啱啱post咗第二胎紀錄，repost埋第一胎睇吓會唔會幫到多啲媽媽>>> 1/2019
同大家分享吓生產日記，可以參考吓！我入院前都係咁搵嚟睇，希望幫到你！
Day 1
傍晚到仁安，辦入院手續，內檢宮頸未成熟，駁一個鐘胎心機，返房食飯，十點塞催生藥，要攤兩個鐘床，之後再駁一個鐘胎心機，冇乜特別就返房瞓，成晚冇痛，瞓得幾好
Day 2第二朝姑娘嚟聽心跳，問有冇作動蹟象，完全冇呀
忽然間七點半開始肚痛，一嚟就三分鐘規律宮縮！老公嚟送早餐，食早餐時痛多咗，好彩食得切，一陣吊藥就要禁食喇
九點見醫生，人工穿水好痛呀，開始吊埋藥唔落得床了。宮頸鬆咗啲，宮縮開始密，我頂咗兩個鐘，個人標汗，經歷咗幾吓好痛嘅宮縮，我決定打無痛喇，因為宮頸預備麻麻，我預過程會漫長，多謝老公支持叫我唔好諗錢喇
轉入產房彎住身打無痛，插尿喉，內檢開2度，加催生藥，打完快樂像神仙，完全冇痛，係對腳痺咗好奇怪咁
三個鐘後內檢都唔痛，宮頸薄咗，但都係得兩度，加催生藥，bb好叻心跳一路穩定
又兩個鐘，瞓吓醒吓宮縮越嚟越勁，有藥都有啲唔舒服，終於姑娘話開4度喇，加油終於有進展，希望唔駛開刀
又兩個鐘，忽然有個新姑娘話頭先檢查bb頭仔有啲腫？！但頭先姑娘冇講喎？更驚嚇係再內檢已經忽然十度！推入產房！吓！因為打住無痛，我仲玩緊電話，原來已經開晒！
入到去產房減少少藥，唔駛完全停，助產士教我試推咗幾吓，見到頭髮喇
推咗七八次，中間都仲傾到計嘅，少少痛，仲未叫醫生，話要我再推落啲先，但係有藥我唔係好知幾時用力呀
過咗九個字醫生出現，話都推咗好耐，如果未得就要吸喇，再努力努力推！終於bb出世喇，喊咗兩聲，見到bb出世我忍唔住喊咗出嚟，聽到佢喊，平安咁嚟到呢個世界，真係好感恩！爸爸去剪臍帶後，抱埋身影相，俾佢埋身試啜奶，bb完全冇意欲，因為佢都好攰喇辛苦晒
醫生幫我清埋胎盤整理下面就返房
過一陣兒科醫生話bb一切正常，媽媽好開心
多謝謝曉明醫生，鄺敏琪醫生同埋仁安各位好nice嘅醫護人員！
總括嚟講，無痛係世界最偉大發明！決定會打嘅媽媽們，早打早享受呀！祝大家生產順利！
