見我都仲係好擔心食咗啲藥影響bb
我又好怕自己3個月後仲嘔⋯
大家可唔可以分享下經過比我安撫下我
打擾到大家了
1個讚
唔洗太擔心，醫生開俾係嘅藥一定好安全。同埋真係好神奇我嘔到14周就突然有一日完全冇事，成個人好似復活左咁 
2個讚
陀兩個都嘔，食唔到嘢，飲薑茶舒緩到
1個讚
Er…我係嘔到生嘅
係呀，醫生開咗俾你嘅藥其實都係安全嘅。
我懷孕嘅時候冇嘔吐，不過我就經常作嘔，最後係食薑糖，飲薑茶渡過。
媽媽加油捱多陣
bb好快就健康出世架啦
1個讚
你好叻啊咁咪瘦好多？
我表姐就係佢陀孖b。
聽佢講係嘔足三個月。
連飲水就想嘔。食唔到野。
住左一星期政府醫院。
工都番唔到。
希望樓主你都可以過到。
1個讚
只能講只有捱時間過，冇咩實際幫到你的建議。果陣我都係日日數日子咁過，數住下次產檢係幾時可以見下bb有啲安慰，心情好差成日喊，覺得自己人唔似人鬼唔似鬼，捱12週好似捱12年咁耐。最慘終於捱到12週啦但係12週我都未有好轉，果陣簡直係崩潰因為我再唔知應該望幾週作為目標，起碼去到15～17週先係改善左但都一樣間中會嘔，反反覆覆咁。頭4個月會成日餓但食又想嘔，餓又想嘔，果陣都係靠食餅／麵包過日子。到18，19週都仲嘔過一兩次但一樣冇胃口食野，食兩啖就飽住漲住，完全唔覺得餓，勉強食會嘔出黎。唔食可以唔嘔但全日加埋先食到一餐咁。體重最高峰輕左4kg, 到而家20w+了仲未去返懷孕前重量，仲輕緊3kg, 但呢兩日開始feel到終於會幾個鐘就出現肚餓感覺，雖然每餐依然食唔晒一份食物，但叫做少食多餐下都食到4餐（早午茶晚），茶點係一個生果咁。
我中間有睇過中醫食過中藥，同你一樣都驚藥對bb唔好，但諗深一層如果連自己都生存唔到仲點樣比健康bb? 所以都唔理啦咩都試下啦！加油呀！係好難捱，我好明白，講真我都唔想生第二個了，太辛苦！
2個讚
以前成日想要兩個 點知自己個體質係咁
而家只係想肚個個健康就夠
我同你差唔多，大約7週開始嘔，食咩都嘔，飲啖水都嘔，所有話可以止嘔嘅食物都試過，但冇效，係嘔到生，不過嚴重嘔吐係去到12週開始有改善，當時飲左1星期中藥（中藥呢樣野有人認同，有人不認同，我唔係叫你去試，自行決定，始終而家中藥都可能受污染），我當時冇哂辦法之下，唯有試，飲左1星期就有改善，冇手軟腳軟，可以正常返工，之後去到16週嘔吐嘅次數再減少左，但都係嘔到生，一日嘔0～2次左右，但食得訓得，bb好吸收，去到7個月時，西醫叫我要食少d野添，要戒一半飯。
我個人認為醫生開比你嘅西藥係可以放心食嘅。
加油媽媽，他日諗返轉頭，其實而家只係好少事，好快捱過，加油。
可能有人唔認同，唔認同可以唔睇。
我係冇戒口，只係d生冷野冇食（例如刺身，軟雪糕，燒味呢d可能有李斯特菌嘅食物），其他野，只要我想食，我都會食，唔好諗果d辣野唔食得呀，炸野唔食得，總知想食就食，想飲就飲少少（酒精就緊係唔飲）。
我小朋友冇任何皮膚問題，touchwood都算健康，而家都5歲架喇。
1個讚
喺而家呢個時候，可以留意下d bb野幾時特價
果時我撞埋o3 baby開倉，買左張bb床都只係500蚊，又或者揀下之後買邊隻牌子嘅尿片呀，餵母乳又要有咩準備呀，如果唔餵母乳，又可以揀下奶樽呀，奶粉呀等等，呢d都可以幫你過渡下呢d難捱嘅日子。
不過我自己建議餵母乳，touchwood小朋友冇咩病痛，多左嘅母乳又可以整母乳皂，我仔而家仲用緊母乳皂沖涼，自己又可以用嚟洗面，真係滑d。
仲有，11週開始要買埋托腹帶喇，我肚大得快，12週開始用，試過有1日唔記得用，條腰痛到呢
1個讚
我係嚴重孕吐
個個都話過左三個月就冇事但我嘔到生
勁辛苦 我諗都冇乜人好似我咁犀利
成個孕程飲水都飲唔到
淨係食得落junk food
後期仲胃酸倒流
睇中醫都幫唔到我啲乜 只係捱日子
不過過左就咩都唔記得晒
我都係吐到生，醫生話係黃體素過多，身體適應唔到，後期吐係好辛苦，個肚頂住，噴出嘔吐物好易唔小心噴左返個孕肚，同埋後期真係嘔到賴尿，一想嘔我要衝去坐上廁所用袋接住嘔，一慢左就麻煩，好論盡
我細果個好嚴重嘔。不過我記得醫生朋友安慰過我。話越嘔得勁個胎越健康。
而家仔出佐世。見到佢就乜都值得了。加油。
我2胎嘔到5個月，一日嘔1x次，飲水都嘔，記得當時食吓梳打餅，飲汽水先好少少，靠呢D先維持到生命，宜家2個都中學，捱過又一條好漢，加油!
1個讚